هەرێم نیوز
وەزارەتی دارایی و ئابووریی حکوومەتی هەرێمی کوردستان ڕێنماییەکی نوێی بۆ دیاریکردنی کەمترین مووچەی خانەنشینیی کرێکارانی کەرتی تایبەت دەرکرد و بڕەکەی بە ٥٠٠ هەزار دینار جێگیر کرد.
وردەکاریی ڕێنماییەکە و مەرجەکانی خانەنشینی
بەپێی ڕێنمایی ژمارە ٦ی ساڵی ٢٠٢٦ی وەزارەتی دارایی و ئابووری کە واژۆی ئاوات جەناب نووری، وەزیری دارایی لەسەرە، بڕیار درا کەمترین مووچەی مانگانەی خانەنشینی بۆ کرێکارانی کەرتی تایبەت بە بڕی ٥٠٠ هەزار دیناری عێراقی دیاری بکرێت.
وەزارەتی دارایی لە ڕێنماییەکەدا ئاماژەی بەوە دا، بەپێی یاسای خانەنشینی و دەستەبەری کۆمەڵایەتی، ئەو کەسانەی شایستەی ئەو مووچەیەن چەند مەرجێکیان بەسەردا جێبەجێ دەبێت:
•خانەنشینی بەپێی تەمەن و خزمەت: پێویستە پیاو تەمەنی ٦٠ ساڵ و ژن تەمەنی ٥٥ ساڵی تەواو کردبێت، هەروەها لانی کەم ٢٠ ساڵ خزمەتی دەستەبەرکراویان هەبێت. یانیش پیاو ٣٠ ساڵ و ژن ٢٥ ساڵ خزمەتی دەستەبەرکراوی هەبێت بێ گوێدانە تەمەن.
•پەککەوتەیی و نەخۆشیی پیشەیی: ئەو کرێکارەی بە ڕێژەی ١٠٠٪ تووشی نەخۆشیی پیشەیی دەبێت بەپێی ڕاپۆرتی لیژنەی پزیشکی، یان بەهۆی پێکانی کارەوە تووشی پەککەوتەیی تەواو دەبێت یان گیان لەدەست دەدات، شایستەی ئەو مووچەیە دەبێت.
•کۆچی دوایی لە کاتی خزمەتدا: ئەگەر کرێکار لە ماوەی خزمەتدا گیان لەدەست بدات و ناوی لە تۆمارەکانی دەستەبەری کۆمەڵایەتیدا هەبێت، میراتگرەکانی مووچەی خانەنشینیی تەواو وەردەگرن.
کەوتنەبواری جێبەجێکردنی ئەم بڕیارە لە ڕۆژی دەرچوونیەوە دەبێت و لە ڕۆژنامەی فەرمیی (وەقایعی کوردستان) بڵاودەکرێتەوە.
پاشخان و گرنگیی بڕیارەکە
پێشخستنی کەرتی تایبەت و مسۆگەرکردنی مافی کرێکاران، یەکێکە لە بەرنامە سەرەکییەکانی کابینەی نۆیەمی حکوومەتی هەرێمی کوردستان. لە ساڵانی ڕابردوودا جیاوازییەکی زۆر لە نێوان مووچەی خانەنشینیی کەرتی گشتی و کەرتی تایبەتدا هەبوو، ئەمەش وای کردبوو گەنجان زیاتر ڕوو لە دامەزراندن لە کەرتی گشتی بکەن و کەرتی تایبەت پشتگوێ بخرێت.