هەرێم نیوز
ڕووسیا هێرشی ئەمریکای بۆ سەر دامەزراوە ئەتۆمییەکانی ئێران "بە توندی ئیدانە" کرد. وەزیری دەرەوەی ئێرانیش سەردانی ڕووسیا دەکات و لەگەڵ پوتین کۆدەبێتەوە.
وەزارەتی دەرەوەی ڕووسیا لە بەیاننامەیەکدا ڕایگەیاند: بڕیاری نابەرپرسیارانە بۆ بەئامانجگرتنی خاکی دەوڵەتێکی خاوەن سەروەری بە مووشەک و بۆمب، بەبێ گوێدانە هەر پاساوێک، پێشێلکارییەکی ڕوونی یاسا نێودەوڵەتییەکان و میساقی نەتەوە یەکگرتووەکان و بڕیارنامەکانی ئەنجومەنی ئاسایشی نەتەوە یەکگرتووەکانە، داوای کۆتاییهێنان بەو دەستدرێژییە دەکەین و هەوڵەکان بەهێزتر بکەین بۆ ئەوەی هەلومەرجی پێویست بۆ گەڕاندنەوەی دۆخەکە بۆ ڕێبازێکی سیاسی و دیپلۆماسی.
هەروەها ئاندرێ کلیمۆڤ، جێگری سەرۆکی لیژنەی کاروباری دەرەوەی ڕووسیا، وتی: جیهان لە پلیکانەی گرژییەکاندا پلەیەکی دیکە بەرەو سەرەوە ڕۆیشتووە، دەستێوەردانی ڕاستەوخۆی سەربازیی ئەمریکا لەم ململانێیە، بە فەرمی و ئاشکرا، جۆرێک لە کاردانەوەی زنجیرەیی بەدوای خۆیدا دەهێنێت.
عەباس عێراقچی وەزیری دەرەوەی ئێران ئەمڕۆ گەشتی بۆ مۆسکۆ دەکات و ڕایگەیاند، کە لەم گەشتەدا لەگەڵ ڤلادیمێر پوتین سەرۆکی ڕووسیا کۆدەبێتەوە.
عێراقچی وتی، لە میانی کۆبوونەوەکەدا "ڕاوێژکاری جددی" ئەنجام دەدات.
ڕووسیا یەکێکە لەو وڵاتە کەمانەی هاوشانی چین و میسر کە بە ڕاشکاوی هێرشەکانی ئەمریکا بۆ سەر ئێران ئیدانە دەکات.
پێشتر کرێملین و پەکین هێرشی ئیسرائیلیان بۆ سەر ئێران سەرکۆنە کردبوو.
لە سەرەتای ئەمساڵدا ڕوسیا و ئێران پەیماننامەی هاوپەیمانی ستراتیژییان واژۆکرد، لە بڕگەی یەکەمیدا جەخت لەسەر هاوکاری سەربازی و ئەمنی دەکاتەوە بەڵام ڕووسیا پابەند ناکات بە چوونە ناو شەڕەوە لە ئەگەری هێرشکردنە سەر ئێران.