حەسەن نەسروڵا سێیەم ئەمینداری گشتى حزبوڵای لوبنان لە 27ـى سێبتەمبەرى ساڵی 2024 لە لایەن هێزەکانى ئیسرائیلەوە لە باشوورى لوبنان هێرشیکرایە سەر و کوژرا، بەگوێرەى سەرچاوەکان نەسروڵا لە 16ـى شوباتى ساڵی 1992ـەوە لە کاتێکدا کە تەمەنى 32 ساڵ بووە بووەتە ئەمینداری ئەو پارتە توندڕەوە ئیسلامییە شیعییە لوبنانییە و تا رۆژى کوژرانەکەى لەو پۆستەدا ماوەتەوە کە دەکاتە 32 ساڵی تەواو.
هەرچەندە حزبوڵاى لوبنان چالاکییەکانى لەناوخۆی ئەو وڵاتەدا کردووە و جەماوەرێکى زۆری لەخۆی کۆکردووەتەوە، بەڵام بە شا باڵی ئێران زانراوە لە رۆژهەڵاتى ناوەڕاستدا و زۆر جاریش ئەوە پەیوەندییە بە نهێنى نەماوەتەوە و بە شێوازی جۆراوجۆر لە هەردوو لاوە باسکراوە، حزبوڵا نەک هەر رۆڵی چەکداریی لەو وڵاتەدا گێڕاوە بەڵکو رۆڵی مەدەنى و حکومەتداریی و پەرلەمانى و رێکخراوى کۆمەڵگەى مەدەنیشى هەبووە، بەڵام ئەوەندەى کارە سەربازییەکانى لە دژى سیاسەتەکانى ئیسرائیل بەرچاو کەوتوون ئەوەندە بوارەکانى دیکە نەکەوتووەتە بەر دیدەى خەڵک.
لەپاش سەرهەڵدانى جەنگی نێوان ئیسرائیل و حەماس و پەلکێشانى بۆ لوبنان ، شەڕ بەرۆکی ئەو وڵاتەى گرت و لە ئەنجامدا بەشێکى زۆر لە خاکی ئەو وڵاتەش بەرهێرشەکان کەوتن، لەو کاتەوە تا ئێستاش کاردانەوەکان جۆراوجۆران، لە کۆتا لێکەوتەدا راپۆرتێکى تەلەفزیۆنییە کە بووەتە ترێندى سۆشیاڵ میدیا و میدیاکانى ئەو وڵاتە.
راپۆرتێکى تەلەفزیۆنى کەناڵی – الجدید- ـى لوبنانى سەرنجی زۆرینەى خەڵکی لوبنانى بۆ خۆی راکێشاوە کە تیایدا ئاماژە بە گۆڕەکەى حەسەن نەسروڵاى ئەمینداریی گشتى حزبوڵاى لوبنان کردووە و تیایدا هاتووە ، نەسروڵا هەر بە زیندوویی کێشە نەبوو بۆ لوبنان و لوبنانییەکان بەڵکو بە مردویش خەریکە دەبێتە کێشە، بەگوێرەى راپۆرتى تەلەفزیۆنە لوبنانییەکە گڵکۆى نەسروڵا بووەتە مەکۆی کۆبوونەوەى حزبوڵاییەکان و بە دەیان ملیۆن دۆلاری بۆ تەرخانکراوە ئەوە لەکاتێکدا بەشێکى زۆر لە لایەنگران و ئەندامانى ئەو رێکخراوە شوێنێکیان نییە تێیدا نیشتەجێبن و بەهۆی هێرشەکانى ئیسرائیلەوە بێ ماڵوحاڵ بوون و کەسیش لێیان ناپرسێتەوە و ئەوەش نیگەرانى دروستکردووە، رۆژنامەى عەرەبى لەندەنى ئاماژەى بە راپۆرتە تەلەفزیۆنییەکە کردووە حزبوڵا دەیەوێت لە رێگەى ئەو گڵکۆیەوە پەرە بە لایەنگرانى خۆی بدات و بیکاتە سەکۆی کۆبوونەوەى سیاسی و جەماوەریی خۆیان و دەیان ملیۆن دۆلاری تێچووە کە لە لایەن ئێرانەوە دابینکراوە، لە کاردانەوەى ئەو راپۆرتەدا لەنێو سۆشیاڵ میدیاى لوبناندا بەشێکى زۆر لە هاووڵاتیان رەخنەى جۆراوجۆریان لەوکارە گرتووە و پێیان وایە وێنەکانى سەرگڵکۆکە و کۆبوونەوەى بەردەوامى خەڵک نیشاندەری ئەو راستییەن کە هێشتا ئێران نایەوێت دەستبەرداریی لوبنان ببێت و هەندێکى دیکەش باوەڕیان وایە دەستنیشانکردنیەتى بۆ هێرشکردنە سەرى لە لایەن ئیسرائیلەوە لە داهاتوودا. میدیاکانى حزبوڵاش بڵاویانکردوە ئەو راپۆرتەى الجدید هیچ راستییەکیان تێدا نییە و تەنها بەئامانجگرتن و لێدانە لە حزبوڵا و هیچى تر.