هەرێم نیوز
بە گوێرەی ئاژانسەکانی هەواڵ، بەهۆی بۆردومانەکانی دوێنێی ئیسرائیل بۆ سەر ناوچەیەکی سەنعای پایتەختی یەمەن، ئەحمەد غالب ئەلڕەهوی، سەرۆکوەزیرانی گرووپی حووسییەکان لە یەمەن کوژرا.
لەو بارەوە ئاژانسی "نۆڤۆستی" لە سەرچاوەیەکی نزیک لە خانەوادەی سەرۆکوەزیرانی گرووپی حووسییەکانی گواستەوە و ڕایگەیاند، ناوبراو دوێنێ لە ئاکامی بۆردومانێکی سوپای ئیسرائیل بۆ سەر خانوویەک لە ناوچەی حدە لە باشووری سەنعا کوژرا، بۆردومانەکە بووە هۆی کوژرانی 4 کەس لەنێوانیاندا ئەلڕەهوی و ژمارەیەک لە یاوەرەکانی.
هاوکات میدیا ئیسرائیلییەکان باس لە کوژرانی محەممەد عەبدولکەریم غەماری، سەرۆکی ئەرکانی هێزە چەکدارەکانی حووسییەکان دەکەن.
ئەلڕەهوی نزیکەی ساڵێک وەک سەرۆکوەزیرانی حکومەتی حوسیییەکانە، کە لەسەر ئاستی نێودەوڵەتی دانپێدانراوە. ڕۆڵی ئەو زیاتر ئیداری بوو نەک سەربازی یان سیاسی.
لەلایەکی دیکەوە، دیفێنس لاین کە ماڵپەڕێکی ئەمنییە و تیشک دەخاتە سەر کاروباری سەربازی و ئەمنی یەمەن، ڕایگەیاندووە، بەڵگە هەیە کە چەند بەرپرسێکی باڵای حکومەتی حوسییەکان لە هێرشێکدا بۆ سەر بینایەک لە کۆمەڵگەیەکی ئەمنی تەنیشت کۆشکی سەرۆکایەتی یەمەن لە شاری سەنعا کوژراون.
ئەو باڵەخانەیە یەکێک بوو لە ئامانجەکانی هێرشە ئاسمانییەکانی ڕۆژی پێنجشەممە.