هەرێم نیوز 

بەپێی ڕاپۆرتێکی ڕۆژنامەی "نیویۆرک تایمز" کە لە بەرپرسانی ئەمریکی و ئەوروپییەوە گواستویەتییەوە، لە میانی گفتوگۆکاندا چەند داواکارییەکی توند ئاڕاستەی ئێران کراون، لەوانە: ڕاگرتنی هەمیشەیی پیتاندنی یۆرانیۆم و کۆتاییهێنان بە پشتگیریکردنی گروپە چەکدارە هاوپەیمانەکانی تاران لە ڕۆژهەڵاتی ناوەڕاست.
ئیدارەی سەرۆک دۆناڵد ترەمپ بە مەرجی توند، ئێرانی خستووەتە بەردەم دوو بژاردەی سەخت: یان دانوستان بۆ دوورکەوتنەوە لە ڕووبەڕووبوونەوەی سەربازی ڕاستەوخۆ، یان چوون بەرەو پەرەسەندنی گرژییەکان. ئەم مەرجانە لە ڕێگەی نێوەندگیرە هەرێمییەکانەوە بە تاران گەیەندراون.
گرنگترین داواکارییەکانی ئەمریکا:
• دۆسیەی ئەتۆمی: ڕاگرتنی پیتاندنی یۆرانیۆم لەناو خاکی ئێران، گواستنەوەی کۆگاکانی یۆرانیۆمی پیتێنراو بۆ وڵاتێکی سێیەم یان دانانی لەژێر چاودێرییەکی نێودەوڵەتی توند، و ڕێگەدانی بێ مەرج بە پشکنەرە نێودەوڵەتییەکان بۆ چوونە ناو دامەزراوەکان.
• مووشەکی بالیستی: تێکشکاندنی مووشەکە بالیستییە دوورهاوێژەکان کە واشنتن و ئیسرائیل بە هەڕەشەیەکی ڕاستەوخۆ بۆ سەر ئاسایشی ناوچەکە دایان دەنێن.
• فڕۆکەی بێفڕۆکەوان (درۆن): دانانی سنوورێکی توند بۆ بەرهەمهێنان و هەناردەکردنی فڕۆکەی بێفڕۆکەوان.
• ڕۆڵی هەرێمی: بڕینی هەموو جۆرە پشتگیرییەکی دارایی و سەربازی بۆ میلیشیاکانی وەک (حەماس، حیزبوڵڵا، و حوسییەکان) و پابەندبوون بە سیاسەتی دەستوەرنەدان لە کاروباری وڵاتانی دراوسێ.
• کاروباری ناوخۆ: مەرجێکی تر بریتییە لە ڕاگرتنی توندوتیژی دژی خۆپیشاندەران و دوورکەوتنەوە لە سەرکوتکردنی ناڕەزایەتییە ناوخۆییەکان.
هەڵوێستی ئێران:
تاران لە لایەکەوە ئامادەیی خۆی بۆ دانوستان نیشان دەدات، بەڵام لە هەمان کاتدا زۆرێک لەو داواکارییانە بە "نا لۆژیکی" ناو دەبات. ئەمەش وای کردووە دەرگای هەموو ئەگەرەکان بە کراوەیی بمێنێتەوە، لەوانەش پێکدادانی سەربازی