هەرێم نیوز
حكومه‌تی هه‌رێمی كوردستان ڕایگه‌یاند، له پێناو سەلامەتیی گشتیی و ئاسایشی تاك و كۆمەڵگە، له‌مه‌ودوا ڕێگە بە هیچ كەناڵ و پەڕەی تۆڕی كۆمەڵایەتی نادرێت، دیمەن و ڤیدیۆی ڕوداوی تاوان و تۆمەتباران و شوێن و كاتی تاوانەكان بڵاو بكەنەوە و ڕوماڵی بکەن.
بەپێی گشتاندنێكی سەرۆكایەتیی دیوانی ئەنجومەنی وەزیران، كە ئاراستەی گشت وەزارەت و دامودەزگاکانی حکومەت كراوە، لەمەودوا ڕێگە بە هیچ كەناڵ و پەڕەی تۆڕی كۆمەڵایەتی نادرێت، دیمەن و ڤیدیۆی ڕوداوی تاوان و تۆمەتباران و شوێن و كاتی تاوانەكان بڵاو بكەنەوە و ڕوماڵی بکەن.
ئاماژه‌ی به‌وه‌شكردوه، ئه‌و گشتاندنە لەسەر بنەمای داواكارییەكی دەستەی سەربەخۆی مافی مرۆڤ بۆ ئەنجومەنی وەزیران کراوە، كە تێیدا داوای كردوە، بۆ پاراستنی ڕێڕەوی لێكۆڵینەوە و لایەنی دەرونی و كۆمەڵایەتیی ژیانی خەڵك و نەقۆستنەوەی ڕوداوەكان بۆ دوبەرەكیی سیاسی و كۆمەڵایەتی، ڕێگە نەدرێت ڕوماڵی ڕاستەوخۆ و ناڕاستەوخۆی تاوان و تۆمەتباران بكرێت.
له ڕاگه‌یه‌ندراوه‌كه‌دا هاتوه، بڕیاره‌كه له پێناو سەلامەتیی گشتیی و ئاسایشی تاك و كۆمەڵگە، رێزگرتن لە رێرەوی لێکۆڵینەوە یاساییەکان و بنەماکانی مافی مرۆڤ دەرچوە.