هەرێم نیوز

لە كاتێكدا باكووری كوردستان چاوەڕوانی ئەوەن، سەلاحەدین دەمیرتاش، هاوسەرۆكی پێشووی هەدەپە ئازاد بكرێت، كەچی داوایەكی تری یاساییان لەسەر كردووەتەوە و تۆمەتی ئەوەیان داوەتە پاڵ سووكایەتی بە رەجەب تەییب ئەردۆغان، سەركۆماری توركیا كردووە، بۆیە داوا دەكەن حەوت ساڵ زیندانی بكرێت.

بەگوێرەی میدیاكانی توركیا، سەڵاحەدین دەمیرتاش کە لە زیندانی داخراوی ئەدرنە بەندکراوە، بەشداری دانیشتنەکەی بازنەی 14ی دادگای ئاسایشی گشتی لە مێرسین نەکرد و پارێزەرەکەی نوێنەرایەتی دەکرد. دادوەر بڕیاریدا دۆسیەی دو سکاڵا دژی دەمیرتاش یەکبخات کە پەیوەست بون بە وتارەکانی لە شارەکانی مێرسین و دیاربەکر (بە تۆمەتی سوکایەتیکردن بە سەرۆک)، بەڵام داواکاریی یەکخستنی دۆسیەکانی پەیوەست بە لێدوانەکانی لە ئەنقەرە و ماردین ڕەتکردەوە.

پارێزەری سکاڵاکار، کە لە ڕێگەی سیستەمی دەنگ و ڕەنگەوە بەشداری دانیشتنەکە بو، داوای کرد دەمیرتاش بۆ هەر کردارێک بە جیا سزا بدرێت، نەک بە شێوەی زنجیرەیی و پەیوەست بە یەکەوە. لای خۆشیەوە پارێزەری دەمیرتاش (کە لە ساڵی 2016ـەوە دەستگیرکراوە)، داوای مۆڵەتی کرد بۆ ئامادەکردنی بەرگری لە بریگرەکەی.

دوای گوێگرتن لە وتەکان، دادوەر هۆشداریدا کە ئەگەر دەمیرتاش لەسەر هەڵوێستەکەی ئێستای بەردەوام بێت و بەشداری دانیشتنی داهاتوو نەکات، ئەوا "وا دادەنرێت کە مافی بێدەنگبونی بەکارهێناوە"، و دانیشتنەکەی بۆ 6ی 1ـی داهاتوو دواخست.

چەندین كەسایەتی سیاسی سەر بە ئاكەپە و مەهەپە و دەم پارتی پێیانوایە، ئازادنەبوونی دەمیرتاش كاریگەریی زۆری لەسەر پرسی چارەسەری كورد دەبێت، ئەگەر ئازاد نەكرێت پرسی چارەسەریی ئەنجامی نابێت، بەڵام تاوەكوو ئێستا ئازاد نەكراوە.

جەنگیز چاندار، پێشتر موژدەی دایە باكوورییەكان دەمیرتاش ئازاد دەكرێت، بەڵام ئێستا دەڵێت، ئازادنەبوونی دەمیرتاش سیاسییە و دەستێكی لە پشتە، ئەگەر ئازاد نەبێت بەو مانایە دێت پرسی چارەسەری كورد دەكوژن.

ئەو سیناریۆیەی ئێستا بۆ دەمیرتاش دروست بووە، كە دۆسییەیەكی تریان لەسەر كردووەتەوە، چەند ساڵێك بەر لە ئێستا هەمان سیناریۆیان ئەنجامدا، كاتێك دادگای تاوانەكانی ئەنكەرا بڕیاریدا دەمیرتاش ئازاد بكرێت و تەنانەت خۆشی كۆ كردەوە تا لە زیندان بێتە دەرەوە، بەڵام دۆسیەیەكی تریان لەسەر كردەوە و ئازادیان نەكرد.
دادگای مافی مرۆڤی ئەورووپا سێجار داوای كرد دەمیرتاش و فیگەن یوكسەكداغ ئازاد بكرێن، تەنانەت لە جاری سێیەمدا بڕیاری بڕاوەیدا و ئیدی توركیا ناتوانێت تانەی لێبدات و دەبێت بڕیارەكەش جێبەجێ بكات، بەڵام تاوەكوو ئێستا ئازاد نەكراوە.

دەوڵەت باخچەلی، سەرۆكی مەهەپە لەناو پەرلەمانی توركیا لەبارەی ئازادبوونی دەمیرتاش ئاماژەی دا، پێویستە ئازاد بكرێت چونكە دادگا ئەو بڕیارەی داوە.
رەجەب تەییب ئەردۆغانیش لە كۆنگرەیەكی رۆژنامەوانیدا گوتی: ”دادگا چی بڵێیت ئێمە ئەوە جێبەجێ دەكەین“، بەڵام ئازادبوونی دەمیرتاش هەر نەبووە كردار و سیاسییەكانی توركیا و میدیای توركیاش، رۆژانە قسەی لەسەر دەكەن.

دادگاییكردنی نوێی دەمیرتاش، لەکاتێکدایە دادگای مافی مرۆڤی ئەوروپا لەم دواییانەدا تانەی تورکیای لەسەر بڕیاری ئازادکردنی دەمیرتاش ڕەتکردەوە، لە لایەکی دیکەشەوە ڕاپۆرتەکان باس لە ئەگەری ئازادکردنی دەمیرتاش دەکەن لە سایەی دەستپێشخەرییەک بۆ چارەسەری قەیرانەکان کە قۆناغێکی باشی بڕیوە.