پەیامی سەرۆک بارزانی، و لۆژیکی چارەسەری
پەیامی ئەمڕۆی سەرۆک مەسعود بارزانی بۆ پارتی و یەکێتی، لە قۆناغێکی هەستیاردا، بانگهێشتێکە بۆ گەڕانەوە بۆ مێزی گفتوگۆ و دانانی بەرژەوەندیی گشتی لە سەرووی بەرژەوەندیی حیزبییەوە. ئەم پەیامە تەنها بانگەوازێک نیە بۆ دیالۆگ، بەڵکو هەوڵێکە بۆ گۆڕینی لۆژیکی ناکۆکی بە لۆژیکی چارەسەری.
هاوبەشایەتی لە حوکمڕانی و ڕێزگرتن لە پێگەی هێزە سیاسییەکان گرنگە، بەڵام نابێتە مافی هەمیشەیی دەستگرتن بە دەسەڵات، بەبێ لەبەرچاوگرتنی ئەنجامی هەڵبژاردن. هەروەها، پەڕلەمان و دامەزراوە دەستورییەکان نابێت ببنە بەندی ڕەزامەندیی حیزبەکان؛ ناکۆکییەکان دەبێت لە ڕێگەی یاسا و دامەزراوەکانەوە چارەسەر بکرێن، نەک بە هەڕەشەی دروستکردنی دوو دەسەڵات و دوو بەڕێوەبەرایەتی.
بافڵ تاڵەبانی و یەکێتیی نیشتمانی مافی ئەوەیان هەیە داواکارییان هەبێت، ڕەخنە بگرن و تەنانەت ببنە ئۆپۆزسیۆنێکی بەهێز؛ بەڵام گواستنەوە لە ناکۆکیی سیاسییەوە بۆ دابەشکردنی دامەزراوەکان، چارەسەری قەیران نییە. لە هەمان کاتدا، پارتی دیموکراتی کوردستانیش دەبێت هاوبەشایەتی بە مانای پشتگوێخستنی هێزەکانی دیکە نەزانێت و دەرفەتی بەشداریی سیاسیان بۆ دابین بکات.
ئەوەی لەم قۆناغەدا گرنگە، پاراستنی یەکگرتوویی دامەزراوەکان، داهاتی گشتی، موچە و خزمەتگوزارییەکانە لە کاریگەریی ململا‌نێی حیزبی. کوردستان پێویستی بە دوو دەسەڵات نییە، بەڵکو پێویستی بە حوکمڕانیی باشتر، دامەزراوەی بەهێز و متمانەی سیاسییە.