هەرێم نیوز
باڵیۆزخانەی ویلایەتە یەکگرتووەکانی ئەمریکا لە بەغدا، ئەمشەو هۆشدارییەکی بەپەلە و توندی ئاراستەی هاووڵاتیانی وڵاتەکەی کرد لە عێراق و هەرێمی کوردستان، سەبارەت بە بوونی مەترسیی ئەمنی و کردەوەی تیرۆریستی.
باڵیۆزخانەی ئەمریکا ڕایگەیاندووە، زانیارییان لەبەردەستە کە میلیشیا تیرۆریستییەکانی هاوپەیمانی ئێران، ڕەنگە هەوڵی بەئامانجگرتنی ئەو هۆتێلانە بدەن کە هاووڵاتیانی بیانی لە هەرێمی کوردستان ڕووی تێدەکەن. داوا لە ئەمریکییەکان کراوە بە خێرایی پێداچوونەوە بە بژاردەکانی نیشتەجێبوونیاندا بکەن.
لە ڕاگەیەندراوەکەدا هاتووە: "بە توندی هانی هاووڵاتیانی ئەمریکی دەدەین کە هەر کاتێک بۆیان گونجا و بە شێوەیەکی سەلامەت، ناوچەکە جێبهێڵن." ئەمەش وەک ئاماژەیەک بۆ جددییەتی هەڕەشەکان لەم قۆناغەدا دەبینرێت.
بۆ ئەو ئەمریکییانەی کە بڕیار دەدەن لە عێراق بمێننەوە، باڵیۆزخانەکە چەند ڕێنماییەکی دەرکردووە:
• پێویستە ئامادەبن بۆ مانەوە لە شوێنە ئارامەکان بۆ ماوەیەکی درێژخایەن.
• دابینکردنی بڕی پێویست لە خۆراک، ئاو، دەرمان و پێداویستییە سەرەکییەکان.
• دوورکەوتنەوە لەو شوێنانەی کە بیانییەکان بە بەردەوامی سەردانی دەکەن.