هەرێم نیوز

ڕۆژنامەی "وۆڵ ستریت جۆرناڵ"ی ئەمریکی لە ڕاپۆرتێکی نوێدا پەردەی لەسەر هەڵوێستێکی توندی دۆناڵد ترەمپ، سەرۆکی ئەمریکا لادا و ڕایگەیاند، ترەمپ ئامادەیی نیشانداوە پشتگیری لە ئۆپەراسیۆنی کوشتنی موجتەبا خامنەیی، ڕێبەری نوێی ئێران بکات، ئەگەر ناوبراو ئامادە نەبێت مل بۆ داواکارییەکانی واشنتۆن بدات.

مەرجەکانی واشنتۆن بۆ ڕێبەرە نوێیەکە

 
بەپێی زانیارییەکانی وۆڵ ستریت جۆرناڵ کە لە زاری بەرپرسانی ئێستا و پێشووی ئەمریکاوە گواستوویەتییەوە، ترەمپ بە یاریدەدەرانی ڕاگەیاندووە کە "تەسلیمبوونی بێ مەرجی تاران" و کۆتاییهێنان بە بەرنامە ئەتۆمییەکە، تەنها ڕێگەی مانەوەی ڕێبەرە نوێیەکەیە.

ترەمپ لە لێدوانێکدا بۆ گۆڤاری "تایم" جەختی کردووەتەوە کە "ئەو هەموو فشارەمان نەکردووە بۆ ئەوەی لە کۆتاییدا خامنەییەکی دیکە بێتە سەر کار."

ئیسرائیل و بانکی ئامانجەکان

 
ڕاپۆرتەکە ئاماژە بەوە دەکات کە واشنتۆن چاوەڕوان دەکات ئیسرائیل ئەرکی جێبەجێکردنی هەر ئۆپەراسیۆنێکی لەو شێوەیە بگرێتە ئەستۆ.

گدعۆن ساعار، وەزیری دەرەوەی ئیسرائیل، لە وەڵامی پرسیارێکی کەناڵی CNN سەبارەت بەوەی ئایا موجتەبا خامنەیی ئامانجە بۆ وڵاتەکەی، بە تەمومژاوییەوە وتی: "پێویستە چاوەڕێ بکەن و ببینن."

جێی باسە ئیسرائیل پێشتر بەرپرسیارێتی هێرشە ئاسمانییەکەی گرتە ئەستۆ کە تێیدا باوکی موجتەبا (ڕێبەری پێشوو) و هاوسەرەکەی کوژران.

تێڕوانینی سیاسی بۆ موجتەبا خامنەیی

 
وۆڵ ستریت جۆرناڵ دەنووسێت، لە واشنتۆن موجتەبا خامنەیی وەک کەسایەتییەکی توندڕەو و جێگەی متمانەی سوپای پاسداران دەبینرێت. بەرپرسانی ئەمریکا گەشبین نین بەوەی ڕێبەرە نوێیەکە ئامادە بێت بۆ دانوستان یان پاشەکشە لە پڕۆژە ئەتۆمییەکەی ئێران، ئەمەش ئەگەری پێکدادانی سەربازی و ئۆپەراسیۆنی هەواڵگری لە ناوچەکە زیاتر کردووە.