هەرێم نیوز

سەرۆکی حکومەتی هەرێمی کوردستان لە میانی بەشداریکردنی لە رێورەسمی دانانی بەردی بناغەی  سێ پرۆژەى خزمەتگوزارى لە پارێزگاى دهۆک ڕایگەیاند، لەم کابینەیەدا، هەوڵی زۆردراوە بۆ هەمەجۆرکردنی سەرچاوەکانی داهات و دۆزینەوەی هەلی کار بۆ گەنجان، دەبێت بۆ دابینکردنی ئاسایشی خۆراک پشت بە خۆمان ببەستین.

مەسرور بارزانى، سەرۆکی حکومەت، لە وتارێکدا ڕایگەیاند، "گەلەک بەختەوەرم جارێکی دیکە لە پارێزگای دهۆک و قەزای سێمێل کۆبووینەوە، بۆ دانانی بەردی بناغەی چەندین پڕۆژەی ستراتیژی و گرنگ، نەک بۆ هەر ئەو دەڤەرە، بەڵکو بۆ هەموو کوردستان، بۆ بەرەوپێشبردنی سێکتەری کشتوکاڵ و پیشەسازی خۆراک لە کوردستان و دۆزینەوەی هەلی کار بۆ چەندین گەنجی وڵاتەکەمان و هەمەجۆرکردنی سەرچاوەکانی داهات، کە ئەوە یەکێکە لە ئامانجەکانی حکومەتی هەرێمی کوردستان".

ئەوەشى خستەڕو، "ئەو پڕۆژانەی ئەمڕۆ بەردی بناغەیان دادەنرێت، بەشێکن لە پلانی حکومەتی هەرێمی کوردستان و پێشتر لە پارێزگاکانی هەولێر و سلێمان و هەڵەبجە و ئیدارە سەربەخۆکانیش پڕۆژەی هاوشێوە کراوە، دەبێت بەردەوامیش بین لەسەر ئەو پڕۆژانە، جێی شانازییە کە لەم کابینەدا گرنگی زیاتر بە هەمەجۆرکردنی سەرچاوەکانی داهات دەدرێت".

ئاماژەشى بەوەکرد، "پێویستە بگەینە ئەو ئاستەی دڵنیابین، کە ئاسایشی خۆراک لە هەرێمی کوردستان دابین ده‌کرێت  و مەترسی لەسەر ژیانی خەڵکی هەرێمی کوردستان نامێنێت، وەک دەبینین چەندین قەیران و گرفت لە دونیادا سەریانهەڵداوە و کاریگەریان لەسەر هەرێمی کوردستانیش هەیە، بۆیە پێویستە گرنگی زیاتر بە بەرهەمی ناوخۆی بدەین و پشت بە خۆمان ببەستین، نەک هەر داخوازی خەڵکی خۆمان جێبەجێ بکەین، بەڵکو ببینە سەرچاوە بۆ ناوچەکانی دیکەی رۆژهەڵاتی ناوەڕاست".

باسی لەوەشکرد، "خۆشحاڵم کە سەرکەوتن بەدەستهاتووە و لە ئایندەیەکی نزیکدا ئەنجامەکانی ئەو ئەزموونە دەردەکەون، کە دەبێتە رێگەخۆشکەر بۆ ئەوەی بەرهەمی خۆمان بنێرینە دەرەوەی وڵات و بازاڕەکانی جیهان بە بەرهەمی کوردستان ئاشنا بکەین".

روونیشكرده‌وه‌، کاتێك جووتیار بەرهەمەکەی بەرهەمدەهێنێت، کەرتی پیشەسازی و گواستنەوە و هەناردەکردنی بۆ دەرەوە، ئه‌مانه‌ هەمووی هەلی کار بۆ خەڵک دەڕەخسێنێت، کە لەو بوارانەدا کار دەکەن، بۆیە چەندین جاری دیکەش گوتومە، کشتوکاڵ بناغەی پێشخستنی ئابووری هەموو وڵاتێکە، کە هاوکات کەرتی پیشەسازیش پێشدەکەوێت.

ڕاشیگەیاند،  "پێویستە ئێمە ئامادەبین، ئەگەر قەیرانەکان بەردەوامبن؛ چۆن خۆمان بگونجێنین، بۆ ئەوەی زەرەر و زیان بەر خەڵکەکەمان نەکەوێت، وەک دەزانن شەڕ و ئاڵۆزییەکان لە جیهاندا کاریگەری کردووەتە سەر بەرزبوونەوەی نرخی سوتەمەنی و خواردن، ئەگەر دۆخی خۆمان بەراورد بکەین لەگەڵ هەندێك وڵاتی دەوروبەر و هەندێك وڵاتی جیهان، پێویستە ئەوە لەبەرچاو بگرین، حکومەتی هەرێمی کوردستان هەموو هەوڵەکانی خستووەتەگەڕ بۆ ئەوەی هەموو بارەکە نەکەوێتە سەر شانی هاووڵاتی، بۆ ئەوەش هەنگاوی پێویستمان ناوە، وەك دابەزاندنی نرخی ماددە سەرەکییەکان و داشکاندنی نرخی کارەبا بۆ ئەو کارگانەی خۆراك دروست دەکەن".

لە بەشێکی دیکەی وتارەکەیدا، مەسرور بارزانی، وتی: "داوا لە هەموو زانکۆکان و پسپۆڕەکانمان دەکەم، هاوکاری کەرتی تایبەت و گشتی و حکومەت بکەن، بۆ دۆزینەوەی رێگەی باشتری زانستی، بۆ ئەوەی چۆن خۆمان بگونجێنین لەگەڵ گۆڕانکاری کەشوهەوا، کە ئەوەش بووەتە بابەتێکی دیکە و جیهان پێیەوە سەرقاڵە، دەبێت ئێمە هەوڵبدەین و رێگەیەك بدۆزینەوە بە کەمترین ئاو بەرهەمەکانمان بەرهەمبهێنین، چونکە هەندێك ساڵ باران کەمدەبارێت یان وشکەساڵییە".

سەرۆکی حکومەتی هەرێمی کوردستان سوپاسی کەرتی تایبەتی کرد، کە لە هەموو پارێزگا و ئیدارە سەربەخۆکان هاوکاری حکومەت بوونە و حکومەتیش پشتیوانی بەردەوام بووە بۆ پاراستنی مافی ئەوان و پەرەپیدانی پەیوەندی نێوان حکومەت و کەرتی تایبەت.