هەرێم نیوز
سەرۆکایەتیی هەرێمی کوردستان لە ڕاگەیەندراوێکدا بە توندی ئیدانەی ئەو هێرشانەی کرد کە کرانە سەر بۆرییەکانی نەوتی سعوودیە، هاوکات پاڵپشتیی تەواوی هەرێمی کوردستانی بۆ ئاسایش و سەقامگیریی ئەو وڵاتە دووپات کردەوە.
پاڵپشتی بۆ سعوودیە و ڕێکارەکانی بەغدا
ئەمڕۆ شەممە، ١٢ی ئەیلوولی ٢٠٢٦، سەرۆکایەتیی هەرێمی کوردستان لە ڕاگەیەندراوێکدا بڵاوی کردەوە: "ئیدانەی ئەو هێرشانە دەکەین کە کرانە سەر بۆرییەکانی نەوت لە شانشینی عەرەبیی سعوودیە و پاڵپشتیی تەواوی خۆمان لەگەڵ شانشینی سعوودیە و پەرۆشیمان بۆ ئاسایش و سەقامگیرییەکەی دووپات دەکەینەوە."
هەروەها سەرۆکایەتیی هەرێم پشتیوانیی خۆی بۆ هەوڵ و ڕێکارەکانی بەغدا دەربڕیوە و ئاماژەی بەوە کردووە: "پشتیوانی لەو ڕێکارانە دەکەین کە حکوومەتی فیدراڵیی عێراق بۆ لێکۆڵینەوە لەو دەستدرێژییانە و ئاشکراکردن و لێپرسینەوە لە بەرپرسانی، دەیگرێتەبەر."
هۆشداری لە بەکارهێنانی خاکی عێراق دژی دراوسێکان
لە بەشێکی دیکەی ڕاگەیەندراوەکەدا هۆشداری دراوەتە لایەنە پەیوەندیدارەکان سەبارەت بە بەکارنەهێنانی خاکی عێراق بۆ پەلاماردانی وڵاتانی ناوچەکە و جەخت کراوەتەوە: "نابێت خاکی عێراق ببێتە سەرچاوەی هیچ هەڕەشە و دەستدرێژییەک بۆ سەر وڵاتانی دراوسێ.
ڕێزگرتن لە سەروەریی وڵاتان، دراوسێیەتیی باش و پەنابردنە بەر دیالۆگ و هاوکاری، گونجاوترین ڕێگەن بۆ پاراستنی ئاسایش و سەقامگیریی عێراق و پتەوکردنی ئاشتی و سەقامگیری لە ناوچەکەدا."