هەرێم نیوز

دۆناڵد ترەمپ، سەرۆکی ئەمریکا، گەشبینی خۆی بۆ گەیشتن بە ڕێککەوتن لەگەڵ ئێران نیشان دەدات، بەڵام هاوکات گوشارە ئابوورییەکانی بۆ سەر تاران لە لوتکەدا هێشتووەتەوە.

دۆناڵد ترەمپ لە ناو فڕۆکەی سەرۆکایەتی (Air Force One) ڕایگەیاند، واشنتن گفتوگۆی زۆر باشی لەگەڵ ئێرانییەکان ئەنجامداوە. ترەمپ دەڵێت: "هەست دەکەم تاران دەیەوێت بگاتە ڕێککەوتن" و ئاشکرایشی کرد کە سەرەتای هەفتەی داهاتوو خولێکی تری کۆبوونەوەکان دەستپێدەکەنەوە.

سەرەڕای گەشبینییەکان، واشنتن ستراتیژی "گوشاری زۆرینە" پەیڕەو دەکات. هاوکات لەگەڵ گفتوگۆکان، سزای نوێ بەسەر کەرتی نەوتی ئێراندا سەپێنرا کە:
• ١٥ قەوارەی ئابووری گرتووەتەوە.
• ١٤ کەشتی گواستنەوەی نەوتی خستووەتە لیستی ڕەشەوە.
عەباس عێراقچی، وەزیری دەرەوەی ئێران، کەشوهەوای گفتوگۆکانی بە "ئەرێنی" ناوبرد، بەڵام بە توندی هێڵە سوورەکانی تارانی دووپاتکردەوە:
• گفتوگۆ تەنها لەسەر پرسی ئەتۆمییە.
• تاران ئامادە نییە هیچ پرسێکی تر (وەک مووشەک و هەژموونی ناوچەیی) لەگەڵ ئەمریکییەکان تاووتوێ بکات.

ئەم هەڵوێستەی ئێران ڕێک پێچەوانەی داواکارییەکانی مارکۆ ڕوبیۆ، وەزیری دەرەوەی ئەمریکایە، کە پێداگری دەکات هەر ڕێککەوتنێک دەبێت سێ تەوەری سەرەکی بگرێتەوە:
١. بەرنامەی مووشەکی بالیستی.
٢. پاڵپشتی گروپە چەکدارەکان لە ناوچەکە.
٣. دۆخی مافی مرۆڤ لە ناوخۆی ئێران.

لە کاتێکدا میدیا فەرمییەکان باس لە دانوستانی "ناڕاستەوخۆ" دەکەن، پێگەی "ئەکسۆس" ئاشکرای کردووە کە گفتوگۆی ڕاستەوخۆ لە نێوان عەباس عێراقچی و وەفدێکی باڵای ئەمریکی (بە بەشداری جارید کۆشنەر و ستیڤ ویتکۆف) ئەنجامدراوە، کە ئەمەش ئاماژەیە بۆ جدییەتی هەردوولا بۆ شکاندنی بەستەڵەکی پەیوەندییەکان.