لە ناوەڕاستی ئاڵۆزییەکانی ڕۆژهەڵاتی ناوەڕاستدا، سەرۆکی هەرێمی کوردستانی عێراق نێچیرڤان بارزانی ڕێچکەیەکی جیاوازی گرتووەتە بەر. لە دنیایەکی پڕ لە گرژی و ململانێ ، ئەو دەنگێکی هێمنی پڕ لە ژیری بەرز کردووەتەوە.
کورد فاکتەری سەقامگیرین، نەک فاکتەری ناسەقامگیر - ئەم وتەیەی سەرۆک نێچیرڤان بارزانی لە قووڵاییەوە باوەڕێکی ستراتیژی دەردەخات کە پێچەوانەی نەریتی سیاسی ناوچەکەیە.
دیدگایەک لەسەر بنەمای واقیع، نەک خەیاڵ ئەوەینێچیرڤان بارزانی لە دیدگاکەیدا جیاواز دەکات، تێگەیشتنی قووڵە لە واقیعی جیۆپۆلەتیکی ناوچەکە. ئەو لە جیاتی دروشمی هەڵچوونی سیاسی، ڕێگایەکی پراکتیکی دیاری کردووە کە لەسەر چەند کۆڵەکەیەکی سەرەکی بنیات نراوە.
یەکەم:چارەسەری تایبەت بۆ هەر وڵاتێک
هەر یەک لە وڵاتانی عێراق، تورکیا، ئێران و سوریا مێژوو و پێکهاتەی جیاوازیان هەیە. سەرۆک نێچیرڤان بارزانی ئەم جیاوازییە دەناسێت و دەزانێت کە یەک چارەسەر بۆ هەموو دۆخەکان کاریگەر نابێت. بۆ نموونە لە عێراق، سیستەمی فیدڕاڵی ڕێگایەکی گونجاوە لە تورکیا، دەکرێت مافە کولتووری و زمانییەکان لە چوارچێوەی سیستەمی سیاسی وڵاتەکەدا چارەسەر بکرێن.
لە سوریا، پێویستی بە ئاوێتەبوونی کورد هەیە بەشێک بێت لە چارەسەری گشتی بۆ کێشەکانی وڵات وە مافەکانیان پشت گو ناخرێت.
دووەم: گفتوگۆ بەدیلی توندوتیژییە
ئاشتی هێزە، و ئاشتیخوازی ڕێبازی کەسانی خاوەن باوەڕ و بەهێزە. ئەم قسەیەی سەرۆک نێچیرڤان بارزانی کە لە ماناوە قووڵە دیدگایەکی جەوهەری نیشان دەدات. لە کاتێکدا مێژووی کورد پڕە لە خەبات و بەرگری، نێچیرڤان بارزانی پێی وایە کاتی ئەوە هاتووە ڕێگایەکی نوێ تاقی بکرێتەوە ئێستا کاتی ئەوەیە بەرهەمی یەکڕیزی کورد ببینرێت کە کلیلی سەرکەوتنە.
سێیەم: یەکگرتوویی کوردی پێش هەموو شتێک
نێچیرڤان بارزانی جەخت لەسەر ئەوە دەکاتەوە کە هەر هەوڵێکی دەرەکی سەرکەوتوو پێویستی بە یەکگرتوویی ناوخۆی کوردە. دابەشبوونە ناوخۆییەکان مەترسیدارترین هەڕەشەن بۆ سەر بەرژەوەندییە نەتەوەییەکان. لەم پێناوەدا،نێچیرڤان بارزانی هەوڵی زۆری داوە بۆ نزیککردنەوەی لایەنە کوردییەکان لە سوریا و بەهێزکردنی پەیوەندی لەگەڵ پێکهاتە کوردییەکانی ناوچەکە.
چوارەم:گۆڕینی گێڕانەوە- کورد وەک چارەسەر، نەک کێشە
کورد زۆرجار وەک کێشە یان لانیکەم وەک قوربانی نیشان دەدرێت.لە کاتێکدا نێچیرڤان بارزانی ئەم وێنەیە دەگۆڕێت و کورد وەک بەشێکی چالاک لە پرۆسەی ئاشتی و سەقامگیری لە ناوچەکەدا پێشکەش دەکات.
ئابووری وەک بنەمای ئاشتی. بارزانی تێگەیشتووە کە ئاشتی تەنها بە دیالۆگی سیاسی نایەتە دی، بەڵکو پێویستی بە بنەمایەکی ئابووری بەهێز هەیە. پەیوەندییە ئابوورییەکان دەتوانن پردی متمانە دروست بکەن لە نێوان لایەنە ناکۆک و دژ بە یەکەکاندا. بەرژەوەندی هاوبەشی ئابووری هاندەرێکی بەهێزە بۆ سەقامگیری و سەرکەوتنی دیپلۆماسیەتی کوردی هەیە .
ئاشتی وەک پرۆسە، نەک ڕووداو
خاڵی بەهێز لە دیدگاکەی نێچیرڤان بارزانیدا ئەوەیە کە ئاشتی بە پرۆسەیەکی درێژخایەن دەبینێت، نەک ڕووداوێکی کتوپڕ. ئەم تێگەیشتنە پێویستی بە سەبر و بەردەوامی لە دیالۆگ، هەنگاوی بچووکی بەردەوام لە جیاتی بازدانی گەورە، درووستکردنی متمانە بە تێپەربوونی کاو وە واقیعبینی لە داواکارییەکان و چاوەروانییەکان.
نێچیرڤان بارزانی دەڵێت: ئێمە بە باشی ئاشنای مێژووی ناوچەکەین و دەزانین چارەسەری ڕاستەقینە پێویستی بە کاتە. ئامانجی ئێمە ئەوەیە هەنگاو بە هەنگاو پێش بکەوین بۆ داهاتوویەکی باشتر بۆ کورد و هەموو گەلانی ناوچەکە.
میانڕەوی، کلیلی سەرکەوتنە.
سەرۆکی هەرێم دەزانێت کە میانڕەوی نەک تەنها هەڵوێستێکی ئەخلاقی، بەڵکو بژاردەیەکی ستراتیژیشە. لە ناوچەیەکدا کە توندڕەوی زۆرجار دەنگی باڵادەستە، دەنگی میانڕەو زۆر بە گرانی دەبیسترێت. کەچی، ئەمە ئەو دەنگەیە کە پێویستە زاڵ بێت بۆ ئەوەی داهاتوویەکی باشتر بۆ هەمووان دابین بکرێت.
میانڕەوی نێچیرڤان بارزانی پەیامێکی ڕوون دەگەیەنێت: کورد ئامادەیە ببێتە بەشێک لە چارەسەری کێشەکانی ناوچەکە، نەک بەشێک لە کێشەکە. ئەم ڕوانگەیە، ئەگەر بە دروستی جێبەجێ بکرێت، دەتوانێت خاڵی وەرچەرخان بێت لە مێژووی پرسی کورد و ڕەوتی سیاسی ناوچەکەدا.
ئاسۆی داهاتوو
دیدگاکەی نێچیرڤان بارزانی چارەیەکی خێرا نییە، بەڵکو ڕێگایەکی درێژخایەنە. پلانێکی کرداری کە پێویستی بە
دروستکردنی ستراتیژییەکی ڕوون بۆ گفتوگۆ لەگەڵ هەر وڵاتێک بەهێزکردنی یەکڕیزیی ناوخۆیی کوردودروستکردنی دیپلۆماسییەتی گشتی کاریگەر بۆ گۆڕینی تێڕوانینی بیروڕای گشتی جیهانی و بەهێزکردنی پشتگیری نێودوڵەتی بۆ ڕێگاچارەی ئاشتیانە.
سەرۆک نێچیرڤان بارزانی بە تێگەیشتنێکی قووڵ لە واقیعی ژێۆپۆلەتیکی ناوچەکە، نەخشەڕێگایەکی نوێ پێشکەش دەکات. ئەم نەخشەڕێگایە ڕەنگدانەوەی سەردەمێکی نوێیە لە بیرکردنەوەی سیاسی کوردی، سەردەمێک کە تیایدا دیپلۆماسی جێگای توندوتیژی دەگرێتەوە و دیالۆگ دەبێتە ئامرازی سەرەکی گەیشتن بە مافەکان.
لە کۆتاییدا، ستراتیژییەکەی نێچیرڤان بارزانی نوێگەرییەکی گرنگە لە بیرکردنەوەی سیاسی کوردیدا: دروستکردنی پردی پەیوەندی لە جیاتی بەربەست، بنیاتنانی ئاشتی لە جیاتی شەڕ، و دروستکردنی داهاتوویەک کە تیایدا کورد بەشێکی چالاک بێت.