هەرێم نیوز
کارەکانی دروستکردنی گەورەترین نەخۆشخانەی تایبەت بە چارەسەری شێرپەنجە لە شاری هەولێر گەیشتووەتە قۆناغی کۆتایی. ئەم پڕۆژەیە کە بە ستانداردە جیهانییەکان و لەژێر چاودێری ڕاستەوخۆی سەرۆکی حکومەتی هەرێمی کوردستان جێبەجێ دەکرێت، بڕیارە پێش وادەی دیاریکراوی خۆی تەواو بکرێت و خزمەتگوزارییەکانی پێشکەش بکات.
بەپێی زانیارییەکان، کارە بنەڕەتییەکانی وەک کارەبا، ئاو و پێداویستییەکانی تری باڵەخانەکە تەواو بوون و لە قۆناغی داهاتوودا دەست بە دابینکردنی ئامێرە پزیشکییە پێشکەوتووەکان دەکرێت.
هەرچەندە بڕیاربوو پڕۆژەکە لە ماوەی سێ ساڵدا تەواو بێت، بەڵام خێرایی کارەکان وایکردووە کە تەنها لە ماوەی ساڵێک و شەش مانگدا، قەبارەی کارێکی ئەوەندە ئەنجام بدرێت کە بڕیاربوو لە ساڵێک و ١٠ مانگدا تەواو بێت.
ئەم نەخۆشخانەیە کە گەورەترین ناوەندی تەندروستییە لەسەر ئاستی هەرێم و عێراق، توانای لەخۆگرتنی ٢٠٠ تەختی هەیە. پڕۆژەکە هەموو بەشەکانی دەستنیشانکردنی زوو و چارەسەرکردنی نەخۆشییەکانی شێرپەنجە لەخۆ دەگرێت، ئەمەش وەک بازدانێکی گەورە لە کەرتی تەندروستی ناوچەکە دادەنرێت.