هەرێم نیوز
وەزارەتی دەرەوەی ئەمریکا لە پەیامێکی توند و بێپێشینەدا، داوا لە حکومەتی عێراق دەکات دەستبەجێ ئەو گروپە چەکدارانەی سەر بە ئێرانن هەڵبوەشێنێتەوە، هۆشداریش دەدات کە چیتر لە ئاست هێرشەکان بێدەنگ نابن.
کۆتاییهێنان بە دەسەڵاتی دەرەوەی یاسا:
وەزارەتی دەرەوەی ئەمریکا جەختی کردووەتەوە کە پاراستنی سەروەریی عێراق تەنیا بە دوو هەنگاو دەبێت؛ یەکەم، هەڵوەشاندنەوەی ئەو گروپانەی لە دەرەوەی یاسا کار دەکەن. دووەم، ڕێگریکردن لەوەی خاکی عێراق بۆ هێرشکردنە سەر بەرژەوەندییەکانی ئەمریکا و ناسەقامگیرکردنی ناوچەکە بەکاربهێنرێت.
هەڕەشەی ڕێوشوێنی "یەکلاکەرەوە":
واشنتن لە پەیامەکەیدا هۆشداری دەدات کە چیتر دانبەخۆداگرتن نابێت و ڕێوشوێنی یەکلاکەرەوە دژی ئەو گروپانە دەگرێتەبەر کە پلانی هێرشکردن بۆ سەر کارمەند و دامەزراوەکانیان دادەنێن. هەروەها هەڕەشەی ئەوەشی کردووە کە هەر لایەنێکی سیاسی یان کەسایەتی پشتیوانی ئەم میلیشیایانە بکات، ڕووبەڕووی لێکەوتەی زۆر سەخت دەبێتەوە.
هاوکات لەگەڵ سزادانی ٧ سەرکردە:
ئەم هۆشدارییانەی وەزارەتی دەرەوە ڕێک دوای ئەوە دێن کە وەزارەتی گەنجینەی ئەمریکا سزای بەسەر حەوت سەرکردەی دیاری میلیشیاکاندا سەپاند، کە تۆمەتبارن بە تێکدانی سەروەریی عێراق و هەڕەشەکردن لە ژیانی هاووڵاتیان.
فشار لەسەر لایەنە سیاسییەکان:
ئەم پەیامە ڕاستەوخۆیەی ئەمریکا، فشارێکی گەورە دەخاتە سەر هێزەکانی "چوارچێوەی هەماهەنگی" کە ئێستا خەریکی دانوستانی پێکهێنانی حکومەتی نوێن. ئەمریکا دەیەوێت بە بەغدا بڵێت؛ سەقامگیری و ئاوەدانیی عێراق تەنیا بە کۆتاییهێنان بە "دەسەڵاتی چەکداریی دەرەوەی یاسا" بەدی دێت.