هەرێم نیوز
سەرۆکایەتی شارەوانی چەمچەماڵ لە ڕاگەیەندراوێکدا دڵنیایی دەداتە هاوڵاتیانی سنوورەکە کە سەرەڕای بارانبارینی بەخوڕ لە کاتژمێرەکانی ڕابردوودا، هیچ حاڵەتێکی نەخوازراوی لافاو تۆمار نەکراوە.
بەپێی زانیارییەکانی شارەوانی، ڕێژەی بارانبارین لە سنوورەکە گەیشتووەتە ٤٧.١ ملم، بەڵام بەهۆی ئامادەکاری پێشوەختەوە، هیچ مەترسییەک بۆ سەر ژیانی هاوڵاتیان و سەروماڵیان دروست نەبووە.
شارەوانی چەمچەماڵ ئاماژە بەوە دەکات کە هۆکاری سەرەکیی دوورکەوتنەوەی مەترسیی لافاو دەگەڕێتەوە بۆ ئەو کارانەی لە مانگەکانی ڕابردوودا ئەنجامدراون، لەوانە:
• ڕێڕەوی بانی مەقان: سەرجەم ڕێڕەوە ئاوییەکانی ئەم ناوچەیە بە تەواوی پاک و چاککراونەتەوە و لە ئێستادا بەبێ گرفت لە کاردان.
• پلانی پێشوەختە: ئەو بەرنامە و نەخشەیەی شارەوانی بۆ بەرەنگاربوونەوەی لافاو دایڕشتبوو، بە سەرکەوتوویی جێبەجێ کراوە.
لە کۆتایی ڕاگەیەندراوەکەدا جەخت کراوەتەوە کە لە ئێستادا مەترسی لافاو بۆ ناوەندی شار نەماوە، ئەمەش دوای ئەوە دێت کە ساڵانە لە کاتی بارانی بەخوڕدا هەندێک گەڕەک ڕووبەڕووی گرفتی کۆبوونەوەی ئاو دەبوونەوە.