ئامادەکرد/ هەڵۆ کاکەوەیس

بەشی یەکەم: هەڵاتن لە تاریکیی شەودا و کاروانە ڕەشەکەی سەر سنوور!
7ی ئابی 1995...

کاتژمێر یەکی نیوەشەو بوو، تاریکی باڵی بەسەر کۆشکە ساردەکانی بەغدادا کێشابوو.
کاروانێک لە ئۆتۆمبێلی ڕەشی مێرسیدس و لاندکرۆزەر لە دەروازەی پایتەختەوە کەوتنە ڕێ.
لە ئۆتۆمبێلی پێشەوەدا، فەریق حوسێن کامیل حەسەن مەجید دانیشتبوو...
وەزیری پیشەسازیی سەربازی و ئەندازیاری جبەخانە ئەتۆمی و بایۆلۆجییەکانی عێراق.
زاوای گەورەی سەدام حوسێن و مێردی ڕەغدی کچی.
لە تەنیشتیەوە، سەدام کامیلی برای دانیشتبوو، فەرماندەی دەستەی پاسەوانیی تایبەتی سەرۆک.
لە ئۆتۆمبێلەکانی دواوە، ڕەغد و ڕەنای کچەکانی سەدام لەگەڵ منداڵەکانیاندا خەوتبوون...
کچەکانی دیکتاتۆر تەنانەت نەیاندەزانی بۆ کوێ دەبرێن!
پێیان گوتبوون: "دەچینە عەممان بۆ پشووی هاوینە و لەوێشەوە بەرەو بولگاریا دەفڕین."
نەیاندەزانی ئەمە مەترسیدارترین هەڵاتن و خیانەتە لە مێژووی بنەماڵەی فەرمانڕەوادا!
حوسێن کامیل لە ئاوێنەکەوە سەیری ڕێگا تاریکەکەی دەکرد، چاوەکانی نوقمی دڵەڕاوکێ بوون...
چەند ڕۆژێک پێشتر، عودەی سەدام لە ئاهەنگێکدا تەقەی لە وەتبانی مامی کردبوو و قاچەکانی شەل کردبوو.
عودەی دەستی بەسەر بازرگانی و تەواوی پۆستەکانی دەوڵەتدا دەگرت و پیلانی لەناوبردنی حوسێن کامیلی دادەڕشت...
حوسێن کامیل زۆر باش دەیزانی لە بەغدا نۆرەی سەربڕینی ئەو هاتووە!
بۆیە بڕیارێکی شێتانەی دا؛ هەڵاتن بە هەموو نهێنییە سەربازی و ئەتۆمییەکانی عێراقەوە.

کاتژمێر پێنجی سەرلەبەیانیی 8ی ئاب بوو...
کاروانەکە گەیشتە خاڵی سنووریی تورەیبیل لە نێوان عێراق و ئوردن.
پاسەوانانی سنوور لە ترسی هەیبەتی زاوای سەرۆک، بێ پشکنین دەروازە ئاسنینەکەیان کردەوە.
ئۆتۆمبێلەکان تەپوتۆزی بیابانیان بڕی و چوونە ناو خاکی شانشینی ئوردن...
حوسێن کامیل هەناسەیەکی قووڵی هەڵمژی؛

پێی وابوو لە چنگی شێر ڕزگاری بووە، بێ ئەوەی بزانێت بە پێی خۆی بەرەو ناو دەمی گورگەکان هەنگاو دەنێتەوە!
هاوکات لە بەغدا... کاتژمێر هەشتی سەرلەبەیانی.

سەدام حوسێن لە خەو ڕادەبێت.

تەلەفۆنێکی بەپەلە لە سەرۆکایەتیی دیوانەوە لێدەدات...

هەواڵەکە وەک بۆمبێک لە ناو هۆڵی کۆشکدا دەستەویەخەی دیکتاتۆر دەبێت:

"گەورەم... حوسێن کامیل، سەدام کامیل، و هەردوو کچەکەت هەڵاتوون بۆ عەممان!"

بێدەنگییەکی کوشندە بەسەر کۆشکدا دابەزی...

سەدام حوسێن لە شوێنی خۆی وەک بەردی ڕەق چەقی و زەرد هەڵگەڕا؛

ئەو پیاوەی باوەڕی بە کەس نەبوو، خەنجەرێکی ژەهراوی لە ناو جەرگەی خێزانەکەی خۆیەوە لە پشتی درا!

عودەی سەدام بە پەلە سواری فڕۆکە دەبێت و بەرەو عەممان دەفڕێت تا بە زۆر کچەکان بگەڕێنێتەوە...

بەڵام شا حوسێنی پاشای ئوردن ڕێگەی پێ نادات و داڵدەی حوسێن کامیل دەدات!

گەورەترین زریان لە مێژووی بەعسدا دەستی پێکرد...

بەشی دووەم: کێڵگەی حەیدەر و وەهمی سەرۆکایەتی؛ کاتێک ڕۆژئاوا زاوای بەعسی فڕێدایە پەراوێزەوە!
ئابی 1995... عەممان، کۆشکی ڕەغەدان.
حوسێن کامیل لە هۆڵی میوانە تایبەتەکانی شای ئوردندا دادەنیشت.
هێشتا وای دەزانی فەریقە دەستڕۆیشتووەکەی بەغدایە و تەواوی عێراق لە ترسی پۆستاڵەکانی دەلەرزێت!

لە تەنیشتیەوە، ڕەغدی کچی سەدام چاوەکانی لە گریاندا سوور داگەڕابوون...

ڕەغد دوای گەیشتنیان درکی بەوە کردبوو کە هاوسەرەکەی چ خیانەتێکی لە باوکی کردووە و بەرەو کام دۆزەخ هەڵاتوون؛
ڕووی تێکردبوو و بە گەروویەکی پڕ لە زامەوە پێی گوتبوو:

"حوسێن... تۆ خەنجەرت لە باوکم دا! ئێمەت کردە سووتەمەنیی وەهمی دەسەڵاتی خۆت!"

بەڵام حوسێن کامیل گوێی لە کەس نەدەگرت؛
ئەو وای دەزانی گەورەترین سەرکێشیی سەدەی ئەنجام داوە و بە چەند مانگێک دەبێتە حاکمی نوێی بەغدا!

چەند ڕۆژێکی کەم پاش هەڵاتنەکەی، فڕۆکەیەکی تایبەت لە ئەوروپاوە لە عەممان نیشتەوە...

ڕۆلف ئیكیۆس، بەرپرسی پشکنەرانی نەتەوە یەکگرتووەکان (UNSCOM) لەگەڵ ئەفسەرانی باڵای هەواڵگریی ئەمریکا (CIA) بە پەلە چوونە ژوورەکەی حوسێن کامیل.
شەڕی دەرهێنانی گەورەترین نهێنییە ئەتۆمی، کیمیایی و بایۆلۆجییەکانی بەعس دەستی پێکرد!

حوسێن کامیل بۆ ئەوەی بیسەلمێنێت کە کلیلی هەموو عێراق لە دەستی ئەودایە، دەستی کرد بە هەڵڕشتنی مەترسیدارترین زانیارییەکان...

پێی گوتن:
"سەدام درۆی لەگەڵ هەمووتاندا کردووە! ئێمە لە ساڵی 1991 بەدواوە جبەخانەیەکی گەورەی چەکی بایۆلۆجیمان دروست کردووە: گازی ئەنتراکس (پشکۆی خەڵووز)، گازی ژەهراویی دەمار (VX)، و کڵاوەی مووشەکی ئەتۆمیمان حەشار داوە!"

ئیكیۆس بە سەرسوڕمانەوە پرسیاری لێکرد: "بەڵگەکان لەکوێن؟! کوا ئەو بەڵگەنامانەی حاشایان لێ ناکرێت؟"

حوسێن کامیل پەردەی لەسەر گەورەترین مەتەڵی بەعس لادا و گوتی:

"لە کێڵگەی پەلەوەری حەیدەر... لە کێڵگەکەی خۆم لە نزیک تکریت، هەموو بەڵگەنامە و نەخشە سەربازییەکان لە ژێر گڵدا لەناو سندووقە دارینەکاندا شاردراونەتەوە!"
ئەم دانپێدانانە وەک بوومەلەرزە کۆشکەکانی بەغدای هەژاند!

سەدام حوسێن کاتێک زانی زاوای گەورەی تەواوی پەردەکانی دادڕیوە، بەر لەوەی نەتەوە یەکگرتووەکان بگەنە شوێنەکە، ناچار بوو خۆی بە فەرمی بەڵگەنامەکانی کێڵگەی حەیدەر ئاشکرا بکات.

سەدان سندووقی دۆکیۆمێنت و بەڵگەی سەربازی لەناو ئەو کێڵگەیەدا ڕادەستی پشکنەران کران...

جبەخانە پەنهانەکەی بەعس بە یەکجاری ڕووت کرایەوە!

حوسێن کامیل پێی وابوو دوای ئەم خزمەتە، ئەمریکا و ئۆپۆزیسیۆنی عێراقی پەیکەری زێڕینی بۆ دروست دەکەن...

چاوەڕێ بوو واشنتن و لەندەن وەک سەرکردەی ئایندەی عێراق پێشوازیی لێ بکەن؛

بەڵام زۆر زوو لەناو وەهمە گەورەکەی بەئاگا هاتەوە!

ئۆپۆزیسیۆنی عێراقی لە ڕاگەیاندنەکانەوە بە توندی ڕەتیان کردەوە:

"تۆ قەسابی ڕژێمیت! دەستەکانت بە خوێنی هەڵەبجە، ئەنفال و سەرکوتکردنی ڕاپەڕینی ١٩٩١ سوورە؛ تۆ تاوانباری جەنگیت، نەک ڕزگارکەر!"

ئەمریکییەکانیش پاش ئەوەی تا دوا دڵۆپ تەواوی نهێنییەکانیان لێ هەڵلووشی، پشتیان تێکرد و وەک پارچە پەڕۆیەکی سوودلێوەرگیراو لە پەراوێزدا فڕێیان دا...

حوسێن کامیل لەناو هۆڵە ساردەکانی عەمماندا ببووە زیندانییەکی ڕاستەقینە؛

کەس ئامادە نەبوو سڵاوی لێ بکات، و تەنانەت شا حوسێنی پاشای ئوردنیش ئیتر ئامادە نەبوو بیبینێت.

ڕەغد سەدام حوسێن لە بیرەوەرییەکانیدا باس لەو ساتە تەزیوانە دەکات و دەڵێت:

"حوسێن ڕۆژ بە ڕۆژ وەک شێت دەهات و دەچوو... دەمارەکانی گەردنی ڕەق داگەڕابوون، جگەرەی لەسەر جگەرە دادەگیرساند و بێدەنگ دەبوو. تێگەیشت کە کەوتووەتە داوێکی کوشندەوە؛ نە ڕێگای لەبەردەم مابوو بەرەو ڕۆژئاوا بڕوات، و نە ڕێگای گەڕانەوەی هەبوو بەرەو بەغدا!"

لەم چرکەساتە پڕ لە کەساسی و داڕمانەدا بوو...

کە تەلەفۆنێک لە بەغداوە زەنگی لێدا؛

دەنگێکی نەرم و فێڵاوی لەناو کۆشکەکانی تکریتەوە...
داوە گەورەکەی سەدام حوسێن دەستی بە چنین کرد!

بەشی سێیەم: تەڵەکەی بەغدا و خەنجەری سەر سنوور؛ کاتێک پەیمانی دیکتاتۆر بە خوێن واژۆ کرا!
شوباتی 1996...
شەش مانگی ڕەبەق بەسەر زیندانییە ئاڵتوونییەکەی عەمماندا تێپەڕیبوو.

حوسێن کامیل لە لوتکەی دەسەڵاتەوە، کەوتبووە ناو زەلکاوێکی هێندە تاریک کە هەموو دەروازەکانی لێ داخرابوو.

ئەمریکییەکان پاش دەرهێنانی بەڵگەکانی کێڵگەی پەلەوەری حەیدەر پشتیان تێکردبوو؛

ئۆپۆزیسیۆنی عێراقی ڕەتیان کردبووەوە سڵاوی لێ بکەن؛

و پاشای ئوردنیش بە تەواوی لێی دوورکەوتبووەوە.

ئەو پیاوەی ڕۆژگارێک سوپایەک لە ترسی فەرمانەکانی دەلەرزین، ئێستا ببووە بارمتەیەکی بێپەنا.

لەم ساتەوەختەدا بوو کە تەڵە گەورەکەی بەغدا دەستی بە کارکردن کرد...

سەدام حوسێن، بە پێچەوانەی سروشتی هەمیشەیی خۆی، لە بەغداوە فەرمانی «لێبووردنی گشتی» بۆ هەڵاتووان دەرکرد!
نامە و پەیوەندییەکان دەستیان پێکرد؛

ساجیدە خەیروڵڵای خێزانی سەدام تەلەفۆنی بۆ کچەکانی دەکرد، و پەیامبەری عەشیرەت بەڵێنی پۆڵاینیان لە سەدامەوە بۆ حوسێن کامیل دەهێنا:
وەرنەوە... سەرۆک لێتان خۆش بووە، ئێوە ڕۆڵەی خۆمانن و لەسەر عەرشی خۆتان دادەنیشنەوە!

ڕەغد سەدام حوسێن لە چاوپێکەوتنە مێژووییەکەیدا لەگەڵ کەناڵی «العربية» پەردە لەسەر ئەو ساتە ترسناکانە هەڵدەماڵێت؛
دەگێڕێتەوە کە چۆن دەستەودامانی حوسێن کامیل بووە و لێی پاڕاوەتەوە:

حوسێن... من باوکم بناسم هەرگیز لە کەس خۆش نابێت!

ئەمە تەڵەیە، مەگەڕێرەوە... بە خودا هەر کە پێمان گەیشتە سەر سنووری عێراق، باوکم فەرمانی تەڵاقدانمان دەردەکات و سەرتان دەبڕێت!
تەنانەت شای ئوردنیش هۆشداریی دابوویە کە پێ لە خاکی عێراق نەنێتەوە؛

بەڵام حوسێن کامیل بەهۆی ئەو وەهم و غروورەی کە چاوەکانی کوێر کردبوو، وای دەزانی دەتوانێت وەک پاڵەوان بگەڕێتەوە ناو کۆشکەکانی تکریت!
20ی شوباتی 1996...
کاروانەکە لە عەممانەوە بەرەو دەروازەی سنووریی تورەیبیل لە نێوان عێراق و ئوردن کەوتە ڕێ..

کاتژمێر 2ی نیوەڕۆ بوو کە گەیشتنە خاڵی سنووری.

تەپوتۆزی بیابان باڵی بەسەر سنووردا کێشابوو، بەڵام ئەم جارەیان دیمەنەکە تەواو جیاواز بوو...

لە پشتی دەروازە ئاسنینەکەی عێراق، کاروانێک لە ئۆتۆمبێلی سەربازیی ڕەش وەستابوون؛
عودەی سەدام حوسێن، بە دەمانچەی بەستراوەوە، بە کەسی خۆی لە کەمیندا چاوەڕوانی زاوای هەڵاتوو بوو!
هەر کە ئۆتۆمبێلەکان سنووریان بڕی، تەڵەکە تەقییەوە!

سەربازەکان بە چەکی ڕاکێشراوەوە دەوری کاروانەکەیان گرت.

دەستبەجێ فەرمان درا کە ڕەغد، ڕەنا و منداڵەکان لە مێردەکانیان جیا بکرێنەوە و بە جیا بەرەو بەغدا بەڕێبکرێن.

حوسێن کامیل بە سەرسوڕمانەوە گوتی: "بۆچی؟!"، بەڵام وەڵامەکە کورت بوو: "فەرمانی سەرۆکە!"

ڕەغد و منداڵەکانی بە گریانەوە خرانە ناو ئۆتۆمبێلی جیاواز و بەرەو کۆشکی دایکیان لە بەغدا بەڕێکران.

حوسێن کامیل و سەدام کامیل لەسەر سنوور ڕووتکرانەوە؛

پلە سەربازییەکانیان، چەکەکانیان و کەرامەتیان لێ داماڵرا.

لەو چرکەساتەدا، حوسێن کامیل لە بیابانی تورەیبیلدا لەرزینێک بە تەواوی جەستەیدا هات...

تێگەیشت کە بە پێی خۆی هاتووەتە بەردەم قەنارەی مەرگی خۆی!

ڕۆژی دواتر، 21ی شوباتی 1996...

میدیای فەرمیی عێراق بەیاننامەیەکی کوشندەی بڵاوکردەوە:
ڕەغد و ڕەنای کچانی سەدام حوسێن بە فەرمی تەڵاقی خۆیان لەو دوو "خائین"ە وەرگرتەوە!

ئیتر حوسێن کامیل و براکەی، پارێزبەندیی زاوایەتیی سەرۆکیان نەما.

ئەوان ڕەوانەی خانووی باوکیان لە گەڕەکی «سەیدییە» لە بەغدا کران.

سەدام حوسێن بڕیاری کۆتایی دەرکردبوو، بەڵام نەیدەویست دەستی ڕژێم بە خوێنیان سوور بێت؛

بۆیە ئەرکەکەی سپاردە عەشیرەت!

ڕۆژی 22ی شوبات، بەیاننامەی فەرمیی عەشیرەتی ئەلبوناسر و ئال مەجید بڵاوکرایەوە:

«خوێنی حوسێن کامیل و سەدام کامیل حەڵاڵە، و دەبێت عار و شەرمەزاریی عەشیرەت بە خوێن بشۆردرێتەوە!»
شەوی 22 لەسەر 23ی شوبات...
گەڕەکی سەیدییە لە بەغدا بە تەواوی لە لایەن هێزە تایبەتەکانەوە گەمارۆ درا.

لە ناو خانووەکەدا، حوسێن کامیل، باوکی، براکانی و منداڵەکانیان کڵاشینکۆفەکانیان ئامادە کرد؛

کۆتا چرکەساتەکانی ژیان دەستی پێکردبوو، و بۆنی بارووت بەسەر گەڕەکەکەدا نیشتبوو...

بەشی چوارەم و کۆتایی: دۆزەخی گەڕەکی سەیدییە؛ چواردە کاتژمێر لەناو ئاگر و خوێندا!
23ی شوباتی 1996...
کاتژمێر پێنجی بەرەبەیان، بەغدا نوقمی تەمتومانێکی سارد و خنکێنەر بوو.

لە گەڕەکی سەیدییە، خانووە گەورەکەی «کامل حەسەن مەجید» بێدەنگ دەهاتە بەرچاو؛

بەڵام لە ژوورەوە، هەمووان چاوەڕوانی مەرگ بوون!

حوسێن کامیل، سەدام کامیل، حەکیمی برایان، و باوکە پیرەکەیان، تەواوی شەو نەخەوتبوون.

سندووقی فیشەک لە هەموو سووچێکی ژوورەکاندا کرابوونەوە...

کڵاشینکۆف، بی کەی سی، و دەمانچەکان پڕ کرابوون؛

ئەوان دەمێک بوو سروشتی بەعسیان دەزانی:
تەڵاقدانی کچەکانی سەدام، تەنیا کێشانی هێڵی سوور بوو بۆ بەحەڵاڵکردنی خوێنیان!
لەگەڵ یەکەم چەخماخەی گزنگی بەیانیدا، زەوی لەژێر پێی گەڕەکی سەیدییە دەستی بە لەرزین کرد!

کاروانێک لە دەیان ئۆتۆمبێلی چەکداری ڕەش و زرێپۆش کۆڵانەکەیان تەنی.

سەدان چەکداری عەشیرەت و دەزگای ئاسایشی تایبەت، خانووەکەیان گەمارۆ دا.

فەرماندەی هێرشەکە غەریب نەبوو؛
عەلی حەسەن مەجید (کیمیایی) ، مامی حوسێن کامیل، بە چاوی پڕ لە ڕق و کینەوە فەرمانی کاولکاریی پێ بوو!

کەمێک دوورتر، لەناو ئۆتۆمبێلێکی مێرسیدسی تایبەتدا، عودەی سەدام حوسێن دانیشتبوو...

جگەرەی دادەگیرساند و بە تەنزێکی تاڵەوە تەماشای لەناوچوونی ڕکابەرە دێرینەکەی دەکرد!
دەنگی بڵندگۆ کۆڵانەکەی لەرزاند:
چەکەکانتان فڕێ بدەنە دەرەوە و خۆتان تەسلیم بکەن...
وەڵامی حوسێن کامیل بە زار نەبوو، بەڵکو بە دەستڕێژی چڕی کڵاشینکۆف بوو!

شەڕ دەستی پێکرد... شەڕێکی دەستەویەخەی هێندە دڕندانە کە بەغدا وێنەی نەبینیبوو.

حوسێن کامیل ژەنراڵێکی سەربازیی ڕاهێنراو بوو، و دەیزانی تەسلیمبوون تەنیا ئەشکەنجە و سەربڕینە؛

بۆیە بڕیاری دا وەک سەربازێک تا دوایین دڵۆپی خوێن شەڕ بکات.

خانووەکە بووە قەڵای ئاگر!
مووشەکی دژەتانک (RPG) یەک لە دوای یەک بەر دیوار و پەنجەرەکان دەکەوتن؛

دووکەڵی ڕەش و بۆنی سووتانی بارووت گەڕەکەکەی داپۆشی.
شوشەی پەنجەرەکان وردوخاش بوون و شوێنی هەزاران فیشەک لەسەر کۆنکرێتەکە هەڵکۆڵران...

کاتژمێر لە دوای کاتژمێر تێدەپەڕی...

شەڕەکە لە پێنجی بەیانییەوە تا پێنجی ئێوارە، دوانزە بۆ چواردە کاتژمێری تەواوی خایاند!
هێزەکانی عەلی کیمیایی و عودەی سڵیان لە هیچ نەکردەوە؛

تەنانەت تانکی سەربازییان هێنایە ناو کۆڵانەکە تا دیواری حەوشەکە بڕووخێنن.

لەناو خانووەکەدا، جەستەکان یەک بە یەک دەکەوتنە سەر زەوی؛
سەرەتا باوکە پیرەکەیان بە فیشەک پێکرا...

پاشان حەکیمی برایان لەناو خوێندا گەوزا...
کەمێک دواتر، سەدام کامیل لە پشتی پەنجەرەکە دەستڕێژی لێکرا و گیانی سپارد.
تەنیا حوسێن کامیل مابووەوە!
بە جەستەیەکی بریندار و خوێناوی، بە تەنیا لە ژوورێکەوە بۆ ژوورێکی تر دەچوو؛
فیشەک بە دەستەکانییەوە نەمابوو...

کاتێک هێزەکان دەرگای شکاو و سووتاوی ژوورەکەیان بڕی، ئەو لەناو خوێنی خۆیدا کەوتبوو؛
بێ ئەوەی دەرفەتی یەک هەناسەی پێ بدەن، دەستڕێژی سەدان فیشەک بەسەر تەرمەکەیدا کرا...
جەستەی زاوای گەورەی سەدام، بووە بێژنگ!

تەنانەت خوشکەکەی و منداڵە بێتاوانەکانی ناو خانووەکەش لەو قەسابخانەیەدا لە خوێندا نوقم کران.
ڕۆژنامەی فەرمیی (الثورة)ی بەعس لە بەغدا، بەیاننامەی بڵاوکردەوە:

عەشیرەتی ئەلبوناسر عار و شەرمەزاریی خۆی بە خوێنی خائینان شۆردەوە!
لە نەخۆشخانەی ئیبن سینا...
دکتۆر عەلائەدین بەشیر، پزیشکی تایبەتی بنەماڵەی سەدام، لە بەشی فریاکەوتن چاوەڕوان بوو.
لە یاداشتەکانیدا دەنووسێت:

دەرگاکان کرانەوە... تەرمەکان لە پشتی بارهەڵگرەکانەوە وەک کەلاکی قەسابخانە فڕێدرانە سەر زەوی!

تەرمی حوسێن کامیل بە تەواوی شێوابوو؛
دەموچاوی لە ژێر خوێن و بارووتدا نەدەناسراوە، و تەواوی سنگی بە فیشەک کون‌ کون ببوو.

ئەو پیاوەی چەند مانگێک پێشتر سەدان ژەنراڵ لە ترسی پێڵاوەکانی دەلەرزین،

ئێستا وەک پارچە گۆشتێکی بێگیان لەسەر کۆنکرێتی ساردی نەخۆشخانەکە کەوتبوو، بێ ئەوەی کەس بوێرێت دەستی لێ بدات!
کۆتایی هات...

ئەو پیاوەی لەسەر لووتکەی پیشەسازیی سەربازی و کێڵگەی پەلەوەری حەیدەر فیز و لووتبەرزیی بەسەر میللەتێکدا دەفرۆشت،
بە فێڵێکی ساختەی خەزوورەکەی، لە چاڵێکی تەسکدا کۆتایی پێهات!

ئەمە بوو چارەنووسی پیاوێک کە وەهمی دەسەڵات کوێری کرد،

و نەیزانی لە ماڵی دیکتاتۆردا، هیچ کەسێک لە تیغی پەیمانشکێنی پارێزراو نییە!

کۆتایی.