هەرێم نیوز
سەرۆکی ئەنجومەنی نوێنەرانی عێراق لە دیمانەیەکی تەلەفزیۆنیی عەرەبیدا، ڕوانگەی لوتکەی دەسەڵاتی یاسادانانی سەبارەت بە هەڵمەتە توندەکەی دژە گەندەڵی و دۆسیەی چەکی دەرەوەی یاسا خستە ڕوو، و بڕیارەکانی ئەم دواییەی بە وەرچەرخانێکی مێژوویی ناو برد.
ڕێککەوتنی سێ سەرۆکایەتییەکە بۆ کۆتایهێنان بە پارێزبەندی
ئەمڕۆ چوارشەممە ١ی تەممووزی ٢٠٢٦، هەیبەت حەلبوسی، سەرۆکی پەرلەمانی عێراق لە چاوپێکەوتنێکی ڕاستەوخۆدا لەگەڵ کەناڵی "العربیة/الحدث" ڕایگەیاند: "ئەو زانیاری و داتایانەی لە فایەق زێدان، سەرۆکی ئەنجومەنی باڵای دادوەرییەوە بیستوومانە سەبارەت بە قەبارەی ڕاستەقینەی گەندەڵی لە ناو جومگەکانی دەوڵەتدا، کارەساتاوییە."
سەرۆکی پەرلەمان هێڵی کۆتایی بۆ پاراستنی بەرپرسە تۆمەتبارەکان کێشا و جەختی کردەوە: "چیدی هیچ جۆرە پارێزبەندییەک لەبەردەم یاسادا بۆ گەندەڵکاران بوونی نییە؛ هەموو ئەو پەرلەمانتارانەی کە ناویان تێوەگلاوە یان تۆمەتبارن بە گەندەڵی، دەبێت بێ هیچ دواکەوتنێک لە بەردەم دەسەڵاتی دادوەریدا ئامادە ببن." حەلبوسی ئاشکرای کرد کە هەر سێ سەرۆکایەتییەکەی عێراق (کۆمار، وەزیران و پەرلەمان) لەسەر میکانیزمی هاوبەشی هەڵگرتنی خێرای پارێزبەندی لەسەر پەرلەمانتارە گەندەڵەکان ڕێککەوتوون، و ئەم هەنگاوە دەستە جەمعییەشی بە بڕیارێکی مێژوویی وەسف کرد.
کۆکردنەوەی چەک و ڕووبەڕووبوونەوەی گروپە یاخیبووەکان
سەبارەت بە دۆسیەی ئەمنی و پرسی کۆکردنەوەی چەک لە دەستی دەوڵەتدا، هەیبەت حەلبوسی ڕوونکردنەوەی دا و ڕایگەیاند کە پرەنسیپی سەرەکیی کۆکردنەوەی چەک بە تەواوی لەگەڵ سەرکردەی هێزە سیاسییە سەرەکییەکانی عێراقدا ڕێککەوتنی لەسەر کراوە.
سەرۆکی پەرلەمان ئاماژەی بەوەش کرد، کە هەر سێ سەرۆکایەتییەکە گەیشتوونەتە بڕیاری کۆتایی بۆ ڕەتکردنەوە و قبوڵنەکردنی چالاکیی هەر گروپ و قەوارەیەکی چەکدار کە لە دەرەوەی کۆنترۆڵ و چوارچێوەی فەرمیی دەوڵەتدا کاربکات. دووپاتیشی کردەوە کە عەلی زەیدی، سەرۆک وەزیرانی عێراق و فەرماندەی هێزە چەکدارەکان، دەستی کراوەیە و ڕێوشوێنی توندی یاسایی و سەربازی دژ بەو گروپانە دەگرێتەبەر کە دانانی چەک و ملکەچبوون بۆ یاسا ڕەت دەکەنەوە.