هەرێم نیوز
هاوکات لەگەڵ بەڕێوەچوونی دانوستانە ئەتۆمییەکان لە عومان، جەنەڕاڵ عەبدولڕەحیم موسەوی، سەرۆکی ئەرکانی هێزە چەکدارەکانی ئێران، پەیامێکی توندی ئاراستەی ئەمریکا و هاوپەیمانەکانی کرد و هۆشداریی لە "زیانی قەرەبوو نەکراوە" دا.
جەنەڕاڵ موسەوی لە لێدوانێکدا کە ئاژانسی "فارس" بڵاویکردووەتەوە، ڕایگەیاند: "هەر جووڵەیەک کە دوژمن دژی ئێران ئەنجامی بدات، تاجی شکستی دڵنیای لەسەر دادەنرێت." ئەو جەختی کردەوە کە هەر شەڕێک بەسەر ئێراندا بسەپێنرێت، تەنها لە سنووری ئێران نامێنێتەوە و "درێژدەبێتەوە بۆ ئەوەی تەواوی ناوچەکە بگرێتەوە."
سەرۆکی ئەرکانی هێزە چەکدارەکانی ئێران دڵنیایی دا کە هێزەکانیان لە بەرزترین ئاستی ئامادەییدان و گوتی:
• هێزی ئاسمانی بە هەماهەنگی تەواو لەگەڵ سوپا و سوپای پاسداران ئامادەیە.
• وەڵامەکەمان بۆ هەر دەستدرێژییەک "یەکلاکەرەوە، خێرا و کاریگەر" دەبێت.
• زیانێکی قورس بە "پلاندانەران و لایەنگرانی" هەر هێرشێک دەگەیەنین.
موسەوی ئاماژەی بەوە کرد کە کۆماری ئیسلامی "هەرگیز شەڕ دەستپێناکات"، بەڵام هۆشداریشی دا کە بۆ چرکەیەکیش درێغی ناکەن لە بەرگریکردن لە ئاسایشی نەتەوەیی و یەکپارچەیی خاکی وڵاتەکەیان.