هەرێم نیوز
حکومەتی هەرێمی کوردستان بەبۆنەی هاتنی جەژنەکانی ڕەمەزان و نەورۆزەوە یانزە ڕۆژ پشووی فەرمیی لە سەرجەم دامودەزگاکاندا ڕاگەیاند.
ئەمڕۆ چوارشەممە فەرمانگەی میدیا و زانیاریی حکومەتی هەرێمی کوردستان خشتەی پشووەکانی مانگی ئاداری بۆ فەرمانبەران و هاووڵاتییان ئاشکرا کرد.
بەپێی ڕۆژژمێری فەرمیی حکومەتی هەرێمی کوردستان لە سبەینێ پێنجشەممەوە پشووەکانی جەژنی نەورۆز و ڕەمەزان بە فەرمی دەست پێدەکەن.
پشووەکە لە نۆزدەی ئادارەوە دەست پێدەکات و تاوەکوو بیست و نۆی هەمان مانگ لە تەواوی فەرمانگەکانی حکومەتدا بەردەوام دەبێت.
لەگەڵ ئەوەشدا فەرمانگەی میدیا و زانیاری جەختی لەوە کردووەتەوە کە لە ماوەی ئەم پشووە درێژەدا فەرمانگە خزمەتگوزارییەکان داناخرێن.
دەوامی ئەو فەرمانگە خزمەتگوزارییانەش تەنیا بۆ ڕاپەڕاندنی ئیشوکاری پێویستی هاووڵاتییان بە شێوەی ئێشکگری بەردەوام دەبێت.