لە پەرەسەندنێکی مەترسیدار و بێپێشینەدا، هێرشکردنە سەر ماڵی نێچیرڤان بارزانی، تەنها بەئامانجگرتنی کەسایەتییەکی سیاسی نییە، بەڵکو هێرشێکی ڕاستەوخۆیە بۆ سەر پایەکانی سەقامگیری، ئارامی و قەوارەی نیشتمانیی هەرێمی کوردستان. نێچیرڤان بارزانی تەنها سەرکردەیەکی ناوخۆیی نییە، بەڵکو لەسەر ئاستی ڕۆژهەڵاتی ناوەڕاست وەک یەکێک لە ژیرترین و کاریگەرترین پیاوانی دەوڵەت دەناسرێت کە هەمیشە وەک پارێزەری ئاشتی و ئەندازیاری ئاوەدانی و خزمەتگوزاری لە کوردستان و عێراقدا دەورێکی باڵای بینیوە.
ئەم هێرشەی کە لە لایەن ئێران و گرووپە وابەستەکانیانەوە ئەنجامدراوە، لە کاتێکدایە کە ناوچەکە بەهۆی ململانێی نێوان ئیسرائیل و ئەمریکا لەگەڵ ئێراندا لەبەردەم مەترسیی جەنگێکی گشتگیردا دەکوڵێت. نێچیرڤان بارزانی، وەک سەرکردەیەکی ستراتیژی، بەردەوام جەختی لەوە کردووەتەوە کە کوردستان بەشێک نییە لەم شەڕە و نابێت ببێتە گۆڕەپانی یەکلاکردنەوەی ململانێی هێزەکان. ئەم بەئامانجگرتنە، کاردانەوەیەکی دوژمنکارانەیە بەرانبەر بەو بێلایەنییە ژیرانەیەی کە سەرۆکی هەرێم پەیڕەوی دەکات؛ ئەوانەی لە پەرەپێدانی هەرێم و پێگەی بەهێزی کورد دەترسن، دەیانەوێت فشار بخەنە سەر هەموو کوردستان بۆ ئەوەی پەلکێشی ناو جەنگێکی وێرانکەری بکەن.
نێچیرڤان بارزانی هەمیشە ڕۆڵی "کۆکەرەوە" و "ئاشتیخواز"ی گێڕاوە و دەزانێت کە تێوەگلانی کوردستان لەم جەنگەدا، تەنها وێرانکاری بۆ خەڵکەکەی بەدوای خۆیدا دەهێنێت. ئەم کردەوە تێکدەرانەیە نەک هەر ناتوانێت پێگەی ئەو وەک سەرکردەیەکی ئاشتیخواز لاواز بکات، بەڵکو سەلمێنەری ئەوەیە کە سیاسەتەکانی توانیویەتی ڕێگری بکات لەوەی نیشتمان ببێتە سووتەمەنیی جەنگی ئەوانی تر. بێدەنگی بەرامبەر ئەم جۆرە دەستدرێژیانە، ئاماژەیەکی مەترسیدارە بۆ تێکدانی دوا چرکەکانی دیپلۆماسی و ئارامی لە ناوچەکەدا، چونکە لێدان لە نێچیرڤان بارزانی، لێدانە لەو ئارامییەی کە هەموو تاکێکی کورد شانازیی پێوە دەکات.