حەمەسوار عەزیز

بیرمە پێش 30 ساڵى ڕێک، واتە لە ساڵى 1992، ئەو کات کە گەنجێک بووم لە سەرەتاکانى تەمەنى هونەریم، یەکەم وتارى تایبەتى خۆم لە ژێر هەمان ناونیشان (شانۆى کوردى لە هەولێر بەرەو کوێ؟) لە ڕۆژنامەى کوردستانى نوێ بڵاوکردەوە، لەو وتارەدا باسى ئەوەم کردووە کە هەموو ئاماژەکان ئەوەمان پێدەڵێن کە شانۆى کوردى لەم شارە بەرەو تەنگژەیەکى قوڵ دەڕوات و ڕەنگە ئەگەر بەمشێوەیە بەردەوام بێت، داهاتووى کارى شانۆیی لەم شارە توشى قەیرانى گەورە ببێت و شانۆ بەرەو تۆنێڵێکى تاریک هەنگاو بنێت،

بیرمە لەو کاتەدا ئەو قسەیە زۆر خەڵکى سەخڵەت کردوو و زۆر بە توندى دژى وەستانەوەو لە ژمارەکانى داهاتووى ڕۆژنامەکە وەڵامى توندیان دامەوەو هەموو ئەو پێشبینیانەى منیان ڕەتکردەوە، ئێستاش زۆر بەداخەوەم کە دواى سى ساڵ لەو مێژووە جارێکى تریش قسە لەسەر هەمان بابەت دەکەم و لەژێر هەمان ناونیشان جارێکى تر دەمەوێ شڕۆڤەى ئێستا و داهاتووى شانۆى کوردى بکەم لە شارێکى دێرین و داهێنەرى گرنگى وەک شارەکەم ، شارى هەولێر، بەڵام ئەمجارە مانشێتێکى لاوەکیم بۆ زیاد کردووە بۆ ئەوەى لە ڕێگەى نمونەیەکى زیندوو ئەو پرسە گرنگە شڕۆڤە بکەم، مانشێتى (لە هەبوو نەبوو تا میرو سەگ و بەگ)،

لاى هەموانیش ڕوونە کە هەبوو نەبوو (یا وەک ئەوەى کەسانێک پێی دەڵێن تەمسیلى ڕەجەب) یەکێکە لە دیارترین و نایابترین نمایشە شانۆییەکانى هەولێر کە لە سەرەتاى هەشتاکان پێشکەشکرا، ئەم نمایشە لە نوسینى نوسەرى بەناوبانگى عێراقی (قاسم محەمەد) و وەرگێڕانى (عومەر شێخەڵلا دەشتەکى) و دەرهێنانى مامۆستاى هونەرمەند (سەباح عەبدوڵڕەحمان) و بەرهەمى تیپى هونەری میللی هەولێر بوو کە یەکێک لە گرنگترین تیپە شانۆییەکانى ئەو سەردەمە بوو، تیاییدا ژمارەیەکى بەرچاوى شانۆکارە داهێنەرەکانى هەولێر لەو نمایشە بەشدارییان کرددوە کە بە بڕواى ئێمە و زۆرێک لە شڕۆڤەکاران، ئەم نمایشە خاڵى وەرچەرخان بوو بۆ شانۆى کوردى لە هەولێرو بۆ ئەو هونەرمەندانە کە وەک ئەکتەر لەو نمایشە دەرکەوتن،

لەوانە (سەعدون یونس، زاهیر عەبدوڵلا، سەلام کۆیی، ئاواز مەحمود، سەمیرە عەبدۆک، خەلیل یابە، عەلى ئەحمەد، جیهان ئەحمەد، شلێر کۆیی، قاسم عەزیز، جەلال بەیار، ئەنوەر عەزیز، شوکرەڵلا شێخانی، یاسین مستەفا، کۆمەڵێک ئەکتەرى تر، تەنانەت وەک پڕۆسەى دەرهێنان و دروستکردنى نمایشى شانۆیی ئەم کارە بە گرنگترین کارى مامۆستا سەباح عەبدوڵڕەحمان دادەنرێت و یەکێکە لە گرنگترین کارە شانۆییەکان کە شانۆى کوردى لە هەولێرو هەموو کوردستان دەتوانێت شانازى پێوە بکات، زیاد لەوەش ئەو کارە شانۆییە نەوەکو هەر لە کوردستان، لە هەموو عێراقدا دەنگدانەوەى هەبوو، بە تایبەتى کاتێ لە بەغدا پێشکەشکرا، بەڕاى زۆرێک لە نوسەرو ڕەخنەگران ئەو کارە توانى خودى نمایشە عێراقییەکە تێپەڕێنێت کە لە دەرهێنانى قاسم محەمەد و نواندنى دەستەیەکى بژاردە لە شانۆکارە دیارەکانى ئەو کاتەى عێراق بوو.

نمایشى (ڕووتەو سەگ و بەگ) دواهەمین نمایشى شانۆیی بوو کە لە هەوڵێر پێشکەشکرا لە نێو مەراسیمى کۆتایی حەفتەمین ڤیستیڤاڵى نێودەوڵەتى هەولێر بۆ شانۆ، لە نوسین و دەرهێنانى هونەرمەند سەباح عەبدوڵڕەحمان و نواندنى هەریەک لە (بەکر مەعروف، فەیسەڵ محەمەد سالح ، زایەر عەبدوڵلا، بەلقیس دۆسکى، سیروان عوسمان، شاهین نەجمەدین، هەدار ئەنوەر) بوو.

من کە پێش ماوەیەک لە وتارێکدا نوسیم (بۆچى داهێنان لە هەولێر دەمرێت؟) خەڵکێکى زۆرى سەخڵەت کردو بە ڕاستەوخۆو ناڕاستەخۆ، هەر لە بەڕێز پارێزگارى هەولێر (ئومێد خۆشناو) و بەڕێوەبەرى گشتى ڕۆشنبیرى و هونەرى هەولێر مامۆستا فەرهەنگ غەفوورو دەرهێنەرى هەردوو نمایشى ناوبراو، مامۆستا سەباح عەبدوڵڕەحمان، وەڵامیان دامەوەو ئەوەیان ڕەتکردەوە کە لە هەولێر داهێنان بمرێت و بە پێچەوانەوە وتیان هەولێر ئەو شارەیە کە هەمیشە داهێنان دروست دەکات و زۆرێک لە هونەرمەندى ناوچەو شارەکانى ترى کوردستان لە هەولێر ژینگەى داهێنانیان بۆ خۆشکراوەو بەشێوەیەکى بەرچاو کە هاتوونەتە هەولێر کارى داهێنەرانەیان کردووە، تەنانەت هەر بەم بۆنەیە مەراسیمێکیان ساز کرد بۆ هەرسێ هونەرمەندى کۆچکردوو (فوئاد ئەحمەد، شەماڵ سائیب، تەحسین تەها) و تیشکیان خستە سەر ئەوەى کە هەردوو هونەرمەندى گەورە شەماڵ سائیب و تەحسین تەها کە خەڵکى هەردوو شارى سلێمانى و دهۆکن، هەولێر توانیویەتى زەمینە بۆ داهێنانیان ساز بکات و باشترین کاتەکانى داهێنانیان ئەوە بووە کە لە هەولێر ژیاون و کاریان کردووە.

منیش دەمەوێ ئەوەیان بۆ ئیزافە بکەم کە جگە لەو هونەرمەندانە، هونەرمەندانى وەک محەمەد جەزاو قادر کابان و خەلیل موڕاد وەندى و زۆرێکى تر لە هەولێر داهێنانیان کردووەو باشترین کارەکانیان پێشکەشکردووە، تەنانەت لە بوارى شانۆو دراماش هەمان بۆ چوون بۆ کەسانى وەک تەحسین شەعبان و مەهدى ئومێدو ئەرسەڵان دەروێش و ئەحمەد سالاریش ڕاستە.

بەڵام کێشەکە لەوەیە کە بەدحاڵیبوونێک لە نێوان من و ئەو بەڕێزانە هەیە کە وەڵامیان داومەتەوە، من بە هیچ شێوەیەک باسى ئەوەم نەکردووە کە داهێنان لە هەولێرى دوێنێ و پێرێ مردووەو دەمرێت، بە پێچەوانەوە من هەولێرى دوێنێ و پێرێ بە لانکەى داهێنان و هاوشانى شارێکى زیندووى وەک سلێمانى دەبینم لە هەموو بوارە هونەرى و ئەدەبییەکان، نمونەشم هێناوەتەوە کە دەڵێم کاتێ هاوتا ئەسعەد لە کاتێکدا لە هەولێر خەریکى داهێنان و نوێگەرى بوو لە گۆرانى و مۆسیقاى کوردى، عەدنان کەریم لەو کاتەدا خەریکى لاساییکردنەوە بوو، بەڵام دواتر چى ڕوویدا؟ بۆیە کێشە لە دوێنێ و پێرێى هەولێر نییە، کێشە لە ئێستا و دواهەمین دە بۆ پانزە ساڵى ساڵى کارى هونەرى و داهێنانە لە هەولێر، بۆیە هەوڵدەدەم وەک نمونە لەسەر ئەو دوو کارە شانۆییەى مامۆستاو هونەرمەندو یەکێک لە دامەزرێنەرانى شانۆى ئەکادیمى لە کوردستان و هەولێر، سەباح عەبدوڵڕەحمان بوەستم.

لە ڕابردوودا هەموو کارێکى سەباح عەبدوڵڕەحمان ڕووداوێکى هونەرى گرنگ بوو بۆ خۆى، هەموو کارەکانى وەک مارەیی، چڵپاو، مرۆڤ و ئازارەکانى، هەبوو نەبوو، لاس و خەزال، دەبوونە مایەى باس و خواسى ڕۆژنامەکانى ئەو کاتەو لەڕووى جەماوەریشەوە بینەرێکى یەکجار گەورەیان هەبوو، بەتایبەت هەبوو نەبوو یەکێکە لە گرنگترین ئەو کارە شانۆییانەى کە بە شانازییەوە دەچێتە ڕووبەرى یەکێک لە باشترین کارە شانۆییەکان کە شانۆى کوردى دەتوانێت شانازیان پێوە بکات، لەوەش زیاتر سەرەتاى وەچەرخانێکى گرنگ بوو لە شانۆى کوردى و جارێکى تر بوو بە دەروازەیەک بۆ شانۆکارى کورد کە بگەڕێتەوە نێو کولتوورو کەلەپوورو ئەفسانەو داستانە کوردییەکان، جارێکى تر بتوانێت لاپەڕەکانى مێژووى خۆى هەڵبداتەوەو بیکاتە سەرچاوەیەکى گرنگى داهێنان و داڕشتنەوە بۆ بونیاتنانى گوتارێکى شانۆیی کوردى کە بتوانێت خەسڵەتى کورد بوون وەک نەتەوەو کولتوورێکى جیاواز هەڵبگرێت و ببێتە بەشێک لە گوتارى بەرەنگاربوونەوەو مانەوە لە ڕووى هەموو ئەو هەوڵە دوژمنکارانەى کە لەو کاتەدا هەوڵى دەدا شوناس و ناسنامەو زمان ومێژووى میللەتەکەمان بسڕێتەوەو لەنێو پڕۆسەى (ڕاماڵین، بەبەعسیکردن، بەعەرەبکردن) کە ترسناکترین پڕۆسەى پاکتاو و قڕکردنى نەتەوەیی بوو لە ژێر سایەى سیاسەتى ڕژێمى ئەو کاتەى عێراق پیادە کراو کارەساتى گەورەى وەک ئەنفال و ڕاماڵێن و کیمیابارانکردنى شارەکانى کوردستانى لێکەوتەوە،

دواى ئەم سەروەرییانە کە شانۆى کوردى لەو قۆناغە مێژوویانە تۆمارى دەکات، ئاریشەیەکى گەورەیە کە دواى ئەو مێژووە گرنگە و لە دواهەمین ڤیستیڤاڵى نێودەوڵەتى هەولێر بۆ شانۆ بەر تازەترین کارى مامۆستا سەباح عەبدوڵرەحمان دەکەوین، ئەویش نمایشى شانۆیی (ڕووتە و سەگ و بەگ)ە، ئەم نمایشە پاش ئەوە دێت کە مامۆستا سەباح بۆ ماوەى زیاد لە دە ساڵ هیچ کارێکى شانۆیی نەکردووەو لەو ڤیستیڤاڵەى کە تیاییدا وەک یەکێک لە ڕابەرانى شانۆى کوردى خەڵاتى ڕێزلێنان و شکۆمەندى و مەدالیاى زێڕینى داهێنانى دەکرێتە مل، لەو بۆنەیەو لە مەراسیمى کۆتایی ئەو ڤیستیڤاڵە مامۆستا سەباح عەبدوڵڕەحمان، نمایشێکى شانۆیی کە وەک خۆى ناوى لێناوە ئیڕتیجالى پێشکەش دەکات بە هاوکارى ژمارەیەک شانۆکارى دێرینى هەولێر لە ژێر ناونیشانى (ڕووتەو سەگ و بەگ) ، بە بڕواى من کوالیتى هونەرى ئەم نمایشە بۆ من و زۆرێک لە ئامادەبووانى ئەم نمایشە هەزارو یەک نیشانەى پرسیارو سەرسوڕمان دروست دەکات و ڕووبەڕووى واقیعێکى تاڵى شانۆمان دەکاتەوە لەو شارە.

من قسەم لەسەر پەیامى هزرى و سیاسى نمایشەکە نییەو چونکە پەیامێکى زۆر واقیعى و بوێرە کە هەوڵدەدات پەردە لەسەر ڕەوشى سیاسى ئێستاى عێراق و کوردستان لابدات و ڕووى ڕاستەقینەو باکگراوەندى ئەو سیاسەتە وێنا بکات لە فۆرمێکى کۆمیدى کە مامۆستا ناوى ناوە ئیڕتیجاڵى، بەس من تا ئێستاش تێنەگەیشتم ئەو نمایشە چ پەیوەندییەکى بە شانۆى ئیڕئیجالییەوە هەبوو، یا تەنانەت ئیڕتیجال وەک شێوازێکى کارکردنى ئەکتەر لە شانۆدا لە کوێدا دەچێتە نێو پڕۆسەى بونیاتنانى ئەو نمایشە شانۆییە؟

من لێرەدا بە هیچ شێوەیەک لە ماندووبوون و دڵسۆزى ستافى ئەو کارە کەمناکەمەوە کە لە بارودۆخێکى ناخۆش و سەختى وەک ئێستا، ئەو هەموو کاتەیان بە شانۆ بەخشیوەو ڕۆژانە پڕۆڤەیان کردووەو ماندووبوون و بێ بەرامبەر کاریان کردووە بۆ ئەوەى شارەکەمان بێ ناز نەبێت لە ڕووى کارى شانۆییەوەو ئامادەیی هەولێر و شانۆکارانى هەولێر لەنێو ڤیستیڤاڵ پەراوێز نەخرێت و هەموو میوانان ببینن کە هێشتا لێرە شانۆو کارى شانۆیی بەردەوامى هەیە، بەڵام خۆ دەبێ بپرسین ئایا ئەو نمایشە توانى هیچ کامێک لەو ئامانجانە بپێکێت یا بە پێچەوانەوە بووە نیشانەى پرسیارێکى گەورە لەسەر ڕەوشى کارى شانۆیی لە هەولێرو تواناى شانۆکارانى ئەو شارە لە بوارى داهێنان و پڕۆسەى نوێبوونەوەى شانۆ،

سەیرە لە کاتێکدا لە هەمان ڤیستیڤاڵدا سلێمانى (شالیر و جادوکەرانى ماکبێس) نمایش دەکات و هەڵەبجە (سرودێک بۆ ئیکارۆس) پێشکەش دەکات و ناسریە بە نمایشى (مردوو مرد) بینەر سەرسام دەکات و مەهدى حەسەن و هاوڕێکانى بە نمایشى (شەوگار گۆرانیەکانى خۆى دەڵێت) درێژە بە پڕۆژە شانۆییەکەیان دەدەن، سەیرە لەو کاتەدا کۆمەڵێک شانۆکارى دیرێنى هەولێر لەڕووى هونەرییەوە نمایشێکى سەرەتایی و قوتابخانەیی پێشکەش بکەن کە زیانێکى گەورە بەو مێژووە پڕشنگدارەیان دەگەیەنێت؟!! نمایشێک هیچ بنەمایەکى داهێنان و جوانى تێدا نییەو لەسەر تێکستێکى سادەى درامى بیناکراوە کە ناتوانێت خۆى لە ڕاستەوخۆیی و گوتارى بازاڕى دەباز بکات و بە فۆرمێک پێشکەش دەکرێت هیچ بونیادێکى جوانکارى تێدا نییەو فۆرمێکى سواو و دووبارە، وەک ئەوەى زەمەن لە شوێنى خۆى وەستا بێت و شانۆى کوردى تازە بەر ئەلفوبێی دروستکردنى کارى شانۆیی بکەوێت.

ڕەنگە پاساوى بوونى ئەم نمایشە بەو فۆرمەو ئاستە هونەرییە ئەوە بێت کە ئەوە نمایشێکە وەک بڕگەیەکى مەراسیمى کۆتایی ڤیستیڤاڵ پێشکەشکراوەو زیاتر بایەخ بە بوارى ئاهەنگسازى !!! و کۆمیدیا !!! دراوە بۆ ئەوەى کەشێکى چێژبەخش بەو مەراسیمە ببەخشن، بەڕاستى ئەگەر بەم شێوەیە بیریان کردبێتەوە ئەوە کارەساتەکە گەورەترە، چونکە هەرگیز ناکرێت شانۆ بەو شێوە نادروستە مامەڵەى پێوە بکرێت، نمایشى شانۆیی بونیادو بنەماو ڕەهەندى هزرى و درامى جوانکارى خۆى هەیە، ناکرێت کۆمەڵە شانۆکارێکى دێرینى وەک ئەو بەڕێزانە ئەو جۆرە نمایشە بەو پاساوە پێشکەش بکەن، ئەوان نمایندەى پەنجاى ساڵى مێژووى شانۆى شارێک دەکەن، ئەوان پێگەیان زۆر لەوە گەورەترە کە بەو شێوەیە نمایش دروست بکەن، بەداخەوە هەر چەند لێى ورد دەبمەوە لەڕووى فۆرمەوە لەو نمایشە ساتێریانە* دەچێت کە کاتى خۆى یۆنانى و ڕۆمانیەکان لە کاتى پشووى نێوان نمایشە شانۆییە مەزنەکانیان پێشکەشیان دەکرد بۆ ئەوەى بینەر تۆزێک بە کۆمیدیایەکى بازاڕى خاو بکەنەوەو لەڕووى سایکۆلۆژییەوە ئامادەى بکەنەوە بۆ ئەوەى بتوانێت بەردەوام بێت لە پڕۆسەى بینینى تراژیدییا مەزنەکان کە کات و ووزەیەکى زۆرى لە بینەر دەویست.

دواتر ڕوونە هونەرمەندو تواناى هونەرمەند لە بچوکترین کارى هونەرییدا دەردەکەوێت، هونەرمەندى داهێنەر ئەگەر دیمەنێکى پینج دەقەییش پێشکەش بکات، دەتوانێت بینەر سەرسام بکات و بینەر بە ئاسانى تواناو داهێنانى ئەو هونەرمەندە لەو دیمەنە کورتەو لەو زەمەنە کورتە دەبینێت، چونکە داهێنان و جیاواز بوون و شۆککردنى بینەر بنەماى کارى هونەرى داهێنەرانەیە، هونەر بەرپرسیارێتییە، هەموو بەرهەمێکى هونەرى بەرپرسیارێتییە، ناکرێت هونەر بۆ بۆنە و موناسەبە بچوکبکرێتەوە (وەک بینیمان لەو چەند ساڵەى ڕابردوو لەم شارە هونەر بەگشتى و شانۆ بەتایبەتى بۆ بانگەشەى حیزبی و تەمجیدکردنى سەرکردەکان بەکار هات)، هونەر ناکرێت بە ڕاگوزەرى کارى لەسەر بکرێت و ببێتە بڕگەیەکى کات کوشتن، بە تایبەت کاتێ کۆمەڵێ شانۆکارى دیرین ئەو کارە دەکەن، سەباح عەبدوڵڕەحمان یەکێکە لە ڕابەرانى شانۆى کوردى لە هەولێرو کوردستان، هەموو جولەیەکى هونەرى بە ئەرێنى و نەرێنى لەسەرى دەکەوێت، تەنانەت ئەگەر دیمەنێکى پۆڵی-صفی، پێشکەش بکات، دەبێ ئاگادارى ئەوە بێت ئەو ناوێکى گەورەیەو مەرجەعە بۆ دەیان شانۆکارى بە ئەزموون و گەنج، بۆیە ئەم نمایشە مامۆستا ڕووبەڕووى دەیان پرسیار دەکاتەوە، پاش ئەو هەموو ئەزموونە ئێمە وەک شانۆکارانى گەنج چاوەڕێی ئەوەمان لە مامۆستا سەباح و هاوڕێ پێشەنگەکانى دەکرد؟

من لەبەر ئەوەى بڕوام بەوەیە کە هونەرمەندو نوسەرو ڕەخنەگر دەبێ ڕاستگۆ بێت و ترسى لە گوتنى حەقیقەت نەبێت، باجێکى گەورەم داوە لە وتنى حەقیقەت و دڵنیاشم لە داهاتووشدا دەیدەم، تەنانەت دواى بڵاوبوونەوەى ئەم وتارەش دڵنیام دیسان کۆمەڵێک کەس کە ناتوانن ڕووبەڕووى حەقیقەتى کارەکانى خۆیان ببنەوە، بەشێوەى جیاواز هێرشم دەکەنە سەرو ناوو ناتۆرەى جیاوازم بۆ دروست دەکەن، بەڵام من بێباکم چونکە ئەرکى خۆم بە ڕاستگۆیی پیادە دەکەم و ئەوە دەنوسم کە بڕوام پێی هەیە، لێرەشدا لە ئێوەى خوێنەرى بەڕٍێز دەپرسم دەبێ ئێمە لەو ڕەوشە بێدەنگ بین، دەبێ من وەک نوسەرێک و ڕەخنەگرێک لە ڕەوشێک بێدەنگ بم کە دەبینم کۆمەڵێک شانۆکارى گەورەو دیرێنى شارەکەم بەرەو هەڵدێر هەنگاو هەڵدەگرن و هەموو داهێنان و مێژووى دوێنێیان دەخەنە ژێر پرسیار، ئەم کارانە هەر تەنها زیان بە ناوبانگى ئەوان ناگەیەنێت، ئەمە شکۆى شانۆى میللەتێکە، ئێمە دەیان میوانى غەیرە کوردمان لەو ڤیستیڤاڵە هەبوو، پێمان خۆشبوو کە چۆن سەرسام بوون بە شالیر و سرودێک بۆ ئیکارۆس و ڕۆژگار گۆرانییەکانى خۆى دەلێت و ئاگادارم نوسین و وتاریان لە ڕۆژنامەو سایتە هونەرییەکانى خۆیان لەسەر ئەو نمایشانە بڵاوکردۆتەوە، پێم خۆش بوو نمایشەکەى مامۆستا سەباح و هاوڕێکانى لە ڕووى داهێنان و جوانکارییەوە توشى شۆکیان بکات، بەڵام بەداخەوە ئەوە ڕووینەدا.

لە کۆتاییدا جارێکى تر دەمەوێ ئەوە دووپات بکەمەوە کە هەولێرو فەزاى هەولێر بەرپرسە لەم ڕەوشە خراپەى کە شانۆ تیاییدا دەگوزەرێت، ئەوە فەزاى کولتوورى و مەعریفى شارەکەیە کە ڕێگە دەدات ئەو کارانە لەسەر شانۆ پێشکەش بکرێت و بێدەنگ تێپەڕێت، شارێکە هەناسەى ڕەخنەگرتن و وتنى (نا)ى تیادا کوژراوە، ئەمەش دەرهاویشتەى فەزاى گشتى شارە، لە شارەکانى تر فەزاى شار ڕێگە نادات کە شانۆکار بەناوى شانۆى جیددى و ئەکادیمى ئەمجۆرە نمایشانە پێشکەش بکات، چونکە شار لێت دەپرسێتەوە، دەتخاتە ژێر بەرپرسیارێتى و بینەرى شارەکە سزات دەدات، بەڵام بەداخەوە لێرە هیچ ئاوێنەیەک نییە هونەرمەند ئاستى کارەکانى تیا بدۆزێتەوە، کێشەى هەولێر ئەوەیە کە نەیتوانیوە وەک شار ببێتە ڕەقیب و چاوێر بەسەر کارى هونەرمەندو ئەدیبەکانى، شارێکە هەموو بنەماکانى داهێنان تیاییدا شێواوە، شارێکە ئەوەندەى خەریکى ستایشى دوێنی خۆیەتى ئاگادارى ئەو کارەساتە نییە کە ئێستا تیاییدا نقوم بووە، شارێکە تەنها ستایش و پیاهەڵدانت لێ قەبوڵ دەکات و ڕەخنە بە خیانەت و دوژمنایەتى دەبینێت.

دواهەمین شت دەمەوێ ئەوە بڵێم کە مامۆستا سەباح عەبدوڵڕەحمان و هاوڕێکانى هێشتا نمونەیەکى جوانى هونەرمەندى ئەو شارەن، هێشتا دڵیان لاى شانۆى شارەکەیە، هێشتا خەم لە واقیعى ئەم شارە دەخۆن، بەداخەوە کۆمەڵە شانۆکارێکى ترى ئەو شارە تەنانەت تاقەتیان نییە بەلاى شانۆدا گوزەر بکەن، یەک نمایشى شانۆیی نابینن، یەک وشە لەسەر شانۆ ناخوێننەوە، من ڕووى دەمم لە مامۆستا سەباح و هاوڕێکانیەتى، چونکە هەستدەکەم دەتوانن باشتر خزمەتى شانۆى شارەکە بکەن، هێشتا وزەى کارکردنیان تیادا دەبینم، بەڵام پێویستە زیاتر لەوە ورد ببنەوە، زیاتر لە بەرپرسیارێتى سەرشانیان بڕوانن، زیاتر هەست بەوە بکەنەوە کە نابێ لە پەراوێز سەیرى ڕەوشەکە بکەن، نابێ بەو شێوەیە سەرپێیە مامەڵە لەگەل پڕۆسەى دروستکردنى نمایشى شانۆیی بکەن، زەمەن گۆڕاوەو ئەگەر هونەرمەند لەو گۆڕانکاریانە تێنەگات، ون دەبێت و بەجێدەمێنێت، کە کارێک دەکەن دەبێ لە ئاست ناوو ئەزموون و پێگەیان بێت لە نێو نەخشەى شانۆى کوردى، دەنا مێژوو هیچ پاساوێکیان لێ قەبوڵ ناکات، داهێنان تاکە سەرمایەیە کە کەس ناتوانێت پێت ببەخشێت، نە حیزب و نە حکومەت و نە مێژوو، داهێنان موڵکى خۆتەو ئیڕادەو مەعریفەى خۆت دروستیدەکات.

*شانۆى ساتێرى: چەند دیمەنێکى شانۆیی زۆر بازاڕى و ئاستنزم بوون کە لە سەردەمى یۆنان و ڕۆمان وەک ناوبڕ لەنێوان نمایشە شانۆییەکان بۆ چێژبەخشین و پێکەنینى بینەر پێشکەشدەکراو هەموو جۆرە کردارێکى تیادا دەکرا بۆ ئەوەى بینەر بخەنە پێکەنین.