هەرێم نیوز
بەڕێوەبەرایەتیی نەوت و کانزاکانی هەولێر ڕایگەیاند، لە چوارچێوەی هەڵمەتە بەردەوامەکانیان بۆ چاودێریکردنی بازاڕ و جۆری سووتەمەنی، ٢٠ بەنزینخانەیان لە ناوەندی شاری هەولێر داخستووە.
ئەمڕۆ یەکشەممە، 26ـی 7ـی 2026، بەپێی ڕاگەیەندراوێکی فەرمیی بەڕێوەبەرایەتیی نەوت و کانزاکانی هەولێر، بڕیاری داخستنی ئەو بەنزینخانانە دوای ئەوە هاتووە کە پشکنینەکان دەریانخستووە بەنزینی کوالێتی خراپ و ناتەندروستیان بە هاووڵاتییان فرۆشتووە، کە ئەوەش پێچەوانەی ڕێنمایی و ستانداردە دیاریکراوەکانی وەزارەتی سامانە سروشتییەکانە.
بەڕێوەبەرایەتیی نەوت و کانزاکانی هەولێر ئاماژەی بەوەش کرد، ئەم ڕێکارە یاساییانە لە پێناو پاراستنی سەلامەتیی ئۆتۆمبێلی هاووڵاتییان و ڕێگریکردن لە هەر جۆرە فێڵێکی بازرگانی ئەنجام دراون.
جەختیشی کردەوە کە تیمەکانی پشکنین لە بەدواداچوونەکانیان بەردەوام دەبن و ڕێکاری یاسایی توند بەرامبەر هەر خاوەن بەنزینخانەیەک دەگرنە بەر کە پابەندی مەرجەکانی کوالێتی نەبێت.