هەرێم نیوز

ئەحمەد شەڕع، سەرۆککۆماری سوریا رایدەگەیانێت،  لەگەڵ ئەوەی گرووپە چەکدارەکانی عێراق دژی ئیرادەی خەڵکی سوریا ڕووبەڕووی شۆڕشەکەیان ببوونەوە،  بەڵام وڵاتەکەی هیچ هەڵوێستێکی نەرێنی بەرامبەریان وەرنەگرتووە  

چەند ڕۆژێک لەمەوبەر ئەحمەد شەڕع، سەرۆکی سوریا، لەگەڵ شاندێکی ڕاگەیاندنی عەرەبی کۆبووەوە و چەند کاتژمێرێک پێش ئێستا گرتە ڤیدیۆییەکانی بەشێک لە قسەکانی لەبارەی عێراقەوە بڵاو کرایەوە.

لەدیدارەکەدا، ئەحمەد شەڕع، سەرۆکی سوریا ڕایگەیاند، لە کاتی ڕاپەڕینی گەلی سوریا دژی ڕژێمی پێشوو،  زۆرێک لە گرووپە چەکدارەکانی عێراق دژی ئیرادەی خەڵکی سوریا وەستانەوە و کاتێک بۆ عێراق کشانەوە، دەستیان بە هێرشی ڕاگەیاندن لە دژمان کرد.

- ئێمە داوای لێبووردن یان تۆڵەسەندنەوەمان نەکردووە، وەک ئەوەی دوای جەنگەکان ڕوودەدات، بەڵکو دەرگای سووریامان بۆ هەمووان کردەوە و وەک دەوڵەتێکی دراوسێ مامەڵەمان لەگەڵ عێراقدا کرد، چونکە بەرژەوەندیی هاوبەشی کۆمەڵایەتی، ئابووری و ئەمنیی پێکەوە دەمانبەستێتەوە."

- ئێستا عێراق لەبەردەم ئاستەنگدایە و لەسەروبەندی هەڵبژاردنی پەرلەماندایە و ڕوون نییە چۆن بەڕێوەدەچێت گوشارێکی زۆریش لەسەر سوودانی هەیە و ئاماژەی نەرێنیش لە هەندێک لایەنەوە بەرامبەر سوریا هەیە.

- زۆر لایەن هەوڵیان دەدا سوود لە دۆخی سوریا وەربگرن و بابەتی تائیفی لە عێراقدا بقۆزنەوە، بەڵام من ڕەتم کردەوە و مامەڵەی ڕاستەخۆم لەگەڵ حکومەتی عێراق پێ باشتر بوو و تا ئێستا پابەندین پێوە.

رەخنەی سەرۆککۆماری سوریا ئاراستەی هەندێک لە لایەنی عێراقی بوو بەبێ ئەوەی ناویان بهێنێت و گوتی، "هەندێک لەو گرووپە چەکدارانەی بەڕوومان وەستانەوە، گرووپە چەکدارەکانی عێراق بوون. ئەوە یەکێک بوو لەو پرسانەی بە تەواوی لێی تێنەگەیشتم. کاتێکیش کشانەوە بۆ عێراق، لەوێ لەڕووی راگەیاندنەوە هێرشیان دەکردە سەرمان."

ئەحمەد شەرع ماوەی دەسەڵاتی محەممەد شیاع سوودانی لە عێراق بە جیاواز دەبینێت، بەو پێیەی وەکو خۆی دەڵێت، لەبەر ئەوەی سوودانى نەچووەتە نێو پارتە ئیسلامییەکان و لە ژینگەیەکی دامەزراوەییەوە ئەو پۆستەی وەرگرتووە.

بۆ یەکەم جار لە مانگی نیسانی ئەم ساڵ، سوودانی و شەرع لە دەوحەی پایتەختی قەتەر کۆبوونەوە.

شەرع راشیگەیاند، "عێراق ئێستا لەبەردەم ئاڵنگارییەکدایە کە هەڵبژاردنە و نازانرێت دۆخەکە دوای ئەوە چی لێدێت. گوشارێکی زۆر لەسەر سەرۆکوەزیرانی عێراقە، هەندێک ئاماژەی نەرێنی لەلایەن هەندێک لە لایەنەکانی عێراقەوە هەیە بەرامبەر بە سووریا، کە بەشێکی زۆری وەهمە و سیاسەتی سووریا بەو ئاراستەیەدا ناڕوات."