هەرێم نیوز
بەپێی ڕاپۆرتێک لە ڕۆژنامەی (وۆڵ ستریت جۆرناڵ) لە زاری سەرچاوە ئاگەدارەکانەوە، کۆماری ئیسلامی ئێران لە ماوەی ساڵی ڕابردوودا سەدان ملیۆن دۆلار لە داهاتی نەوتی لە ڕێگەی نووسینگەکانی ئاڵوگۆڕی دراو، کۆمپانیا تایبەتەکان و تۆڕی حەواڵەیی لە دوبەی گەیاندووەتە حیزبوڵڵای لوبنان.
بەپێی ئەو ڕاپۆرتە، ئەم ڕێڕەوە نوێیە بووەتە ڕێگای سەرەکی دابینکردنی دارایی بۆ ئەو گرووپە، دوای ئەوەی کە کەناڵەکانی پێشوو تێکچوون و چاودێری ئەمنیی لە لوبنان توندتر کرا.
ڕۆژنامەی (وۆڵ ستریت جۆرناڵ) ئاماژەی بەوەداوە کە حیزبوڵڵا دوای جەنگی ساڵی ڕابردووی لەگەڵ ئیسرائیل، ڕێڕەوەکانی پێشووتری گواستنەوەی پارەی لە ڕێگەی سووریاوە لەدەستداوە، لە کاتێکدا کە بۆ نۆژەنکردنەوە و نوێکردنەوەی چەکی ڕووبەڕووی کەمییەکی توند لە سەرچاوەی دارایی بووەتەوە.
بە ڕووخانی ڕژێمی بەشار ئەسەد لە سووریا، کە هاوپەیمانێکی سەرەکی کۆماری ئیسلامی ئێران بوو، ڕێڕەوە نەریتییەکانی قاچاخکردنیان پەکیکەوت.
لەلایەکی ترەوە، بەرپرسانی لوبنان چاودێرییەکی توندوتۆڵتریان خستووەتە سەر هاتنە ژوورەوەی پارەی نەختینە لە ڕێگەی فڕۆکەخانەی بەیرووتەوە.
ئەمریکا نیگەرانە لەسەر ئەم ڕێڕەوە نوێیە و بەردەوامە لە گەمارۆ خستنە سەر ئەو تاک و کۆمپانیایانەی کە هاوکاری تۆڕی دارایی حیزبوڵڵا دەکەن.
بەرپرسانی باڵای ئەمریکا ئاماژە بەوە دەکەن کە واشنتۆن هەروەها نیگەرانە لە گواستنەوەی پارە بۆ حیزبوڵڵا لە ڕێگەی تورکیا و عێراقیشەوە.