هەرێم نیوز

نێچیرڤان بارزانی سەرۆکی هەرێمی کوردستان پەیامێکی بەبۆنەی جەژنی نەورۆزەوە بڵاوکردەوە و تێیدا داوای پاراستنی قەوارەی هەرێم و دوورخستنەوەی عێراق لە مەترسییەکانی جەنگ دەکات.

ئەمڕۆ هەینی 20ی ئاداری 2026 نێچیرڤان بارزانی سەرۆکی هەرێمی کوردستان پەیامێکی فەرمیی بۆ هاتنی جەژنی نەورۆز و سەری ساڵی کوردی ئاراستەی خەڵکی کوردستان کرد.

لە سەرەتای پەیامەکەیدا سەرۆکی هەرێم بە گەرمی پیرۆزبایی ئەم جەژنەی لە تەواوی خەڵکی کوردستان و خێزانی شەهیدان و پێشمەرگە و هێزە ئەمنییەکان کردووە.

نێچیرڤان بارزانی ئاماژەی بەوە کردووە کە نەورۆز گوزارشتێکی قووڵە لە مێژوویەکی پڕ لە تێکۆشان و داستانەکانی خۆڕاگریی نەتەوەیەک کە هەمیشە ڕووبەڕووی ستەم بووەتەوە.

ناوبراو ڕوونی کردووەتەوە کە ئاگری نەورۆز بانگەوازێکی بەردەوامە بۆ کۆڵنەدان و ڕووبەڕووبوونەوەی ئاڵنگارییەکان و بەهێزکردنی تەبایی و پێکەوەیی.

هەر بۆیە جەختی لەوە کردووەتەوە کە دەبێت بە ئیرادەیەکی نەورۆزییانە دەستکەوتە دەستوورییەکان بپارێزرێن و قەوارەی سیاسیی هەرێمی کوردستان بەهێز بهێڵرێتەوە.

لە بەشێکی دیکەی پەیامەکەیدا سەرۆکی هەرێم هۆشداریی داوە کە ناوچەکە بە دۆخێکی هەستیاردا تێدەپەڕێت و مەترسییەکانی شەڕ لە هەموو لایەکەوە دەرکەوتوون.

لەبەر ئەم هۆکارەش بە ئەرکی هەمووانی داناوە کە بە بەرپرسیارێتییەکی مێژووییەوە کار بکەن بۆ ئەوەی هەرێمی کوردستان و عێراق لەم ئاڵۆزییانە بەدوور بگرن.

سەبارەت بە پەیوەندییەکانیش لەگەڵ بەغدا دووپاتی کردووەتەوە کە هەماهەنگیی زیاتر و جێبەجێکردنی دەستوور تاقە گەرەنتییە بۆ عێراقێکی بەهێز و سەقامگیر.
سەرۆکی هەرێمی کوردستان داواشی لە هاووڵاتییان کردووە لە کاتی گەشت و سەیراندا بەوپەڕی وریاییەوە ڕەچاوی سەلامەتیی خۆیان و خێزانەکانیان بکەن.

لە کۆتایی پەیامەکەشیدا نێچیرڤان بارزانی داوای لە خەڵک کردووە پابەندی ڕێنماییەکانی هاتوچۆ بن و پاراستنی ژینگە و سروشتی کوردستان وەک ئەرکێکی نیشتمانی جێبەجێ بکەن.

دەقی پەیامەکەی سەرۆکی هەرێمی کوردستان :

گەلی کورد و كوردستانيیانى ئازیز لە هەر کوێی جیهان بن،

بە گەرمی و لە ناخی دڵەوە، جەژنی نەورۆزی نەتەوەیی و سەری ساڵی نوێی کوردی لە ئێوە و لە خێزانی سەربەرزی شەهیدان، پێشمەرگە قارەمانەکان و تەواوی هێزە ئەمنییەکان پیرۆز دەکەم. هیوادارم ئەم جەژنە ببێتە مایەی ئارامی، ئاسوودەیی و کامەرانی بۆ هەمووان.

نەورۆز گوزارشتێکی قووڵە لە مێژوویەکی پڕ لە تێکۆشان و داستانەکانی خۆڕاگریی نەتەوەیەک کە هه‌ميشه‌ به‌ ئيراده‌يه‌كى به‌هێزه‌وه‌ به‌ره‌نگارى ستەم بووه‌ته‌وه‌ و هه‌رگيز ڕاده‌ست نه‌بووه‌. نەورۆز هێمای تێکشکانی تاریکی و نوێبوونەوەی ژیانە، ئەو ڕاستییەى مێژووە کە دەیسەلمێنێت هیچ هێز و چەکێک ناتوانێت گڕی ئازادیخوازی لە ناخی کورددا بکوژێنێتەوە.

ئەمڕۆش ئاگری نەورۆز بۆ ئێمە بانگەوازێکی بەردەوامە بۆ كۆڵنه‌دان، بۆ ڕووبه‌ڕووبوونه‌وه‌ى ئاڵنگارييه‌كان، بۆ ته‌بايى و پێكه‌وه‌يى. گوڕ و تينى به‌هێزمانه‌ بۆ ئه‌وه‌ى بە ئیرادەيه‌كى نەورۆزییانە، دەستکەوتە دەستوورییەکانمان بپارێزین و فيدراڵى و قەوارەی سیاسیی هەرێمی کوردستان وەک بەرهەمی خوێنی شەهیدان و خەباتی ساڵه‌هامان، پته‌و و به‌هێز بهێڵینەوە.

ئەمساڵ لە کاتێکدا پێشوازی لە بەهار و نەورۆز دەکەین، ناوچەکەمان بە دۆخێکی هەستیار و ئاڵۆزدا تێدەپەڕێت. مەترسییەکانی شەڕ و لێكه‌وته‌كانى لە هەموو لایەکەوە ده‌رده‌كه‌ون. بۆیە ئەرکی هەموومانە بە بەرپرسیاريه‌تیى مێژووییەوە کار بکەين تاکوو هەرێمی کوردستان و عێراق لەم ئاڵۆزییانە بەدوور بگرین. ئاشتی و ئاشتیخوازی؛ گەورەترین هێزی ئێمەن و تەنیا لە سایەی سەقامگیریدا دەتوانین داهاتوويه‌كى باشتر بنيات بنێين.

لە پەیوەندیمان لەگەڵ حکوومەتی فیدراڵیی عێراقدا، وێڕاى دەستخۆشی له‌ هه‌ر هه‌نگاوێكى ئه‌رێنى، دووپاتی دەکەینەوە کە له‌م دۆخه‌دا هاريكارى و هه‌ماهه‌نگيى زياترى هه‌ولێر ـ به‌غدا و جێبەجێکردنی ڕاستەقینەی دەستوور و سیستەمی فیدراڵی و پاراستنی مافی هەموو پێکهاتەکان، تاقە گەرەنتییە بۆ عێراقێکی بەهێز و سەقامگیر. ئێمە لە هەرێمی کوردستان وەک هەمیشە فاکتەری ئارامی و سه‌قامگيرى دەمێنینەوە و دەستی لێكگه‌يشتن و دۆستایەتی بۆ هەمووان درێژ دەکەین.

هاووڵاتييانى خۆشه‌ويستى كوردستان،

داواتان لێ دەکەم لە کاتی گەشت و سەیراندا، بەوپەڕی وریاییەوە ڕەچاوی سەلامەتیی خۆتان و خێزان و ئازیزانتان بكه‌ن. بەتایبەتى لەم ڕۆژگارەدا کە ناوچەکەمان بە دۆخێکی ئاڵۆز و پڕ لە لێکەوتەی مەترسیداری شەڕدا تێدەپەڕێت، پێویستە هەمووان زياتر ئاگادارى خۆتان بن.

ده‌بێ پابەندی ڕێنمایییەکانی هاتوچۆ و لایەنە پەیوەندیدارەکان بن، تاکوو ئەم جەژنە بە ئارامى و سەلامەتی بكه‌نه‌وه‌ و هیچ ناخۆشییەک یادی نەورۆزمان لێ تاڵ نەکات. پاراستنی ژینگە و سروشتی جوانی کوردستان، ئەرکێکی نیشتمانی و نیشانەی شارستانیبوونی ئێمەیە و ده‌بێ پابه‌ندى بين.

نەورۆز لە هەموو ئەو گەلانەش پیرۆز بێت کە ئەم یادە دەکەنەوە. خواى مه‌زن ئێوه‌ هه‌مووتان و گه‌ل و نيشتمانمان بپارێزێت و ئاشتى و ئارامى و دڵنيايى؛ باڵ به‌سه‌ر ناوچه‌كه‌مان و ته‌واوى مرۆڤايه‌تيدا بكێشێت.

جەژنتان پیرۆز، هەموو ساڵێک بە خۆشى و كامه‌رانى.