هەرێم نیوز
هەردوو وەزارەتی سامانە سروشتییەکان و کارەبا بڵاویانکردەوە، زۆربەی كێشە تەكنییەكانی داناگاز چارەسەر كراوە و لەهەر بەرەو پێشچوونێک هاوڵاتییانی کوردستان ئاگادار دەکەینەوە.
وەزارەتی سامانە سروشتییەكان و وەزارەتی كارەبا لەمیانی راگەیەندراوێكدا، ئاشکرایانکرد "زۆربەی كێشە تەكنییەكانی داناگاز چارەسەر كراوە و هەر کاتێک دەست گواستنەوەی گازی سرووشتی بۆ وێستگەکانی کارەبا كرا، هاوڵاتییانی كوردستان ئاگادار دەكەینەوە".
ئاماژە بەوەشداراوە، ئەمڕۆ تیمێکی هەردوو وەزارەتی سامانە سروشتییەکان و وەزارەتی كارەبا بە سەرپەرشتیی بریکاری وەزارەتی سامانە سروشتییەكان و وەزارەتی كارەبا و بە ئامادەبوونی بەڕێوەبەرانی گشتیی دیوانی وەزارەت و بەرهەمهێنانی كارەبا و كۆنترۆڵی كارەبای هەرێم و راوێژكاری ئابووری لەگەڵ بەرپرسانی کۆمپانیای داناگاز سەرقاڵی چارەسەرکردنی کێشە تەکنیکییەکانی بەرهەمهێنان بوون، کە زۆربەیان كێشەكان بەرەو چارەسەرکردن چووە، بۆ ئەوەی بە زووترین کات دەست بە پرۆسەی بەرهەمهێنانی گازی سروشتی بکرێتەوە بۆ وێستگەكانی بەرهەمهێنانی كارەبا.
هەردوو وەزارەتەکە ئەوەشیان خستووەتە روو، هەر بە دەستپێکردنی بەرهەمهێنانی گاز راستەوخۆ بۆ وێستگەکانی کارەبا دەگوازرێتەوە و هاوڵاتییانی کوردستان لە هەر پێشوەچوونێکی پرۆسەکە ئاگادار دەکەنەوە.