هەرێم نیوز
سەرۆکی هەرێمی کوردستان لە ١٢٨ـەمین ساڵیادی دەرچوونی یەکەم ڕۆژنامەی کوردیدا، جەخت لە فەراهەمکردنی ژینگەیەکی ئازاد بۆ میدیاکاران دەکاتەوە و دەڵێت: "پابەندین بە پاراستنی ئازادیی ڕادەربڕین وەک بنەمایەکی سەرەکیی دیموکراسی."
نێچیرڤان بارزانی، سەرۆکی هەرێمی کوردستان لە پەیامێکدا پیرۆزبایی ١٢٨ ساڵەی دەرچوونی ڕۆژنامەی (کوردستان) و ٢٨ ساڵەی دامەزراندنی سەندیکای ڕۆژنامەنووسانی کرد. تێیدا سڵاوی بۆ گیانی "شەهیدانی ڕۆژنامەگەری" و ئەو پێشەنگانە نارد کە تەمەنیان بۆ وشەی ئازاد تەرخان کردووە.
سەرۆکی هەرێم ئاماژەی بەوە کرد، بەردەوام دەبن لە کارکردن بۆ فەراهەمکردنی ژینگەیەکی گونجاو و دوور لە هەر کۆتوبەندێک بۆ کاری میدیایی. جەختیشی کردەوە کە دەبێت "مافی دەستگەیشتن بە زانیاری مسۆگەر بێت و پارێزبەندیی پیشەیی بۆ ڕۆژنامەنووسان دابین بکرێت."
نێچیرڤان بارزانی داوای لە میدیاکاران کرد بەوپەڕی ڕاستگۆیی و پیشەگەرییەوە کار بکەن و بەرژەوەندیی گشتی و ئاشتیی کۆمەڵایەتی بپارێزن. وتیشی: "ڕۆژنامەگەریی ئازاد و بوێر، هاوبەشێکی کاریگەری بنیاتنانی حکومڕانییەکی باش و دادپەروەرە."
لە کۆتایی پەیامەکەیدا، سەرۆکی هەرێم داوای کرد ڕۆژنامەنووسان ڕۆڵی خۆیان لە چەسپاندنی کولتووری پێکەوەژیان، یەکترقبووڵکردن و لێبوردەییدا بگێڕن و برەو بە گیانی نیشتمانپەروەری بدەن.