هەرێم نیوز

وەزارەتی دارایی حكومەتی هەرێمی كوردستان رایگەیاند: كەمێك لەمەوبەر بڕی 250 ملیار دینار لە ڕێگای بانكی ڕافیدەینەوە خرایە سەر  هەژماری بانكی وەزارەتی دارایی و ئابوری هەرێمی كوردستان لە لقی هەولێری بانكی ناوەندی عێراق.

وا بڕیارە لەلایەن هەردوو بانكی رەشید و بانكی تی بی ئای 450 ملیار دیناری دیكە رەوانە بكرێت، پێشتریش مەسرور بارزانی، سەرۆكی حكومەتی هەرێمی كوردستان، لەكۆبوونەوەی ئەنجومەنی وەزیران، وەزارەتی دارایی راسپارد كە بەگەیشتنی پارەكە دەست بەدابەشكردنی مووچەی مووچەخۆرانی هەرێمی كوردستان بكرێت.

شایانی باسە هەفتەی رابردوو ئاوات شێخ جەناب، وەزیری دارایی و ئابوری هەرێمی كوردستان دڵنیایی دایە مووچەخۆران و رایگەیاند: ئێمە بە دابەشكردنی مووچەی مانگی (7) دەست بەدابەشكردنی پارەكەی بەغدا دەكەین و بەرگریكاری سەرسەختی مافی مووچە خۆرانی هەرێم دەبین. 

دوای سەردانی شاندی باڵای حکومەتی هەرێمی کوردستان بە سەرۆکایەتی مەسرور بارزانی بۆ بەغدا و کۆبوونەوەی لەگەڵ هەر سێ سەرۆکایەتییەکەی عێراق و لایەنە سیاسییەکان، لە کۆبوونەوەی 17/9/2023، ئەنجومەنی وەزیرانی عێراق بڕیاری ناردنی مووچەی سێ مانگی مووچەخۆرانی هەرێمی کوردستان درا، کە بۆ هەر مانگێک 700 ملیار دینار دیاریکراوە، کۆی گشتی دەکاتە دوو ترلیۆن و 100 ملیار دینار، بەڵام لە قۆناغی یەکەمدا 700 ملیار دینار لە رێگەی هەردوو بانکی رەشید و تی بی ئای رافیدەین/ لقی هەولێر، وەک قەرز دەخرێتە سەر هەژماری بانکی وەزارەتی دارایی هەرێمی کوردستان.