هەرێم نیوز
ڕۆژنامەیەکی ئەمریکی ئاشکرای کرد، دۆناڵد ترەمپ پێشنیازێکی ئێرانی بۆ ئاگربەستی حەوت ڕۆژە ڕەتکردووەتەوە و نیازی وایە دوای هەڵبژاردنەکانی نیوەی خول بۆردومانەکانی سەر ئێران دەست پێ بکاتەوە، ئەمەش لە کاتێکدایە کە دانوستانە ناڕاستەوخۆکانی نێوانیان بەردەوامە.
ڕەتکردنەوەی ئاگربەست و گومانەکانی ترەمپ
ڕۆژنامەی (وۆڵ ستریت جۆرناڵ) لە زاری بەرپرسانی ئەمریکاوە بڵاوی کردەوە: دۆناڵد ترەمپ، سەرۆکی ئەمریکا پێشنیازێکی ئێرانی بۆ ڕاگەیاندنی ئاگربەست بۆ ماوەی حەوت ڕۆژ ڕەتکردووەتەوە، هاوکات بە یاریدەدەرەکانی ڕاگەیاندووە کە پێشبینی دەکات دوای تەواوبوونی هەڵبژاردنەکانی نیوەی خول، بۆردومانەکانی سەر ئێران دەست پێ بکاتەوە.
ڕۆژنامەکە ئاماژەی بەوە داوە، دۆناڵد ترەمپ لە کۆبوونەوە داخراوەکاندا گومانی هەیە لەوەی ئێران داواکارییەکانی جێبەجێ بکات، سەرەڕای ئەوەش، واشنتن و تاران لە ڕێگەی نێوەندگیرەکانەوە بەردەوامن لە دانوستانەکانیان کە دۆسیەی ئەتۆمیش لەخۆ دەگرێت.
گەمارۆی دەریایی و ئاسایشی کەشتیوانی
لە ڕاپۆرتەکەدا هاتووە: هەوڵەکانی ئەمریکا بۆ دەستەبەرکردنی تێپەڕبوونی سەلامەتی کەشتییە نەوتهەڵگرەکان لە گەرووی هورمز، پێویستیی بەپەلەی بۆ گەیشتن بە ڕێککەوتن کەم کردووەتەوە، لە هەمان کاتدا واشنتن بە تاران و نێوەندگیرەکانی ڕاگەیاندووە کە سەرۆکی ئەمریکا بە هیچ شێوەیەک نیازی هەڵگرتنی گەمارۆ دەریاییەکانی نییە.
بە گوتەی بەرپرسە ئەمریکییەکان، واشنتن پێی وایە گوشارە ئابوورییەکان لە کۆتاییدا تاران ناچار بە واژۆکردنی ڕێککەوتنێک دەکات، بەڵام لەگەڵ بەردەوامیی شەڕ و دەرکەوتنی ئەنجامی هەڵبژاردنەکانی نیوەی خولدا، ئەگەری هەیە هەڵوێستەکانی سەرۆکی ئەمریکا گۆڕانکارییان بەسەردا بێت.