هەرێم نیوز

خەڵك كاتی نەماوە بۆ یەكتر ناسین، نازانن لە ئاست یەكدا بووەستن، كاتیان نەماوە بۆ وردبوونەوە لەیەك، بۆسەرنجدان لەیەك... ئەم ڕۆژانە خەڵك بەلای یەكدا تێدەپەڕن و وادەزانن یەكتریان ناسیوە... من خۆم گەردونێكی بچوكم، ئاسمانم ھەیە ساماڵ و شین، ھەندێجاریش ھەوری ڕەش دایگرتووە و تیامدا دەبارێت.

سەدان شار و شارۆچكەم ھەیە، كۆڵانی تەنگەبەر، مەیدانی چۆڵ، شەقامی پڕ یادەوەری... ڕۆژێك بەھارم و ڕۆژێك پاییز، جاری واھەیە ئەوەندە خوێنسارد دەبم، لە دڵما بەفر دەبارێت، ھەندێجاریش ئەوەندە خوێنگەرم، خەریكە بەخۆم دەسووتێم...

تۆ چۆن بەلای ئەم ھەمووەدا بە خێرایی تێدەپەڕیت و وادەزانیت منت ناسیوە؟ مرۆڤ بۆئەوەی یەك بناسێت دەبێت كاتی ھەبێت تا لە ھەیوانی دڵی یەكتردا دانیشێت، كاتی ھەبێت بە كوچە و كۆڵانی ڕۆحی یەكتردا بگەڕێت، ھەندێجار لەیەكتردا بگاتە بنبەست و بگاتە ئەو كۆڵانەی دەرناچێت.

دەبێت بتوانێت ببێتە میوانی ئەو عەسرانەی كەس تاقەتی نییە میوان بێت، چرای ئەو شەوانەی لە تاریكیدا جێماوین و بەھەرچوارلادا پەل دەكوتین، ھەناسەیەك بۆ ئەو كاتانەی ژیان ھەناسەی تیا نەماوە... تۆ من ناناسیت.. ئەو ناناسیت.. لەوەش خراپتر، كاتت نەماوە بۆ ئەوەی خۆشت بناسیت.

ھێمن قەرەداغی