هەرێم نیوز

پێشنیوەڕۆی ئەمڕۆ سەرۆکوەزیران مەسرور بارزانی دەچێتە سۆران، یەکێک لە پڕۆژەکان دەکاتەوە و دوو پڕۆژەی گرنگی دیکەش بەسەر دەکاتەوە، دوانیوەڕۆش لە کەرنەڤاڵی سەرخستنی لیستی پارتی وتارێک بۆ جەماوەری دەڤەرەکە پێشکەش دەکات.

ئەمڕۆ دووشەممە، مەسرور بارزانی سەرۆكی حكوومەتی هەرێمی كوردستان، دوو پڕۆژەی گرنگ لە ئیدارەی سەربەخۆی سۆران دەكاتەوە.

پڕۆژەكان بریتین لە بەرزەپردی دەروازەی سۆران و شەقامی 30 مەتریی ناو ئیدارەی سۆران، ئەوانیش تەواو كراون و دەخرێنە خزمەت هاووڵاتییان.

بەرزەپردی سۆران گوژمەی پڕۆژەكە زیاتر لە 34 ملیار دینارە و زیاتر لە ساڵێك بۆ تەواوكردنی پڕۆژەكە دانرابوو، بەڵام زووتر تەواو بوو.

ئەم پڕۆژەیە جووڵەی بازرگانی لە دەروازەی سنووریی حاجی ئۆمەران ئاسانتر دەكات، قەرەباڵغیی ناو شاری سۆران ناهێڵێت و رووداوەكانی هاتوچۆ كەم دەكاتەوە.

لە كاتی سەردانەكەیدا، سەرۆك وەزیرانی هەرێمی كوردستان بە شێوەیەكی ڕاستەوخۆ چۆنیەتی بەرێوەچوونی كارەكانی دوو پڕۆژەی دیكە بە سەردەكات، كە بریتین لە پڕۆژەی ماستەرپلانی نوێی گەلی عەلی بەگ و پڕۆژەی جادەی 40 مەتری (قۆناغی یەكەم).

پڕۆژەی بەرزە پردی دەروازەی سۆران یەكێكە لە پڕۆژە گرنگەكانی كابینەی نۆیەم لە بواری رێگاوبان، كە گوژمەی گشتییەكەی زیاتر لە 34 ملیار دینارە و كاركردن لە ناوەراستی مانگی شوبات دەستیپێكردووە. لە ئێستە دا كاركردن تیایدا كۆتایی هاتووە.

ئەم پڕۆژەیە لە دوو بەرزە پرد پێك دێت، یەكێكیان 154 مەترە و ئەوی دیكە 57 مەترە. 

کردنەوەی ئەم پرۆژەیە، کە ڕێگاکانی هەولێر، مێرگەسۆر، ڕواندز و چۆمان پێکەوە دەبەستێتەوە، کارئاسانییەکی گەورە بۆ هاتوچۆی هاووڵاتییان و گەشتیاران دروست دەکات. هەروەها جووڵەی بازرگانی لە دەروازەی سنووریی حاجی ئۆمەران ئاسانتر دەكات و قەرەباڵغیی سەر شەقامەکانیش کەم دەکاتەوە.