هەرێم نیوز
لەگەڵ هەڵکشانی ئاستی گرژییەکانی نێوان واشنتۆن و تاران، دۆسێی ئەتۆمی ئێران دەچێتە قۆناغێکی چارەنووسساز و پڕ لە مەترسی. دۆناڵد ترەمپ، سەرۆکی ئەمریکا، لە نێوان بژاردەی دەستوەردانی سەربازی بۆ کۆنتڕۆڵکردنی ماددە ئەتۆمییەکان و ترسی پەککەوتنی گەرووی هورمزدا، تا ئێستا بڕیاری کۆتایی نەداوە.
مەتەڵی ٤٠٠ کیلۆگرام یۆرانیۆمە "ونبووەکە"
دوای ئەوەی ئاژانسی نێودەوڵەتی وزەی ئەتۆمی ئاشکرای کرد کە چارەنووسی نزیکەی ٤٠٠ کیلۆگرام یۆرانیۆمی پیتێنراو نادیارە، زەنگی مەترسی لە واشنتۆن لێدرا. ئەم بڕە یۆرانیۆمە دوای هێرشەکانی هاوینی ڕابردوو بۆ سەر سێ پێگەی ئەتۆمی لە ناوخۆی ئێران بێسەروشوێن بووە، ئەوەش ترسی ئەوەی لای ئەمریکییەکان دروست کردووە کە بکەوێتە دەست گروپە توندڕەوەکان یان بۆ مەبەستی سەربازیی نهێنی بەکاربهێنرێت.
دوو بەربەست لە بەردەم ترەمپدا
هەرچەندە تڕەمپ پێیوایە هێزە ئاسمانی و دەریاییەکانی ئێران بەهۆی ململانێکانەوە لاواز بوون، بەڵام دوو هۆکار وایان کردووە واشنتۆن بە وریاییەوە هەنگاو بنێت:
چەکی "مینڕێژکردن": تاران هەڕەشەی مینڕێژکردنی گەرووی هورمز دەکات، کە ئەمە نەک تەنها جووڵەی کەشتیگەلە نێودەوڵەتییەکان پەکدەخات، بەڵکو گورزێکی کوشندە لە ئابووری جیهان دەوەشێنێت.
فەوزای بڕیاردان لە ئێران: تڕەمپ دۆخی ناوخۆی ئێرانی بە "فەوزا" ناوبردووە و پێیوایە ناسنامەی بڕیارماندەری سەرەکی لە تاران ڕوون نییە، ئەمەش مامەڵەکردنی سیاسی و سەربازیی ئاڵۆزتر کردووە.
ئایا بژاردەی سەربازی کارایە؟
لە کاتێکدا کۆشکی سپی جەخت دەکاتەوە کە بژاردەی کۆنتڕۆڵکردنی دامەزراوە ئەتۆمییەکان "لەسەر مێزە"، رافائیل گڕۆسی، بەڕێوەبەری ئاژانسی نێودەوڵەتی وزەی ئەتۆمی، گومانی خۆی نیشان دەدات. گڕۆسی پێیوایە بەهۆی دابەشبوونی بەرنامە ئەتۆمییەکە بەسەر چەندین تاقیگە و تونێلی قووڵ لە ناوچە جیاوازەکاندا، لەناوبردنی تەواوەتی ئەو بەرنامەیە لە ڕێگەی سەربازییەوە کارێکی ئەستەمە.
ئامارێکی مەترسیدار: بەپێی ڕاپۆرتە هەواڵگرییەکان، تەنها لەم ماوەیەی دواییدا ١٥ هێرش کراوەتە سەر کەشتییە بازرگانییەکان لە ناوچەکەدا، ئەمەش تڕەمپی ناچار کردووە داوای پێکهێنانی "هاوپەیمانییەکی نێودەوڵەتی" بکات بۆ پاراستنی ڕێڕەوە ئاوییەکان.
سیناریۆ چاوەڕوانکراوەکان
ناوچەکە لەبەردەم دوو ڕێگای جیاوازدایە:
یەکەم: ئەنجامدانی هێرشێکی سەربازیی بەرفراوان بۆ سەر دڵی دامەزراوە ئەتۆمییەکان کە ڕەنگە ناوچەکە بەرەو جەنگێکی گشتگیر ببات.
دووەم: گەڕانەوە بۆ مێزی دیپلۆماسی و دۆزینەوەی ڕێگەچارەیەکی سیاسی دوای ساردبوونەوەی جەنگەکان.