هەرێم نیوز
بەپێی ڕاپۆرتە ڕۆژنامەوانییەکان، کۆشکی سپی لە ئامادەکاریدایە بۆ فرۆشتنی پاکێجێکی گەورەی چەک و تەقەمەنی بە بەهای ٢.٨ ملیار دۆلار بە ئیسرائیل.
بەڕێوەبەرایەتیی دۆناڵد ترەمپ بە شێوەیەکی نافەرمی لیژنەکانی کۆنگرێسی لەم پلانە ئاگادار کردووەتەوە، کە بە یەکێک لە گەورەترین گرێبەستە سەربازییەکانی نێوان هەردوو وڵات لەم ساڵانەی دواییدا دادەنرێت و ئامانج لێی بەهێزکردنی توانای ئۆپەراسیۆنەکانی سوپای ئیسرائیلە لە ناوچەکەدا.
ئەم پاکێجە سەربازییە لە نزیکەی ٦٠ هەزار یەکەی تەقەمەنیی قورس پێکدێت.
لە نێوانیاندا ٤٠ هەزار بۆمبی کێش دوو هەزار پاوەندی هەن، کە دابەشبوون بەسەر ٢٠ هەزار بۆمبی جۆری دەنگی و وێرانکەری (MK-84) و ٢٠ هەزار بۆمبی جۆری (BLU-117) کە بە بەرگێکی گەرمی داپۆشراون بۆ سەلامەتیی زیاتر لەکاتی هەڵگرتندا.
هەروەها ٢٠ هەزار کڵاوەی جۆری (I-2000) لەخۆدەگرێت کە تایبەتن بە بڕین و تەقاندنەوەی پێگە ژێرزەمینی و کۆنکرێتییەکان. ئەم هەنگاوەی کۆشکی سپی پێچەوانەی سیاسەتی پێشووی جۆ بایدنە، کە لە ساڵی ٢٠٢٤دا بەهۆی نیگەرانییەکان لە کەوتنەوەی قوربانیی مەدەنی، ناردنی ئەم جۆرە بۆمبانەی بۆ ئیسرائیل ڕاگرتبوو.
لە ڕوانگەی ئیسرائیلەوە، ئەم چەکانە پێداویستییەکی ستراتیژین بۆ تێکشکاندنی ژێرخانی سەربازیی گرووپە چەکدارەکانی وەک حەماس و حیزبوڵڵا، بەتایبەتی کە ئەو گرووپانە تۆڕێکی فراوانی تونێل و پێگەی ژێرزەمینی لە ژێر ناوچە مەدەنییەکاندا بەکاردەهێنن.
جۆن سپێنسەر، شارەزای جەنگی شارەکان، ئاماژە بەوە دەکات کە ڕەخنەگرتن لە جۆرێکی دیاریکراوی چەک "هەڵە و مەترسیدارە"، چونکە تێکشکاندنی ئەو تۆڕە بەرگرییە ژێرزەمینییانەی کە بە پشتیوانیی کۆماری ئیسلامیی ئێران دروستکراون، تەنها بەم جۆرە بۆمبە قورس و کونکەرانە دەکرێت.
هاوکات، ئەم هەنگاوە وەک پەیامێکی ڕوونی واشنتن دەبینرێت بۆ نەیارانی ئیسرائیل، کە ئەمریکا لە پشتیوانیکردنی هاوپەیمانەکەی پاشگەز نابێتەوە.
لە ناوخۆی ئەمریکاشدا، ئەم بڕیارە کاردانەوەی توندی لێکەوتووەتەوە.
ژمارەیەک لە یاسادانەرانی پارتی دیموکرات، لەوانە پرامیلا جایاپاڵ و کریس ڤان هۆلن، بە توندی دژی ئەم گرێبەستە وەستاونەتەوە و هەوڵی کۆکردنەوەی پشتیوانی دەدەن بۆ ڕاگرتنی لە کۆنگرێس، بە پاساوی ئەوەی ئەم چەکانە دەبنە هۆی وێرانکاریی زیاتر.
لە بەرامبەردا، بەڕێوەبەرایەتییەکەی ترەمپ پێداگرە لەسەر ئەوەی کە پاراستنی ئاسایشی ئیسرائیل لە سەرووی فشارە ناوخۆییەکانی دیموکراتەکانەوەیە، و پێشکەشکردنی ئەم پاکێجە بە زامنی لەناوبردنی هەڕەشە ئەمنییەکانی سەر ئیسرائیل و گەڕاندنەوەی سەقامگیری بۆ ناوچەکە دەزانێت.