هەرێم نیوز
ماڵپەڕی هەواڵی "ئاکسیۆس"ی ئەمریکی ڕایگەیاند، دانوستانەکانی دەوحە سەبارەت بە ئێران "بە باشی بەڕێوە چوون و ئەرێنین"، لە کاتێکدا مەترسیی ئەوە لە ئارادایە لە دوای هەڵبژاردنەکەی نیوەی خولی کۆنگرێس، هێرشەکانی ئەمریکا و ئیسرائیل بۆ سەر ئێران دەست پێ بکەنەوە.
وردەکاریی دانوستانەکانی دەوحە و ڕۆڵی قەتەر
ماڵپەڕی ئاکسیۆس لە زاری دیپلۆماتکارێکی بەشدار لە دانوستانەکان بڵاوی کردەوە، ناوبژیوانەکان لە ئێستادا کار دەکەن بۆ پڕکردنەوەی ناکۆکییەکان و چارەسەرکردنی ئەو نیگەرانییانەی لەلایەن هەردوولاوە لە کۆبوونەوەکانی ڕۆژی شەممەدا ورووژێنراون.
پێشتر بەرپرسێکی ئاگادار بە ئاژانسی "ڕۆیتەرز"ی ڕاگەیاندبوو، دانوستانکارانی ئێران بۆ سێیەم ڕۆژ لەسەر یەک لە دەوحەی پایتەختی قەتەردا بوون بۆ ئەنجامدانی گفتوگۆ لەگەڵ ناوبژیوانانی قەتەری، بە ئامانجی گەیشتن بە ڕێککەوتنێک بۆ کۆتاییهێنان بە شەڕی ئەمریکا و ئیسرائیل دژی ئێران.
بەپێی زانیارییەکان، ناوبژیوانانی قەتەر ڕۆژی هەینی لە تاران وتووێژیان لەگەڵ بەرپرسانی ئێران کردووە پێش ئەوەی ڕۆژی شەممە دانوستانەکان بگوازنەوە بۆ دەوحە. ئەو بەرپرسە ئاماژەی بەوەش کردووە، گفتوگۆکان لە ڕێگەی پەیوەندییە بەردەوامەکانەوە لەگەڵ واشنتۆن هەماهەنگ دەکرێن.
ئامادەکارییەکان بۆ هێرشی سەربازی و پەیامەکەی ترەمپ
ڕاپۆرتە ڕۆژنامەوانییەکان لە وێنەی "نیویۆرک تایمز" و "ئاکسیۆس" ئاماژەیان بەوە کردووە، سوپای ئەمریکا و ئیسرائیل سەرقاڵی داڕشتنی پلانی نوێن بۆ هێرشکردنە سەر ئێران، و بەرپرسانی واشنتۆن هۆشدارییان داوەتە وڵاتانی ناوچەکە و کەنداو کە خۆیان بۆ ئەگەری هێرشێکی چڕ و کورت ئامادە بکەن.
لەلایەکی دیکەوە، دۆناڵد ترەمپ سەرۆکی ئەمریکا ڕای گەیاندبوو: "یان لەگەڵ تاران دەگەینە ڕێککەوتن یان هێرش دەکەینە سەریان،" هاوکات ئاماژەی بەوەش کردبوو کە هێرشەکان بە شێوەیەکی کاتی بۆ ڕەخساندنی دەرفەتی دانوستان ڕاگیراون.
هەروەها بەپێی میدیا ئەمریکییەکان، جەی دی ڤانس، جێگری سەرۆکی ئەمریکا بە ڕاسپاردەی ڕاستەوخۆی ترەمپ پەیامێکی ئاراستەی موحسین ڕەزایی کردبوو بۆ دەستپێکردنەوەی دانوستانەکانی ئاشتی و دوورکەوتنەوە لە جەنگێکی نوێ، بەتایبەتی بەر لە بەڕێوەچوونی هەڵبژاردنەکانی نیوەی خولی کۆنگرێس.