هەرێم نیوز
وەزارەتی ئەوقاف و کاروباری ئایینیی حکوومەتی هەرێمی کوردستان لە ڕاگەیەندراوێکدا جەختی لەوە کردەوە کە هەموو دروشمە پیرۆزەکانی ئایین ئەوپەڕی ڕێزلێگیراون، و هۆشداریی دا کە بەرامبەر هەر سەرپێچییەک کە بێڕێزی بێت ڕێکاری یاسایی دەگرنە بەر.
ڕێزگرتن لە پیرۆزییەکان و پاراستنی پێکەوەژیان
ئەمڕۆ شەممە، ٢٤ی تشرینی یەکەمی ٢٠٢٦، وەزارەتی ئەوقاف و کاروباری ئایینی ڕاگەیەندراوێکی بڵاو کردەوە و تێیدا هاتووه: "هەر بەڕێزێک کە بیروبۆچوونێکی جیاوازی خۆی هەیە، نابێت بە بەکارهێنانی هەندێ دەستەواژە هەستی بەرامبەر بریندار بکات، ئەمە بابەتێکی گشتگیرە، بۆیە هەر سەرپێچییەک کە گوزارشت و نیشاندانی بێڕێزی بێت دەچێتە خانەی ناوزڕاندنەوە."
وەزارەتەکە ئاماژەی بەوەش کردووە کە کەلتووری هەرێمی کوردستان لەم شێوە دەربڕینانە دوورە و کارێکی نامۆیە، و پێکەوەژیان شانازیی هەمووانە و مێژوویەکی دێرینی هەیە.
گرتنەبەری ڕێکاری یاسایی
لە کۆتایی ڕاگەیەندراوەکەدا، وەزارەتی ئەوقاف و کاروباری ئایینی ئیدانەی هەر کارێکی کرد کە ببێتە هۆی بریندارکردنی هەستی بەرامبەر، و دووپاتی کردەوە کە بە مافی خۆی دەزانێت تەواوی ڕێکارە یاساییەکان بەرامبەر سەرپێچیکاران بگرێتە بەر.