هەرێم نیوز
حکومەتی ئەڵمانیا ڕۆژی هەینی بەیاننامەیەکی بڵاوکردەوە و داوای لە هاوڵاتیانی وڵاتەکەی کرد ئێران بەجێبهێڵن و گەشت بۆ ئەو وڵاتە نەکەن.
بەگوێرەی ڕاپۆرتی ڕۆیتەرز، وەزارەتی دەرەوەی ئەڵمانیا هۆشداری دا کە ڕۆڵی بەرلین لە کاراکردنەوەی سزاکانی نەتەوە یەکگرتووەکان بۆ سەر کۆماری ئیسلامی ئێران، دەتوانێت ببێتە هۆی ڕێوشوێنی تۆڵەسەندنەوە لە دژی هاووڵاتییان و بەرژەوەندییەکانی لە تاران.
لە بەیاننامەکەدا هاتووە: “بەو پێیەی دەسەڵاتدارانی ئێران چەندین جار هەڕەشەیان لە دەرئەنجامەکانی ئەم هەنگاوە کردووە، ئەگەری زیانگەیاندن بە بەرژەوەندییەکانی ئاڵمان و هاووڵاتییان لە ئێران، ناتوانرێت ڕەت بکرێتەوە”.
وەزارەتی دەرەوەی ئەڵمانیا هەروەها ڕایگەیاندووە کە باڵیۆزخانەی وڵاتەکە لە تاران لە ئێستادا تەنها توانای پێشکەشکردنی خزمەتگوزاری کونسوڵگەری سنوورداری هەیە.
ئەو هۆشدارییە ڕۆژێک دوای دەستپێکردنی پڕۆسەی ٣٠ ڕۆژەی بەریتانیا، فەرەنسا و ئەڵمانیا هات بۆ گەڕاندنەوەی سزاکانی نەتەوە یەکگرتووەکان بۆ سەر ئێران، ئەمەش دەتوانێت گرژییەکان زیاتر بکات. لە کاتێکیشدا تا ئێستا شەڕی ئێران و ئیسرائیلیش کۆتایی نەهاتووە.