هەرێم نیوز
وەزیری دەرەوەی ئێران لە نامەیەکدا بۆ بەرپرسی سیاسەتی دەرەوەی یەکێتیی ئەورووپا نووسی: ئێران ئامادەیە دانوستانی دادپەروەرانە و هاوسەنگ دەستپێبکاتەوە، ئەگەر ڕۆژاوا ڕێگری نەکات.
عەباس عێراقچی، وەزیری دەرەوەی ئێران لە نامەیەکدا بۆ کایا کاڵاس، سەرۆکی سیاسەتی دەرەوەی یەکێتیی ئەورووپا، ئامادەیی ئێرانی بۆ دەستپێکردنەوەی دانوستانە دیپلۆماسییەکانی "دادپەروەرانە و هاوسەنگ" ڕاگەیاند، بەو مەرجەی لایەنە نەیارەکان "جددیبوون و نیازپاکی پیشان بدەن و خۆیان لە کردەوەی تێکدەرانە بەدوور بگرن کە شانسی سەرکەوتنی دانوستانەکان تێکدەدەن".
پرۆسەی چالاککردنەوەی سزاکانی نەتەوە یەکگرتووەکان بۆ سەر ئێران دەستیپێکردووە و مانگێکی دیکە دەخایەنێت.
بەریتانیا، فەرەنسا و ئەڵمانیا ڕۆژی پێنجشەممە پرۆسەیەکی 30 ڕۆژەیان دەستپێکرد بۆ سەپاندنەوەی سزاکانی نەتەوە یەکگرتووەکان بەسەر ئێراندا کە بە "میکانیزمی ماشە" یان "سناپباک" ناسراوە، بەهۆی بەرنامە ئەتۆمییەکەی تاران.
چونکە ئەو وڵاتانە باوەڕیان وایە ئێران دڵنیایی تەواوی پێنەداون بەوەی کە بەرنامە ئەتۆمییەکەی بۆ دروستکردنی چەکی ئەتۆمی بەکارناهێنێت. بەمەش ئەو سزایانە دەگەڕێتەوە بۆ سەر ئێران، کە پێشتر لە ساڵی 2015 بەهۆی ڕێککەوتنە ئەتۆمییەکەوە لەسەر ئێران هەڵگیرابوو.
بە چالاکبوونی ئەم سزایانە، سەروەت و سامانی ئێران لە دەرەوەی وڵات جارێکی دیکە بلۆک دەبێتەوە، کۆماری ئیسلامی ئێران مافی ئەوەی نابێت مامەڵەی کڕینی چەک ئەنجام بدات و هەر پەرەسەندنێکی بەرنامەی مووشەکی بالیستیکیش ڕووبەڕووی سزا دەبێتەوە. ئەم ڕێوشوێنانە لەگەڵ گەمارۆکانی دیکەدا، زیاتر گوشار دەخاتە سەر ئابووریی لەرزۆکی ئێران.