هەرێم نیوز
مای ساتۆ، هەواڵدەری تایبەتی نەتەوە یەکگرتووەکان بۆ کاروباری مافەکانی مرۆڤ لە ئێران، هۆشداریی دا لە رەهەندەکانی زیانە مرۆییەکان لە خۆپیشاندانی ئێرانییەکاندا و رایگەیاند کە خەمڵاندنە بەردەستەکان رەنگە زۆر زیاتر بن لە ئامارە سەرەتاییەکان.
ئەم بەرپرسەی نەتەوە یەکگرتووەکان روونی کردەوە کە هەڵسەنگاندنە سەرەتاییەکان ئاماژە بۆ ئەوە دەکەن ژمارەی گیانلەدەستدراوان نزیکەی پێنج هەزار کەس یان زیاتر بێت، بەڵام ئەو زانیارییانەی لە پزیشکانی ناوخۆی وڵاتەکەوە بەدەست گەیشتوون، نیشانی دەدەن کە رەنگە ژمارەی قوربانییەکان لانی کەم گەیشتبێتە 20 هەزار کەس.
جەختی لەوە کردەوە کە جیاوازیی نێوان ئامارە فەرمییەکان و راپۆرتە مەیدانییەکان، نیگەرانییەکی جدیی سەبارەت بە فراوانیی توندوتیژییەکان و رێژەی راستیی زیانە گیانییەکان دروست کردووە.