دواین هەواڵ

ئابوری‌

 4 کاتژمێر پێش ئێستا

زیاتر لە ٤ مانگە نەهێڵدراوە ملیاران دۆلار نەوتی سوپای پاسداران بفرۆشرێت

هەرێم نیوز

زیاتر لە چوار مانگە، ئەمریکا گەمارۆیەکی توندی دەریایی بەسەر ئێراندا سەپاندووە و بەردەوامە لە سنووردارکردنی هاتوچۆی کەشتییەکان بۆ بەندەرەکانی ئەو وڵاتە. واشنتن هەوڵ دەدات بە بڕینی سەرچاوەکانی داهاتی نەوت، فشارە ئابوورییەکان لەسەر تاران زیاتر بکات.

ماوەی ١٣٠ ڕۆژە (زیاتر لە چوار مانگە) کەشتییە جەنگییەکانی ئەمریکا گەمارۆیەکی توندیان خستووەتە سەر بەندەر و ڕێگا ئاوییەکانی ئێران، بەو هۆیەوە ڕێگرییان لە سوپای پاسداران کردووە نەوتێک بفرۆشێت کە نرخەکەی بە ملیاران دۆلار مەزەندە دەکرێت.
فەرماندەیی سوپای ئەمریکا لە ڕۆژهەڵاتی ناوەڕاست ڕایگەیاند کە هێزەکانیان بەردەوامن لەم گەمارۆیە و ئامانجە سەرەکییەکانیان بریتییە لە:
 وشککردنی گیرفانی سوپای پاسداران: هەر کەشتییەک بیەوێت بە دزییەوە نەوتی ئێران بباتە دەرەوە، هێزەکانی ئەمریکا دەستی بەسەردا دەگرن و دەیگەڕێننەوە، چونکە واشنتن دەیەوێت چیتر سوپای پاسداران پارەی دەست نەکەوێت.
 بەستنی ڕێگاکانی وشکانی و دەریای قەزوین: ئەمریکا تەنها لە کەنداو نەوەستاوە، بەڵکو چاودێریی ڕێگا وشکانییەکان و دەریای قەزوینیش دەکات تاوەکو ئێران نەتوانێت بە قاچاخ چەک و پارە بگوازێتەوە.
 پاراستنی گەرووی هورمز: لە کاتێکدا ئێران هەوڵ دەدات ڕێگای هاتوچۆی کەشتییە بازرگانییەکان لە گەرووی هورمز بگرێت، کەشتییە جەنگییەکانی ئەمریکا پاسەوانیی کەشتییە بازرگانییەکانی جیهان دەکەن تا بە سەلامەتی تێپەڕن.
لە بەرامبەردا، ئێران دەڵێت ئەم سزا و گەمارۆیانەی ئەمریکا ناتوانن بیوەستێنن و ئەوان لە ڕێگەی وڵاتانی دراوسێوە کاروبارەکانی خۆیان بەڕێوە دەبەن.



Copyright © 2020 All Rights Reserved Designed And Developed By AVESTA GROUP