هەرێم نیوز
دۆناڵد ترەمپ، سەرۆکی ویلایەتە یەکگرتووەکانی ئەمریکا، لە پەیامێکی نوێ و تونددا هێرشی کردە سەر کۆماری ئیسلامیی ئێران و هۆشداریی دا، کە ئەگەر تاران نەگاتە ڕێککەوتنێکی نوێ لەگەڵ واشنتن، ئەوا بژاردەی سەربازی و هەڵگیرسانی جەنگ لە دژی ئەو وڵاتە دەستپێدەکاتەوە.
لەناوبردنی هێزی سەربازی و داڕمانی تومەن
سەرۆکی ئەمریکا لە لێدوانەکانیدا ڕایگەیاند: "سێ چینی سەرکردایەتیی ئێران بە تەواوی کۆتاییان پێهاتووە؛ هێزەکانی ئەمریکا لە ماوەی ڕابردوودا توانیویانە بەشێکی زۆری هێزی دەریایی و ئاسمانیی ئێران لەناو ببەن." ترەمپ ئاماژەی بە دۆخی ئابووریی تارانیش کرد و گوتی: "لە ژێر گوشارە ئابوورییەکانی ئێمەدا، لە ئێستادا دراوی نیشتمانیی ئێران (تومەن) هیچ بەهایەکی لە بازاڕەکانی جیهاندا نەماوە."
لە درێژەی قسەکانیدا، سەرۆکی ئەمریکا هۆشداریی توندی دایە بەرپرسانی تاران و جەختی کردەوە: "ئەگەر لە چەند ڕۆژی داهاتوودا نەگەینە ڕێککەوتنێکی نوێی گشتگیر، ڕەنگە جەنگی ڕاستەوخۆی دژ بە ئێران دەستپێبکەینەوە؛ پێویستە هەموو لایەکیش بزانن کە ئێران هەرگیز ناتوانێت چەکی ئەتۆمی بەدەست بهێنێت."
دابەزینی ڕێژەی تاوان و توندکردنی سنوورەکان
لەسەر ئاستی ناوخۆیی ویلایەتە یەکگرتووەکانی ئەمریکاش، سەرۆک ترەمپ تیشکی خستە سەر سەرکەوتنەکانی کابینەکەی لە چەند مانگی ڕابردوودا و ڕایگەیاند، بەهۆی جێبەجێکردنی یاسا توندەکانەوە، ڕێژەی تاوان لە تەواوی ویلایەتەکاندا بەراورد بە ٢٥ ساڵی ڕابردوو بۆ نزمترین ئاست دابەزیوە.
سەبارەت بە دۆسیەی کۆچبەرانیش، کە یەکێکە لە بابەتە هەرە هەستیارەکانی کۆشکی سپی، دۆناڵد ترەمپ جەختی کردەوە: "ئێمە سنوورەکانی وڵاتەکەمان بە باشی و بە توندی داخستووە؛ لێرەشەوە ڕایدەگەیەنم کە هەر کەسێک بە شێوازی نایاسایی بێتە ناو خاکی ئەمریکاوە، دەستبەجێ دەستگیر دەکرێت و لە وڵات دەردەکرێت."
ئەم لێدوانە توندانەی سەرۆکی ئەمریکا لە کاتێکدان کە پێشتر چەند سەرچاوەیەکی دیپلۆماسی ئاماژەیان بەوە کردبوو دانوستانەکان لە نێوان واشنتن و تاران بۆ داڕشتنی ڕێککەوتن لە قۆناغی کۆتاییدان، بەڵام ئەم پەیامانەی ترەمپ دەری دەخەن کە هێشتا مەرجەکانی ئەمریکا لەسەر مێزی گفتوگۆکان بە توندی ماونەتەوە.