حەیدەر عەبدولرەحمان
بەشداری كردنی (هاوبیر زارین) لەنمایشی (باڵندەی كامەرانی) وەك ئەكتەرێكی سەرەكی بۆ بەرجەستە كردنی ڕۆڵی(ئاڕما)سەركردەی گروپە شۆڕشگێڕەكان، هەلێكی پڕ هەڕمێن بوو بۆ ئەو، كە ساڵانێك بوو لەشارێكی بێ شانۆ لەچاوەڕوانی ئەوە دابوو بتوانێت لەبەرهەمێكدا وزەو دەسەڵاتە هونەرییەكانی خۆی وەك ئەكتەر نیشان بدات.
دواتر چانسی ئەوەی بۆ ڕەخسا كە لەدوو سەرەوە هەلومەرجەكە بە قازانجی ئەو هەڵكەوێتەوە:
لەگەڵ دەرهێنەرێكی بەتوانای وەك (شوان كەریم ) لەبەرهەمێكدا یەك بگرێتەوە، كە خاوەنی زۆرترین بینەری شانۆییە لەكوردستان،
2. هەلی ئەوەیِ بۆ دەڕەخسێنێ، كە زۆرترین بینەر لەشارەكانی كوردستاندا ئاشنا بەتواناكانی هاوبیر و یەكە یەكەی ئەكتەرەكانی دیكەی ئەو نمایشە بن.
بەڵام دەكرێ لەخۆمان بپرسین ئاخۆ هاوبیر تا چەند توانیویەتی ئەو دوو دەرفەتە زێڕینە بۆ خزمەتی شانۆی كوردی بەگشتی و بۆ خزمەتی هونەری خۆی وەك ئەكتەر بەتایبەتی قۆرخ بكات
بە دڵنیاییەوە دەرهێنەر لەسەر كۆمەڵێ بنەما هاوبیری بۆ ئەكتەرێكی نمایشەكە هەڵبژاردووە و ڕۆڵێكی سەرەكیشی پئ بەخشیووە، ئەوەی بەهاوبیرو هاوڕێ ئەكتەرەكانی دیكەشی بەخشیووە، تەنیا لەسەر بنەمای شایەستە بوون بووە لەگەڵ كاراكتەرەكانیان و توانای فیزیكی و جەسەیی ئەوان بؤ ڕۆڵەكانیان.
بەڵام لەبەر ئەوەی هاوبیر ئەكتەری سەرەكی نمایشەكەیە بۆیە زێتر قسە لەو دەكەین ..:
هاوبیر پێشتر چەندین ئەزموونی دیكەی شانۆیی هەبووە، بەڵام لە ڕووی نواندنەوە، هیچ لە و ئەزموونانە بۆ ئەو نەبوونەتە خاڵێكی وەرچەرخان وەك باڵندەی كامەرانی،
ڕەنگە هاوبیر ئەگەر لە ژینگەیەكی مردووی شانۆیی نەژیایە، چاوەڕوانی ئەوە ی لێ دەكرا گەشە بە تواناكانی خۆی بداو (باڵندەی كامەرانی) بۆ تەنیا جارێك لەسەر سەری هاوبیر هەڵنەنیشتایەوەو زۆر دەرفەتی تر دروست دەبوونەوە بۆ ئەو.
بەڵام پێم وایە (باڵندەی كامەرانی) هەم بووە تاقیكردنەوەیك بۆ هاوبیرو چۆنیەتی زاڵ بوونی بەسەر ڕۆڵەكەیِ
هەم بووە شوناسێك بۆ ئایندەی هاوبیر و ناساندنی وەك ئەكتەرێكی جیاواز.
ڕەنگە لێم بپرسی جیاوازیەكەی لە كوێ دایە ؟
من پێت دەڵێم (هاوبیر) ِ زۆرترین خەسڵەتەكانی ئەكتەری تێدا كۆبۆتەوە لەوانە:
1. لەش و لارێكی جمناستیكی كە بۆ هەموو جولانەوەیەك بگونجێ و باڵایەكی كەڵەگەت.
دەنگ و ئیلقاو تۆنە دەنگێكی جیاواز.
ئەداو نواندنێكی هێمادار
بەڵام وێڕای ئەو خەسڵەتانەش، هێشتا زۆر حاڵەتی نواندن هەبوون، وەك
لەكاتی نواندندا لەپەنای ئەداوە هەندێ حاڵەتی گرژی دروست دەبوون ، لە هەندێ دیمەندا، وەك دیمەنەكانی دوایی ، كە ئەگەر ئەكتەر تێیدا ماسولكەكانی شل كردایەوە، نواندنەكە سروشتی تر دەبوون.
هەندێ جار هۆكاڕی دروست بوونی گرژی لەنواندندا بەهۆی پەیوەندی لاوازی ئەكتەرە بە كاراكتەرەكەی ، یاخود لاوازی تێگەیشتنی.
كۆتا دیمەنی مردنی (ئارما) كە ڕەنگە بەلای دەرهێنەر یا ئەكتەر لە دیمەن سەركەوتووەكان بێت، بەو ناوەی دیمەنێكی تراژیدیە، كەچی بەدیدی من لەدیمەنە هەرە لاوازەكان بوو، چونكە دەرهێنەر نەیتوانی كۆتایی نمایشەكەی پڕتر كات لە دراماو ستاتیكای درامی و كۆتاییەكەی بە لاوازی ڕادەستی بینە ر كرد، بێ ئەوەی شوێنەوارێك لە زەهنی بینەردا بە جێ بێلێ .
لە كاتێكا دەرهێنەر مەبەستی بوو ، پەنجە لەسەر برینێكی گەورەی كورد دابنێ ، كە بە درێژایی مێژوو بە دەستیەوە دەناڵێنێ.