هەرێم نیوز

بەڕێوەبەرایەتی گشتی تەندروستی سلێمانی رێنمایی نوێ بۆ خۆپارێزی لە نەخۆشی تای خوێنبەربون کە بە "نەخۆشیەکی کوشندە" وەسفدەکرێت بڵاوکردەوە و بەگوێرەی رێنماییەکانیش، بەهیچ شێوەیەک نابێت خانەوادە و خەڵک لەچواردەوری قەساب لەکاتی سەربڕینی ئاژەڵ کۆببنەوە و هاوکاری بکەن لە پارچە پارچەکردنی گۆشتدا و باشتریش وایە گۆشت دوای سەربڕینی ئاژەل بۆ ماوەی نیو کاتژمێر لە پلەی 4-8 پلەی سیلیزی هەڵبگیرێت و پاشان بەکاربهێنرێت.

تەندروستی سلێمانی لەڕاگەیەندراوێکدا بڵاویکردۆتەوە، بۆ دوربون لەنەخۆشی تای خوێن بەربون پێوستە لەکاتی سەربڕینی ئاژەڵ بۆ قوربانی ژمارەیەک رێنمایی جێبەجێبکەن:

رێنماییەکانی سەربڕینی ئاژەڵ:

یەکەم:
سەربڕینی ئاژەڵ پێویستە لەناوئەو سەربڕینخانانەدا بێت کە ڕێگە پێدراون وپزیشکی ڤێنتەرنەی سەرپەرشتی دەکات .

دوەم:
لەکاتی سەربڕینی ئاژەڵدا وە کەوڵکردن وەیان پارچە پارچەکردنی گۆشتەکەیدا پۆشینی جلوبەرگی خۆپارێزی وک ( دەستکێش، جزمە، سەدریەی  پلاستیک، ماسکی دەموچاو ) پێویستە لەبەرکرێن

سێیەم:
نابێت خانەوادە یان خەڵک کۆ ببنەوە لەچواردەوری سەربڕەکە (قەساب) وە نابێت هاوکاری بکەن لەکاتی سەربڕینی ئاژەڵ و پارچە پارچە کردنی گۆشت.

چوارەم:
بەبێ دەستکێش مامەڵە کردن لەگەڵ جەستەی ئاژەڵی سەربڕاو مەکە وە دوای پۆشینی دەستکێش و کەلوپەلی خۆپارێزی گۆشتەکە پارچەپارچە بکە و پاشان دەستت بەباشی بشۆ .

پێنجەم:
لابردنی پاشماوەی ئاژەڵە سەربڕاوەکان و دانانی کیسی داخراو فڕێدانی بۆ شوێنی تایبەت .

شەشەم:
بەکارهێنانی چەقۆ و تەختەی پارچەپارچەکردنی تایبەت بەگۆشت وەشتن و پاکژکردنەوەی تەختە و چەقۆکان دوای بەکارهێنان 

حەوتەم:
پاککردنەوەی ئەو شوێنەی ئاژەڵەکەی لێ سەردەبڕێت و بەتایبەت ئەوشوێنانەی خوێنی لێیە بەماددەی کلۆریین (بلیچ- موعجیزە)  ڕونکراوە.

هەشتەم:
باشتر وایە گۆشت دوای سەربڕینی ئاژەل بوماوەی نیو کاتژمێر لە پلەی 4-8 پلەی سەدی هەڵبگیرێت پاشان بەکاربهێنریت، بەڵام گۆشتی کوڵاو  هیچ کێشەی نیەو سەلامەتە و نابێتە هۆی توشبون بەنەخۆشی تای خوێنبەربون .

نۆیەم:
ئەگەر ئاژەڵ گەنە یان مێروی تری هەبو باشتر وایە نەیکریت یان سەری نەبڕێت بو دوربون لە نەخۆشی تای خوێنبەربون، ئەم نەخۆشیە لەنێوان ئاژەڵەکان دەگوازرێتەوە بۆ مرۆڤیش، بەهۆی گەنە و مێروەکانی کەلەسەر ئاژەڵەکان دەژین وەبەهۆی خوێن و گۆشتی ئاژەڵەکەوە دەگوازرێتەوە.