هەرێم نیوز
سەرۆكی حكومەت رایگەیاند، لەدوای ئامادەکارییە تەکنیکییەکان، لەگەڵ کۆمپانیای دانا گاز گەیشتینە ڕێککەوتن بۆ دوبارە دەستپێکردنەوەی بەرهەمهێنان و گەڕاندنەوەی کارەبا لە چەند کاتژمێری داهاتودا. دەشڵێت، "دڵنیام داوەتە هەمو هەوڵێک دەدەین بۆ کۆتاییهێنان بە هێرشە تیرۆریستییەکان و لەگەڵ سەرۆك وەزیرانی عێراقیش باسمان لەوەکردوە کە دەبێت ئەنجامدەرانی ئەم هێرشە دەبێت لێپرسینەوەیان لەگەڵدا بکرێت".
مەسرور بارزانی، سەرۆکی حکومەتی هەرێمی کوردستان، ئەمشەو لە ڕاگەیەندراوێكدا بڵاویكردەوە، ئەمڕۆ لەدوای ئامادەکارییە تەکنیکییەکان، لەگەڵ کۆمپانیای دانا گاز گەیشتینە ڕێککەوتن بۆ دوبارە دەستپێکردنەوەی بەرهەمهێنان و گەڕاندنەوەی کارەبا لە چەند کاتژمێری داهاتودا. لەگەڵ بەڕێوەبەرایەتی کۆمپانیاکە قسەم کرد و سوپاسی بەڕێوەبەرایەتی و گشت کارمەندەکانم کرد بۆ خۆڕاگری و ئیرادەی بەهێزیان.
ئاماژەی بەوەشكرد، "دڵنیام داوەتە كۆمپانیاكە كە لەگەڵ حکومەتی فیدراڵ، هەمو هەوڵێک دەدەین بۆ کۆتاییهێنان بە هێرشە تیرۆریستییەکان و بەسزاگەیاندنی ئەنجامدەرانی هێرشەکە و لەگەڵ هاوبەشە نێودەوڵەتییەکانمان کار دەکەین لە پێناو دابینکردنی پێداویستییەکانی پاراستنی گەلەکەمان و ژێرخانی ئابوری و وەبەرهێنانمان. ئەم هێرشە نابێت بەبێ لێپرسینەوە تێپەڕێت و نابێت هێرشەکان ببنە ڕوداوی ئاسایی".
مەسرور بارزانی باسی لەوەشكردوە، "لەگەڵ محەممەد شیاع سودانی باسمان لەوەکردوە کە دەبێت ئەنجامدەرانی ئەم هێرشە هەر لایەن و گروپێک بن و لە هەر کوێ بن لێپرسینەوەیان لەگەڵدا بکرێت و ڕادەستی یاسا بکرێن. ئەوە تاکە ڕێگرییە و چاوەڕوانین ڕێوشوێنی جیددی و کردارەکی بگیرێتەبەر. چونکە عێراق ناتوانێت وەبەرهێنانی بیانی بۆ خۆی ڕابکێشێت لە کاتێکدا میلیشیا و گروپە چەکدارییە لە یاسا دەرچوەکان و مافیا گەندەلەکان بە بێ هیچ سزا و لێپێچینەوەیەک، هێرش بکەنە سەر ژيرخانی ئابوری وڵات و دڵیان بە ئازاری خەڵکی کوردستان خۆش بکەن".
سەرۆكی حكومەتی هەرێم وتیشی، دوپاتی دەکەینەوە كە ئەم هێرشە ترسنۆکانە لە باشترکردنی ژیانی هاوڵاتیان نامانوەستێنن. ئێمە بەردەوام دەبین لە کارکردن و درێژەدان بە کاروانی پێشکەوتن و ئاوەدانی و داوا لە خەڵکی کوردستان دەکەم بەردەوام بن لە پشتگیریکردنی حکومەتەکەیان.
ئەوە لەكاتێكدایە كە دره‌نگانی شه‌وی 26ی (تشرینی دوه‌م/11)ی 2025 دو هێرشكرایه سه‌ر كێڵگه‌ی غازی كۆرمۆر به‌ڵام یه‌كێك له هێرشه‌كان ئامانجه‌كه‌ی نه‌پێكا و هێرشه‌كه‌ی دیكه‌شیان كۆگایه‌كی غازی كردوه‌ته ئامانج و ئاگرێكی گه‌وره‌ی لێكه‌وته‌وه، كە سەر ئەنجام بوە هۆی زیانێكی زۆر بە تۆڕی كارەبای هەرێمی كوردستان.
دوای ڕوداوەكە كۆمپانیای دانه‌غازی ئیماراتی له ڕاگه‌یه‌ندراوێكدا كه وێنه‌یه‌كی تایبه‌ت بۆ خه‌ندان نێردراوه، ڕایگه‌یاند، "یەکێک لە تانکی هەڵگرتنی غازی شل (LPG) لە دامەزراوەی كۆرمۆر لە هەرێمی کوردستان بەهۆی هێرشی موشەکەوە ئاگرێكی گه‌وره كه‌وتوه‌ته‌وه".