هەرێم نیوز
تۆڕی هەواڵی "سی ئێن ئێن"ی ئەمریکی لە ڕاپۆرتێکی تایبەتدا لە زاری سەرچاوە ئاگادارەکانی هەواڵگریی ئەمریکاوە ئاشکرای دەکات، کە لە چەند هەفتەی ڕابردوودا کۆماری ئیسلامیی ئێران هەوڵەکانی بۆ پاراستن و شاردنەوەی کۆگاکانی یۆرانیۆمی پیتێنراوی ئاست بەرز بەشێوەیەکی بەرچاو چڕتر کردووەتەوە، ئەمەش لە ڕێگەی داڕووخاندنی بەمەبەستی تونێلەکان و مینڕێژکردنی دەروازە سەرەکییەکان بۆ ڕێگریکردن لە گەیشتن بەو ماددە ئەتۆمییانە.
ترسی تاران لە ئۆپەراسیۆنی سەربازیی ئەمریکا
بەپێی زانیارییەکانی هەواڵگریی ئەمریکا، ئەم هەنگاوە قایمکارییە کتوپڕەی تاران پاش ئەو ترس و دڵەڕاوکێیە دێت کە ئیدارەی واشنتن ئۆپەراسیۆنێکی سەربازیی تایبەت بۆ دەستبەسەرداگرتنی ئەو یۆرانیۆمە ئەنجام بدات. ئەم پێشهاتە نوێیە ئاڵۆزییەکی قورسی خستووەتە بەردەم جێبەجێکردنی ئەو ڕێککەوتنە پێشنیارکراوەی کە ئیدارەی دۆناڵد ترەمپ دەیەوێت لەگەڵ تاراندا واژۆی بکات، کە بڕگەیەکی سەرەکیی تایبەتە بە لەناوبردنی تەواوەتیی ئەو ماددە ئەتۆمییانە.
سەرچاوەکان دووپاتی دەکەنەوە کە گەیشتن بەو نیو تۆنە لە یۆرانیۆمی پیتێنراو لە ئێستادا زۆر قورستر، مەترسیدارتر و کاتگرترە بەراورد بە مانگێک پێش ئێستا، کاتێک دۆناڵد ترەمپی سەرۆکی ئەمریکا ئاماژەی بەوە دابوو کە ڕەنگە فەرمان بە هێزەکانی ئەمریکا بکات بە شێوازی سەربازی دەست بەسەر ئەو کۆگایانەدا بگرن.
تونێلە داڕووخاوەکانی ئەسفەهان و بیانووە تەکنیکییەکان
کۆمەڵگەی نێودەوڵەتی پێی وایە زۆرینەی ئەو نیو تۆن یۆرانیۆمە لە ناو تونێلە داڕووخاوەکانی کۆمەڵگەی ناوەکیی ئەسفەهان لە ناوەڕاستی ئێراندا حەشاردراوە. ئەمە لە کاتێکدایە کە لە ناوەڕاستی مانگی ئایاری ڕابردوودا، هێزەکانی ئەمریکا ئامادەکاریی تەواویان بۆ ئۆپەراسیۆنێکی وشکانی کردبوو بۆ دەستبەسەرداگرتنی ئەو ماددە ناوەکییانە، بەڵام دواتر بەهۆی مەترسییە زۆرەکانییەوە پڕۆسەکە ڕاگیرا.
لەم چوارچێوەیەدا، شارەزایانی بواری ئەتۆمی لە ئەمریکا هۆشداری دەدەن کە ڕەنگە ئێران ئەم قایمکاریی و تەقاندنەوانە وەک بیانوویەک بەکاربهێنێت و لە کاتی جێبەجێکردنی ڕێککەوتنەکەدا بانگەشەی ئەوە بکات کە بەشێک لەو یۆرانیۆمە دەرهێنانەوەی بە تەواوی مەحاڵە، تاوەکو بتوانێت لە داهاتوودا بە ئاسانی دەستی پێی بگاتەوە. ئەم دۆخەش پرسیارێکی گەورەی دروستکردووە کە کێ ئەو ئەرکە مەترسیدارە دەگرێتە ئەستۆ بۆ دەرهێنان و لەناوبردنی یۆرانیۆمەکە کە بەشێکە لە مەرجەکانی ڕێککەوتنی کۆتاییهێنان بە جەنگ و کردنەوەی گەرووی هورمز.