هەرێم نیوز
وەزارەتی تەندروستیی عێراق ئاماری کۆتایی ڕووداوی دزەکردنی غازی ئامۆنیای لە کارگەیەکی پارێزگای بەسڕە ڕاگەیاند و ئاشکرای کرد، بەهۆی ڕووداوەکەوە دوو کەس گیانیان لەدەستداوە و ١١٤ کەسی تریش بریندار بوون.
پێشکەشکردنی فریاگوزاری و ئامادەیی ئۆتۆمبێلەکانی فریاکەوتن
بەپێی ڕاگەیەندراوێکی وەزارەتی تەندروستی: تەواوی برینداران فریاگوزاریی سەرەتاییان بۆ کراوە و خزمەتگوزارییە پزیشکییە پێویستەکانیان پێشکەش کراوە.
هەروەها ئاماژە بەوە کراوە: بە ڕاسپاردە و بەدواداچوونی ڕاستەوخۆی دکتۆر عەبدولحوسێن موسەوی، وەزیری تەندروستی، چاودێریی دۆخی برینداران دەکرێت.
وەزارەتەکە ئەوەشی خستووەتە ڕوو کە زیاتر لە ٥٠ ئۆتۆمبێلی فریاکەوتن ئاڕاستەی شوێنی ڕووداوەکە کراون بۆ پێشکەشکردنی یارمەتیی سەرەتایی و گواستنەوەی برینداران بۆ مەڵبەند و بنکە تەندروستییەکان.
دابەشبوونی برینداران بەسەر نەخۆشخانەکان و دۆخی تەندروستییان
ڕوونیشی کردەوە کە تاوەکو ئێستا ٢١ بریندار لە نەخۆشخانەکاندا ماونەتەوە و بەسەر نەخۆشخانەکاندا دابەش بوون؛ ١٢ بریندار لە نەخۆشخانەی زوبێر، دوو بریندار لە نەخۆشخانەی سەیداب، و ٧ برینداریش لە نەخۆشخانەی کوەیتی.
وەزارەتی تەندروستی جەختی کردەوە: دۆخی تەندروستیی هەموو بریندارەکان جێگیرە بە بێجگە لە یەک دۆخ، و پرۆسەی پێشکەشکردنی چاودێریی پزیشکی و بەدواداچوون بۆ تەندروستیی برینداران بەردەوامە.