هەرێم نیوز 

بڕیاری دۆناڵد ترامپ، سەرۆکی ئەمریکا، بۆ ڕەتکردنەوەی پێشنیازە فەرمییەکەی ئێران بە مەبەستی کردنەوەی گەرووی هورمز و ڕاگرتنی شەڕ، پرسیاری قووڵی لەسەر ئایندەی قەیرانەکە دروستکردووە کە ئایا ناوچەکە بەرەو دانوستانێکی نوێ بە مەرجی قورستر دەڕوات، یان پێکدادانە سەربازییەکان لە دوای ٧ مانگ لە هەڵگیرسانی جەنگ قۆناغێکی توندتر بەخۆیانەوە دەبینن.

ترامپ لە کۆشکی سپی بە ڕوونی ڕایگەیاند کە پێشنیازەکەی تارانی ڕەتکردووەتەوە بە پاساوی ئەوەی ئێران "زیانی گەورەی بەرکەوتووە و لەژێر گوشارێکی زۆردایە"، لە کاتێکدا ئەمریکا دەستکەوتی بەرچاوی بەدەستهێناوە؛ بەڵام لە هەمان کاتدا جەختی لەوە کردەوە کە هێشتا دەیەوێت بگاتە ڕێککەوتن.

پێشنیازەکەی تاران کە لە ڕێگەی نێوەندگیریی قەتەرەوە گەیەندرابووە شاندی ئەمریکا لە نیویۆرک، داوای مۆڵەتی هەفتەیەکی دەکرد بۆ کردنەوەی گەرووی هورمز و ڕاگرتنی ئۆپەراسیۆنە سەربازییەکان (لەوانەش لە گۆڕەپانی لوبنان)، لە بەرامبەر هەڵگرتنی گەمارۆی سەر بەندەرەکانی ئێران، ئازادکردنی پارە سڕکراوەکان و لابردنی سزاکانی نەوت؛ پلانێک کە مەسعود بزشکیان، سەرۆککۆماری ئێران، ڕایگەیاندبوو بە هەماهەنگیی ڕاستەوخۆ لەگەڵ ڕێبەری کۆماری ئیسلامی ئامادە کراوە.

چاودێران ئاماژە بەوە دەکەن کە هەڵوێستەکەی ترامپ مانای کۆتاییهاتنی تەواوی ڕێڕەوە دیپلۆماسییەکان نییە، بەڵکو هەوڵێکە بۆ بەرزکردنەوەی سەقفی داواکارییەکانی ئەمریکا بەر لە چوونە ناو هەر ڕێککەوتنێک. بەربەستی سەرەکی لەم نێوەندەدا تەنیا گەرووی هورمز نییە، بەڵکو دۆسیەی ئەتۆمییە؛ لە کاتێکدا ترامپ بەدەستهێنانی چەکی ئەتۆمی بە هێڵی سوور دەزانێت، تاران بە فەرمی ڕایگەیاندووە تەنانەت لە ئەگەری ڕاگرتنی جەنگیشدا، دەستبەرداری پیتاندنی یۆرانیۆم نابێت و ڕێگە بە ناردنە دەرەوەی یۆرانیۆمی پیتێنراو بە ڕێژەی بەرز نادات.

لە بەرامبەر ئەگەری دەستکاریکردنی پێشنیازەکە و گەڕانەوەی نێوەندگیرەکان، بژاردەی پەرەسەندنی سەربازییش بە بەهێزی دەمێنێتەوە؛ بەتایبەت دوای ئەوەی ڕۆژنامەی "وۆڵ ستریت جۆڕناڵ" لە زاری بەرپرسانی ئەمریکاوە بڵاویکردەوە کە ترامپ بە یاریدەدەرەکانی وتووە لە دوای هەڵبژاردنەکانی نیوەی خول لە مانگی تشرینی دووەم، ئەگەری زۆرە دەست بە بۆردومانکردنی چڕی ئێران بکاتەوە ئەگەر تاران بە تەواوی مەرجەکانی واشنتن ڕازی نەبێت. لەم قۆناغەدا، بەردەوامیی گەمارۆی سەر بەندەرەکان و پەککەوتنی گەرووی هورمز، کێبڕکێی نێوان گوشاری ئابووری و هەڕەشەی سەربازی دەباتە لوتکە تا ئەو کاتەی دەردەکەوێت کام لایەن سازشی سەرەتایی پێشکەش دەکات.