هەرێم نیوز

کەرتی نەوتی ڤەنزوێلا پێ دەنێتە قۆناغێکی نوێی ئاڵۆزییەوە، دوای ئەوەی دۆناڵد ترەمپ، سەرۆکی ئەمریکا، گەمارۆیەکی دەریایی توندی بەسەر ئەو تانکەرە نەوتانەدا سەپاند کە مامەڵە لەگەڵ ڤەنزوێلا دەکەن.

ئەم هەنگاوە لە ڕێگەی بەهێزکردنی هەبوونی سەربازیی ئەمریکا لە ناوچەکە و دروستکردنی گوشارێکی زۆر بۆ سەر حکومەتەکەی نیکۆلاس مادۆرۆ جێبەجێ دەکرێت.

هەڕەشەکانی ترەمپ: گەورەترین هێزی دەریایی لە مێژوودا

دۆناڵد ترەمپ لە هەژمارە تایبەتەکانی خۆی لە تۆڕە کۆمەڵایەتییەکان ڕایگەیاند: "ڤەنزوێلا بە تەواوی لەلایەن گەورەترین هێزی دەریاییەوە گەمارۆ دراوە کە تا ئێستا لە مێژووی ئەمریکای باشووردا پێکهێنرابێت."

ترەمپ هۆشداریی دایە کاراکاس و وتی: "ئەم هێزە گەورەتر دەبێت و ئەو شۆکەی بەر لایەنی بەرامبەر دەکەوێت، وێنەی نەبووە."

وەڵامی توندی ڤەنزوێلا: "ئەمریکا دەیەوێت سامانی گەلەکەمان ببات"

لە بەرامبەردا، حکومەتی ڤەنزوێلا لە بەیاننامەیەکدا کە لەلایەن دێڵسی ڕۆدریگێز، جێگری سەرۆک کۆمارەوە بڵاوکرایەوە، ئەمریکای تۆمەتبار کرد بەوەی بە شێوەیەکی "ناژیرانە" کار دەکات.

لە بەیاننامەکەدا هاتووە: "ئامانجی ترەمپ لەم گەمارۆ سەربازییە، تاڵانکردنی سامانی نیشتمانیی ئێمەیە."

ڤەنزوێلا جەختی کردەوە کە سەروەریی خۆی بەسەر هەموو سەرچاوە سروشتییەکانیدا دەپارێزێت و ئەم هەنگاوەی واشنتنی وەک هەوڵێک بۆ دەستبەسەرداگرتنی گەورەترین یەدەگی نەوتی جیهان وەسف کرد.

ڕاستییەکان دەربارەی نەوتی ڤەنزوێلا

سەرەڕای هەبوونی گەورەترین یەدەگی نەوتی جیهان، ڤەنزوێلا لە بارودۆخێکی سەختی ئابووریدایە. لێرەدا کورتەیەک لە داتاکانی ئەم کەرتە دەخەینە ڕوو:

قەبارەی یەدەگ: 303.2 ملیار بەرمیل (19.4%ی یەدەگی جیهان - پلەی یەکەم)

ئاستی بەرهەمهێنان: 900 هەزار بەرمیل لە ڕۆژێکدا (دابەزین بە ڕێژەی 70% لە ساڵانی نەوەدەکانەوە)

کڕیاری سەرەکی: چین (80%ی هەناردەی نەوتی ڤەنزوێلا بۆ چین دەچێت)

گەمارۆ و کێشە تەکنیکییەکان

پەیوەندییەکانی نێوان واشنتن و کاراکاس لە ساڵی 2017ەوە بەهۆی سەپاندنی سزای دارایی و دواتر سزای ئۆپەراسیۆنی لە ساڵی 2019 بۆ سەر کۆمپانیای نەوتی دەوڵەتی (PDVSA) تێکچووە.

زۆربەی دامەزراوە نەوتییەکانی ڤەنزوێلا پشت بە تەکنەلۆژیای ئەمریکی دەبەستن، بەڵام بەهۆی سزاکانەوە ڕێگرییان لێ دەکرێت پارچەی یەدەگ و تەکنەلۆژیای نوێ هاوردە بکەن، ئەمەش بووەتە هۆی پەککەوتنی بەشێکی زۆری کەرتی نەوت.

لێکەوتە ئابوورییەکان

شارەزایان پێیان وایە ئەم گەمارۆ نوێیەی ترەمپ، قەیرانی دارایی ڤەنزوێلا قووڵتر دەکاتەوە، چونکە 95%ی داهاتی دەرەکیی ئەو وڵاتە پشت بە نەوت دەبەستێت.

ئەگەرچی کاریگەرییەکەی لەسەر بازاڕە جیهانییەکان سنووردار دەبێت، بەڵام بۆ ئابووریی ناوخۆیی ڤەنزوێلا کە پێشتر بەدەست هەڵاوسان و بێکارییەوە دەیناڵاند، گورزێکی کوشندە دەبێت.