هەرێم نیوز
بەپێی ئەو خشتەیەی لەلایەن وەزارەتی دارایی و ئابووریی هەرێمی کوردستانەوە بڵاو کرایەوە، ئەمڕۆ یەکشەممە، ١١ی تشرینی یەکەمی ٢٠٢٦، پرۆسەی دابەشکردنی مووچەی مانگی ئەیلوولی فەرمانبەران و مووچەخۆرانی هەرێمی کوردستان دەست پێ دەکات و لە ماوەی چوار ڕۆژدا کۆتایی پێ دێت.
خستنەسەرهەژماری تەمویلی مووچە و بڕەکەی
ڕۆژی پێنجشەممە، ٨ی تشرینی یەکەمی ٢٠٢٦، وەزارەتی دارایی و ئابووریی حکوومەتی هەرێمی کوردستان لە ڕاگەیەندراوێکدا ئاشکرای کرد، بڕی ٨٣٥ ملیار و ٥٥٣ ملیۆن دینار وەک تەمویلی مووچەی مانگی ئەیلوولی فەرمانبەران و مووچەخۆرانی هەرێم خرایە سەر هەژماری بانکیی وەزارەت لە لقی هەولێری بانکی ناوەندیی عێراق.
لە ڕاگەیەندراوەکەدا باس لەوە کرابوو کە هاوشێوەی چەند مانگی ڕابردوو، وەزارەتی داراییی فیدراڵ بڕی ١٢٠ ملیار دیناری وەک پشکی گەنجینەی فیدراڵی لە داهاتی نانەوتیی هەرێم بۆ مانگی ئەیلوول لە کۆی تەمویلی مووچە بڕیوە.
هەروەها بڕی ٤ ملیار و ٩٦١ ملیۆن دیناری لە تەمویلی مووچەی مانگی ئەیلوول نەناردووە کە بریتییە لە شایستەی مووچەی مانگەکانی ڕابردووی خانەنشینانی شارستانی و سەربازی.
دۆخی بەشداربووانی پرۆژەی "هەژماری من"
بەگوێرەی داتاکانی پرۆژەی "هەژماری من"، زیاتر لە ١,٠٠٠,٠٠٠ هاووڵاتی لە پرۆژەکەدا تۆمار کراون، خاوەنی کارتی بانکین و مووچەکانیان بە شێوەی دیجیتاڵی وەردەگرن.
هاوکات زیاتر لە ٧٥٠ ئامێری ڕاکێشانی پارە (ATM) لە سەرانسەری هەرێمی کوردستان دانراون بۆ ئەوەی مووچەخۆران بە ئاسانی پارەکانیان لێوە ڕاکێشن.